​ប្រែ​សម្រួលៈ​បំណង​(​ដេល្លី​ម៉េល​)៖​ប្រធានាធិបតី​ប្រេ​ស៊ីល​លោក​ល្វីស៍ ស៊ីណា​ស្យូ លូ​ឡា ដា ស៊ី​ល​វ៉ា​(Luiz Inacio Lula da Silva)​បាន​បណ្តេញ​មេ​ទ័ព​របស់​ប្រទេស ឧត្តមសេនីយ៍ សេ​សា ដឺ អា​រូ​ដា​(Cesar de Arruda)​បន្ទាប់​ពី​ពួក​អ្នកគាំទ្រ​ប្រធានាធិបតី​មុន បាន​ធ្វើ​កុបកម្ម​ដោយ​សំរុកចូលវិមានប្រធានាធិបតី ​តុលាការ​កំពូល​និង​សភា​កាលពី​សប្តាហ៍​មុន​។​

​ឧត្តមសេនីយ៍ អា​រូ​ដា បាន​ចូល​កាន់តំណែង​នេះ​កាលពី​ថ្ងៃ​៣០​ធ្នូ ២០២២ នៅ​ពីរ​ថ្ងៃ​គត់​ក្រោយ​ការបញ្ចប់​អាណត្តិ​របស់​ប្រធានាធិបតី បុល​សូ​ណារ៉ូ​(Bolsonaro)​។​

​ចំណាត់កា​រប​ណ្តេញ​មេ​ទ័ពនេះ​កើត​ឡើង​ក្រោយ​លោក​លូ​ឡា​បណ្តេញ​ចេញ​ទាហាន​ជាច្រើន​ចេញពី​ក្រុម​សន្តិសុខ​របស់​លោក​បន្ទាប់ពី​កើត​មាន​ចលា​ចល​។​​លោក​លូ​ឡា​បាន​និយាយថា លោក​សង្ស័យ​កងកម្លាំង​សន្តិសុខ​ជាប់​ពាក់ព័ន្ធ​ក្នុង​កុបកម្ម​ដែល​នាំ​ដល់​ការចាប់ខ្លួន​មនុស្ស​ជាង​២.០០០​នាក់​។​

​រំលឹកថា​កាលពី​ថ្ងៃ​៨​មករា ពួក​អ្នកគាំទ្រ​លោក​បុល​សូ​ណារ៉ូ​បាន​ចូល​រុះរើ​វាយបំផ្លាញ​វិមាន​ប្រធានាធិបតី តុលាការ​កំពូល​និង​សភា​នៅ​ក្រុង​ទីក្រុង​ប្រា​ស៊ី​លី​យ៉ា​(Brasilia)​ដោយ​វាយ​បំបែក​កញ្ចក់​បង្អួច​បំផ្លាញ​គ្រឿង​សង្ហារឹម ​វត្ថុ​សិល្បៈ​និង​គូសសញ្ញា​ក្រវេមក្រវាម​រួមជាមួយសារ​អំពាវនាវ​អោយ​ធ្វើ​រដ្ឋប្រហារ​យោធា​។​

​មេដឹកនាំ​ឆ្វេងនិយម​ល្វីស៍ ស៊ីណា​ស្យូ លូ​ឡា ដា ស៊ី​ល​វ៉ា បាន​ប្រកាស​ធ្វើ​ការរុះរើ​កងកម្លាំង​សន្តិសុខ​នៅ​ជុំវិញ​លោក​ក្រោយ​ផ្ទុះ​កុបកម្ម​ចូល​វិមាន​ប្រធានាធិបតី​កាលពី​សប្តាហ៍​មុន​

​ក្រោយ​កិច្ចប្រជុំ​ជាមួយ​ប្រធានាធិបតី​និង​ពួក​មេទ័ព​កាលពី​ថ្ងៃ​សុក្រ រដ្ឋមន្ត្រី​ការពារជាតិ ហ្សូ​ស មូ​ស្យូ​(Jose Mucio)​បាន​និយាយថា កងកម្លាំងប្រដាប់អាវុធ​«​មិន​ជាប់​ពាក់ព័ន្ធ​ផ្ទាល់​នឹង​កុបកម្ម​នេះ​ទេ និង​ថា​បើ​មាន​សមាសភាព​ទាហាន​ចូលរួម គេ​គ្រាន់តែ​ជា​ពលរដ្ឋ​ប្រេ​ស៊ីល​»​។​

​ពួក​អ្នកវិភាគ​និយាយថា ទំនាក់ទំនង​របស់​លោក​ប្រធានាធិបតី​ជាមួយ​កងទ័ព​នឹង​ជា​ការ​ប្រឈម​បន្ទាន់​ធំ​បំផុត ដោយសារ​តែ​វត្តមាន​យោធា​ដ៏​រឹងមាំ​ក្នុង​រដ្ឋាភិបាល​មុន​។​

​តែ​កាលពី​ថ្ងៃ​ពុធ មេទ័ព​ជាន់ខ្ពស់​ម្នាក់​បាន​និយាយថា យោធា​នឹង​បន្ត​ធានា​លទ្ធិប្រជាធិបតេយ្យ​និង​ថា​លទ្ធផល​ឆ្នោត​ដែល​លោក​លូ​ឡា ឈ្នះ​លោក បុល​សូ​ណារ៉ូ គួរ​ទទួលយក​៕

​ពួក​អ្នកគាំទ្រ​ប្រធានាធិបតី​ចាញ់ឆ្នោត​ធ្វើ​បាតុកម្ម​ប្រឆាំង​លោក​លូ​ឡា និង​សំរុកចូល​វិមាន​ប្រធានាធិបតី សភា​និង​តុលាការ​កំពូល​កាលពី​ថ្ងៃ​៨​មករា​