​ដោយ​: ពៅ​និមល / ភ្នំពេញ​៖ លោក ប៉ាន សូរ​ស័ក្ដិ រដ្ឋមន្ត្រីក្រសួង​ពាណិជ្ជកម្ម និង​ជា​ប្រធាន​សហព័ន្ធ​ខ្មែរ​ទោចក្រយាន បាន​ដឹកនាំ​គណៈប្រតិភូ​កម្ពុជា ធ្វើដំណើ​ទស្សនកិច្ច​ការងារ នៅ​ទីស្នាក់ការ​សហព័ន្ធ​កីឡា​ទោចក្រយាន​អន្តរជាតិ ដើម្បី​ជួបប្រជុំ​ពិភាក្សា​ការងារ ជាមួយ​មន្ត្រី នៃ​សហព័ន្ធ​កីឡា​ទោចក្រយាន​អន្តរជាតិ (UCI) និង​ធ្វើ​ទស្សនកិច្ច ក្នុង​មជ្ឈមណ្ឌល​ហ្វឹកហ្វឺន និង​បណ្ដុះបណ្ដាល​របស់ សហព័ន្ធ UCI ។​

​ប្រភពពី​ក្រសួងពាណិជ្ជកម្ម នៅ​ព្រឹក​ថ្ងៃទី​២២ ខែមករា ឆ្នាំ​២០២៣ នេះ បាន​ឲ្យ​ដឹង ថាៈ ក្នុង​ដំណើរ​ទស្សនកិច្ច នៅ​ក្រុង​អៃ​ហ្គ​ល ប្រទេស​ស្វី​ស លោក​រដ្ឋមន្ត្រី បាន​ជម្រាបជូន ពី​កិច្ចសហប្រតិបត្តិការ រវាង​សហព័ន្ធ​ខ្មែរ និង​សហព័ន្ធ​កីឡា​ទោច​ក្រ យាន​អន្តរជាតិ នូវ​ការងារ​មួយចំនួន រួមមាន​៖ ការបណ្ដុះបណ្ដាល​គ្រូបង្វឹក​កម្រិត​១ របស់​សហព័ន្ធ​ខ្មែរ គម្រោង​ជំនួយ​ជា​សម្ភារៈ មានដូចជា សម្លៀកបំពាក់ និង​កង់​គួ​ក ព្រមទាំង​កង់​ភ្នំ សម្រាប់​កីឡាករ​ហ្វឹកហាត់ និង​គម្រោង​ជំនួយ​ពិសេស សម្រាប់ការ ផ្សព្វផ្សាយ យុទ្ធនាការ “​ប្រជាជន​ម្នាក់ កង់​មួយគ្រឿង​” ឆ្ពោះទៅ​កីឡា​ស៊ី​ហ្គេម ឆ្នាំ​២០២៣ ដែល​បាន​ធ្វើឡើង​នៅ​ខេត្ត​កែប​។​

​ក្នុងឱកាស​នោះ លោក​រដ្ឋមន្ត្រី ក៏បាន​លើកឡើង​ពី​ការត្រៀមខ្លួន​របស់​កីឡាករ ទោចក្រយាន​កម្ពុជា ដើម្បី​ចូលរួម​ប្រកួត នៅក្នុង​កីឡា​ស៊ី​ហ្គេម ឆ្នាំ​២០២៣ ដែល​កម្ពុជា​នឹងធ្វើ​ជា​ម្ចាស់ផ្ទះ ចាប់ពី​ថ្ងៃទី​៥-១៧ ខែឧសភា ខាងមុខនេះ​។​

​ក្រសួងពាណិជ្ជកម្ម បានបញ្ជាក់​ថាៈ ជា​កិច្ចបញ្ចប់ លោក​រដ្ឋមន្ត្រី​ក៏បាន​អញ្ជើញ ប្រធាន​សហព័ន្ធ​កីឡា​ទោចក្រយាន​អន្តរជាតិ ចូលរួម​ទស្សនា​ព្រឹត្តិការណ៍​កីឡា ស៊ី​ហ្គេម ឆ្នាំ​២០២៣ ដោយផ្ទាល់ នៅ​កម្ពុជា ព្រមទាំង​ស្នើសុំ​ជំនួយ​បន្ថែម​ពី សហព័ន្ធ​កីឡា​ទោចក្រយាន​អន្តរជាតិ ដូចជា​ការបណ្ដុះបណ្ដាល ឧបករណ៍ និង​សម្ភារៈ សម្រាប់​រៀបចំ​ការប្រកួត ក៏ដូចជា សម្ភារៈ​កីឡាករ ដូចជា កង់ និង​សម្ភារៈ​ផ្សេងៗ មួយចំនួនទៀត ដើម្បី​បន្ត​ជំរុញ​ការអភិវឌ្ឍន៍ កីឡា​ទោចក្រយាន នៅ​កម្ពុជា ឱ្យ​រឹតតែ​រីកចម្រើន​បន្ថែមទៀត​៕/V


​លោក ប៉ាន សូរ​ស័ក្តិ ក្នុង​ដំណើរ​ទស្សនកិច្ច នៅ​សហព័ន្ធ​កីឡា ទោចក្រយាន​អន្តរជាតិ ប្រទេស​ស្វី​ស (​រូបភាព​៖ ហ្វេ​ស​ប៊ុ​ក​ក្រសួងពាណិជ្ជកម្ម​)​