​ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋមន្ត្រីការបរទេស​អាល្លឺម៉ង់​បាន​និយាយ​កាលពី​ថ្ងៃអាទិត្យ​ថា រដ្ឋាភិបាល​របស់​លោកស្រី​នឹងមិន​ជំទាស់​ទេ បើសិនជា​ប៉ូឡូញ​ចង់​បញ្ជូន​រថក្រោះ​Leopard 2 របស់​ខ្លួន​ទៅ​​អោយ​អ៊ុ​យក្រែន ។​

​វា​ទំនងជា​ការ​ទម្លុះទម្លាយ​ភាព​ទាល់ច្រក​មួយ​សំរាប់​រដ្ឋាភិបាល​ទីក្រុង​គៀវ​ដែល​ចង់បាន​រថក្រោះ​ប្រយុទ្ធ​Leopard 2​សំរាប់​សង្គ្រាម​ទល់នឹង​រុស្ស៊ី​បន្ទាប់​ពី​សម្ពន្ធមិត្ត​អឺរ៉ុប​គាបសង្កត់​រដ្ឋាភិបាល​ទីក្រុង​ប៊ែរ​​ឡាំង​អោយ​បញ្ជូន​រថក្រោះ​ផលិត​នៅ​អាល្លឺម៉ង​ធុន​នេះ​ទៅ​អោយ​កងកម្លាំង​អ៊ុ​យក្រែន​។​

​សូមបញ្ជាក់​ថា អស់​ពេល​ជា​ច្រើន​ខែ​មក​ហើយ​ពួក​មន្ត្រី​អ៊ុយ​ក្រែន​បាន​អំពាវនាវ​អោយ​សម្ពន្ធមិ​ត្ត​លោកខាងលិច​ផ្តល់​អោយ​ខ្លួន​នូវ​រថក្រោះ​ទំនើប​ផលិត​នៅ​អាល្លឺម៉ង់ តែ​រដ្ឋាភិបាល​ទីក្រុង​ប៊ែរ​ឡាំង​មិន​ព្រម​​បញ្ជូនទៅអោយ ឬ​ក៏​មិន​អនុញ្ញាត​អោយ​ប្រទេស​ជា​សមាជិក​អង្គការ​ណា​តូ​ដែល​ប្រើ​រថក្រោះ​ប្រភេទ​នេះ​បញ្ជូន​រថក្រោះ​របស់គេ​ទៅ​អោយ​កងកម្លាំង​អ៊ុ​យក្រែនទេ​។​

​នៅពេល​ត្រូវ​បាន​សួរថា​តើ​នឹង​មាន​អ្វី​កើតឡើង​បើសិនជា​ប្រទេស​ប៉ូឡូញ​បញ្ជូន​រថក្រោះ​Leopard 2​របស់​ខ្លួន​ទៅអោយ​អ៊ុយ​ក្រែន​ដោយ​គ្មាន​ការយល់ព្រម​ពី​អាល្លឺម៉ង់ លោកស្រី​រដ្ឋមន្ត្រី​អាន​ណា​ឡេ​ណា​​ប៊ែរ​បុក​(Annalena Baerbock)​បាន​និយាយ​ក្នុង​ទូរទស្សន៍​បារាំង​មួយ​ថា​«មកទល់ពេលនេះ សំណួរ​បែបនេះ​មិន​ត្រូវ​បាន​សួរ​នៅឡើយ​ទេ តែបើ​សួរ​ទៅហើយ យើង​សុំ​បញ្ជាក់​​ថា​យើងនឹង​មិន​ឈរ​ពាំង​​ផ្លូវ​ទេ​»​។​

​រដ្ឋមន្ត្រីការបរទេស(ស្តាំមុខ) ការពារជាតិ​និង​អធិកា​ប​តី​អាល្លឺម៉ង់ ចូលរួម​កិច្ចប្រជុំ​របស់​ក្រុមប្រឹក្សា​ការពារ​ជាតិ​និង​សន្តិសុខ​រួម​បារាំង​-​អាល្លឺម៉ង់​នៅ​ក្រុង​ប៉ារីស​កាលពី​ថ្ងៃអាទិត្យ​

​សម្តី​របស់​លោកស្រី​ទំនង​ជា​កាន់តែ​ខ្លាំង​ជាង​ការលើកឡើង​របស់​អធិកា​ប​តី​អាល្លឺម៉ង់​លោក អូ​ឡា​ហ្វ ស្កូ​ល​( Olaf Scholz)​នៅ​ជំនួប​កំពូល​មួយ​នៅ​ក្រុងប៉ារីស​កាលពី​ថ្ងៃអាទិត្យ​ដែលថា រាល់ការសំរេចចិត្ត​ទាំងអស់​ស្តីពី​ការប្រគល់​គ្រឿង​សព្វាវុធ​នឹង​ត្រូវ​មាន​ការសម្របសម្រួល​គ្នា​ជាមួយ​សម្ពន្ធមិត្ត រួម​មាន​សហរដ្ឋ​អាម៉េរិក​។​

​អាល្លឺម៉ង់​បាន​ស្ថិត​ក្រោម​សម្ពាធ​ជាខ្លាំង​អោយជួយ​ឬ​អនុញ្ញាតអោយ​ប្រទេស​ដទៃ​ទៀត​បញ្ជូន​រថក្រោះ​Leopards ទៅអោយ​អ៊ុ​យក្រែន​។​តែ​គណបក្ស​សង្គម​ប្រជាធិបតេយ្យ​របស់​លោក​ស្កូក ជា​ទម្លាប់​​មិន​ចូល​ចិត្ត​ចូល​ពាក់ព័ន្ធ​ផ្នែក​យោធា​និង​មាន​ការប្រយ័ត្នប្រយែង​អំពី​ចំណាត់ការ​ភ្លាមៗ​ណាមួយ​ដែល​អាច​បណ្តាល​អោយ​រដ្ឋាភិបាល​ទីក្រុង​មូ​ស្គូ​កាន់តែ​បង្កាត់ភ្លើង​សង្គ្រាម​បន្ថែម​។​

​រដ្ឋមន្ត្រី​ការពារជាតិ​អាល្លឺម៉ង់​បាន​និយាយ​កាលពី​ថ្ងៃអាទិត្យ​ថា លោក​រំពឹង​ថា​នឹង​មាន​ការសំរេច​ចិត្ត​មួយ​ក្នុងពេល​ឆាប់ៗ​អំពី​រថក្រោះ​ខ្លារខិន​របស់​អាល្លឺម៉ង់​នេះ​៕

​ប្រធានាធិបតី​អ៊ុយ​ក្រែនលោក​ហ្សេ​ឡេន​ស្គី កាលពី​ថ្ងៃអាទិត្យ​បាន​អំពាវនាវ​ជា​ថ្មី​អោយ​សម្ពន្ធមិត្ត​ផ្តល់​រថក្រោះ​ប្រយុទ្ធ

​ប៉ូឡូញសំរេចបញ្ជូនរថក្រោះ Leopard 2អោយអ៊ុយក្រែន