​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អាជ្ញាធរ​រដ្ឋ​ល្វី​សៀ​ណា (Louisiana)​សហរដ្ឋ​អាម៉េរិក បាន​និយាយ​កាលពី​ថ្ងៃអាទិត្យ​ទី​២២​មករា​ថា​មនុស្ស​រាប់​សិប​នាក់​បាន​រងរបួស​នៅក្នុង​ការបាញ់ប្រហារ​​នៅ​ក្លិប​រាត្រី​មួយ​នៅ​ទីក្រុង​បា​តុ​នរូ (Baton Rouge)​។​

​ប៉ូលីស​បាន​និយាយថា ជនរងគ្រោះ​ម្នាក់​ស្ថិតក្នុង​ស្ថានភាព​ធ្ងន់ធ្ងរ​។ គ្មាន​ការចាប់ខ្លួន​ត្រូវបាន​ធ្វើ​ឡើង​ទេ ប៉ុន្តែ​ប៉ូលីស​ជឿថា ការវាយប្រហារ​នៅ​ព្រឹក​ព្រលឹម​ថ្ងៃអាទិត្យ​គឺ​ត្រូវបាន​កំណត់ “​គោលដៅ​” ទុកជាមុន​។

​មេប៉ូលីស​ក្រុង​បា​តុ​ន​រូ លោក មឺ​ហ្វី ផូល (Murphy Paul) បាន​និយាយ​នៅក្នុង​សន្និសីទ​សារព័ត៌មាន​នៅ​រសៀល​ថ្ងៃ​អាទិត្យ​ថា “​ផ្អែក​លើ​កិច្ចខិតខំ​ប្រឹងប្រែង​ស៊ើបអង្កេត​បឋម នេះ​មិនមែន​ជា​អំពើ​ហិ​​ង្សា​ចៃដន្យ​នោះ​ទេ​។ យើង​ជឿ​ថា​នេះ​ជា​ព្រឹត្តិការណ៍​ដែល​គេ​ដាក់​គោលដៅ​ជា​មុន​លើ​នរណាម្នាក់ ហើយ​អ្នក​ផ្សេង​ទៀត​បាន​រងរ​បួស​នៅ​ក្នុង​ដំណើរការ​នោះ​”​។​

​មន្ត្រី​ប៉ូលីស​ក្រុង​បា​តុ​នរូ​បី​នាក់​បាន​ស្ថិតនៅ​ក្បែរ​នោះ នៅពេលដែល​ការបាញ់ប្រហារ​បានកើត​ឡើង​នៅ​ម៉ោង​ប្រហែល ១៖៣០ ព្រឹក ហើយ​បាន​ឆ្លើយតប​ភ្លាម​ទៅកាន់​ក្លិប​រាត្រី Dior Bar & Lounge ។ ពួកគេ​បាន​ធ្វើ​សកម្មភាព​សង្គ្រោះ​ជីវិត​រហូត​ដល់​អ្នកបច្ចេកទេស​ពេទ្យ​សង្គ្រោះបន្ទាន់​មកដល់​។​

​លោកផូ​លបាន​និយាយថា “​យើង​ជឿ​ថា ការឆ្លើយតប​ភ្លាមៗ​របស់​ពួកគេ​បាន​រារាំង​ការរង​របួស​បន្ថែមទៀត​”​។​

​ទោះបីជា​ប៉ូលីស​មាន​តម្រុយ​ខ្លះ​ក៏ដោយ ក៏​លោក​ផូល​នៅតែ​ជំរុញ​អ្នក​ផ្សេង​ទៀត​ដែល​មាន​ព័ត៌មាន​អំពី​ការបាញ់ប្រហារ​ឱ្យ​ចេញ​មក​ផ្តល់ដំណឹង​៕

​ក្លិប​រាត្រី Dior Bar & Lounge ជា​កន្លែង​បាញ់បោះ​កាលពី​ព្រឹក​ទៀបភ្លឺ​ថ្ងៃអាទិត្យ