ប្រែ​សម្រួលៈ​បំណង​(​ដេល្លី​ម៉េល​)៖​អាគារ​មួយ​បាន​បាក់​កាលពី​ថ្ងៃ​អាទិត្យ​នៅ​ក្នុង​ទីក្រុង​អាឡេប​ប៉ូ​(Aleppo)​របស់​ស៊ី​រី ដោយ​សម្លាប់​មនុស្ស​១៦​នាក់​រួម​មាន​កូនក្មេង នេះ​បើ​តាម​ការ​អោយ​ដឹង​ពី​អាជ្ញាធរ​និង​សារព័ត៌មាន​។​

​សូមបញ្ជាក់​ថា អាគារ​ភាគច្រើន​ក្នុង​ទីក្រុង​អាឡេប​ប៉ូ​ត្រូវបាន​បំផ្លាញ​ក្នុងអំឡុងពេ​លមាន​ជម្លោះ​ប្រដាប់អាវុធ​ដែល​បាន​ចាប់ផ្តើម​កាលពី​១២​ឆ្នាំ​មុន​និង​បន្សល់​ទុក​អាគារ​មិន​មាំទាំ​មួយចំនួន​។​

​ទីភ្នាក់ងារ​សារព័ត៌មាន​រដ្ឋ​SANA​បាន​និយាយថា​«​ចំនួន​ជនរងគ្រោះ​ដល់​ជីវិត​ពី​ការបាក់​អាគារ​មនុស្ស​រស់​នៅ​..​បាន​កើន​ដល់​១៦​នាក់​»​។​

​ក្រសួង​មហាផ្ទៃ​បាន​និយាយថា មនុស្ស​តែ​ម្នាក់​ត្រូវបាន​ជួយសង្គ្រោះ​ចេញពី​គំនរ​បាក់បែក​នៃ​អាគារ​កំពស់​ប្រាំ​ជាន់​ដែល​មាន​មនុស្ស​ប្រាំពីរ​គ្រួសារ​រស់​នៅ​។​

​រូប​វីដេអូ​បញ្ចាំង​នៅក្នុង​ទូរទស្សន៍​រដ្ឋ​បានបង្ហាញ​បុគ្គលិក​ជួយសង្គ្រោះ​រាប់សិប​នាក់​នៅ​កន្លែងកើតហេតុ ដោយ​ខ្លះ​ប្រើ​ដៃទទេ​ដើម្បី​រើ​កាយ​គំនរ​ថ្ម​រួមជាមួយ​នឹង​ត្រាក់ទ័រ​ចូ​កកាយ​អេស្កាវ៉ាទ័រ​។​

​ទីភ្នាក់ងារ​សារព័ត៌មាន​SANA​បាន​ស្រង់​ប្រភព​ប៉ូលីស​ដែល​បាន​និយាយថា អាគារ​នៅ​សង្កាត់​សេក ម៉ាក់​សូត​(Sheikh Maksoud)​នេះ​បានរ​លំដោយ​សារ​ជ្រាប​ទឹក​នៅ​គ្រឹះ​ក្រោម​ដី​។​

​រំលឹកថា កាលពី​ខែ​កញ្ញា​ឆ្នាំមុន អាគារ​មួយ​ក៏​បាន​បាក់​នៅ​ក្រុង​អាឡេប​ប៉ូ​ដោយ​សម្លាប់​មនុស្ស​ដប់​នាក់​បន្ទាប់​ពី​មនុស្ស​១១​នាក់​បាន​ស្លាប់​ក្នុង​ការបា​ក់ប្លុក​ផ្ទះល្វែង​មួយ​នៅក្នុង​ទីក្រុង​ដដែល​កាលពី​ឆ្នាំ​២០១៩៕