​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ វា​ពេល​ដ៏​រីករាយ​ជាមួយនឹង​ការ​ប្រារព្ធ​ពិធី​បុណ្យចូលឆ្នាំថ្មី​នៅក្នុង​ទីក្រុង​ម៉ុន​ធឺ​រ៉េ ផាក (Monterey Park)​ចាប់តាំងពី​មុន​ពេល​ជំងឺ​រាតត្បាត ដោយ​ហ្វូង​​មនុស្ស​យ៉ាង​ច្រើន​កោះករ​សម្រុក​ដើរ​ពេញ​ផ្លូវ​ក្នុង​ទីក្រុង​អាម៉េរិក​ដែល​សម្បូរ​ចិន​រស់នៅ​មួយ​នេះ​នៅ​ជិត​ទីក្រុង​ឡូ​ស​អ៊ែន​ជើ​ឡេស សម្រាប់​ការកម្សាន្ត​បន្ត​ផ្ទាល់ ការ​ដង្ហែ​ក្បួន​ខា​នី​វ៉​ល និង​ការបង្ហាញ​​អាហារ​ជាច្រើន​មុខ​។​

​ប៉ុន្តែ​ការ​ប្រារព្ធ​ពិធី​ត្រូវ​បាន​រំខាន​ដោយ​សោកនាដកម្ម​កាលពី​យប់​ថ្ងៃ​សៅរ៍ បន្ទាប់​ពី​ខ្មាន់កាំភ្លើង​ម្នាក់​បាន​ចូល​ទៅក្នុង​សាល​រាំរែក​ក្នុង​បារ ហើយ​បាញ់ប្រហារ​ស្លាប់​មនុស្ស​១០​នាក់ របួស ១០ នាក់​ទៀត និង​ធ្វើឱ្យ​មនុស្សម្នា​ភ័យ​រត់​ប្រសាច​ពេញ​ផ្លូវ​។​

​ការបាញ់ប្រហារ​ដែល​បណ្តាលឱ្យ​ស្លាប់​ប្រុស​៥​ស្រី​៥​បាន​នាំមក​នូវ​ការបញ្ចប់​ពិធីជប់លៀង​ដែល​បាន​គ្រោងទុក​រយៈពេល​ពី​រ​ថ្ងៃ​ក្នុងឱកាស​ចូលឆ្នាំ​ទន្សាយ​(​ថោះ​)​ដែល​មាន​អ្នកឡក​ម៉ុង​សាយ​តាម​ដងផ្លូវ​ដែល​​តុបតែង​ដោយ​គោម​ក្រហម​។​

​ពិធី​នានា​នៅ​ថ្ងៃអាទិត្យ​ត្រូវ​បាន​លុបចោល ទោះបីជា​ពិធី​បុណ្យចូលឆ្នាំថ្មី​បាន​បន្ត​ធ្វើ​នៅ​ទីក្រុង​ជិតខាង ដែល​ជា​លំនៅ​របស់​ប្រជាជន​អាម៉េរិក​ដើមកំណើត​អាស៊ី​ដ៏​ធំ​ក៏ដោយ​។​

​អភិបាលក្រុង លោក ប្រូ តឹម យ៉ូ​សេ សាន់​ឆេស (Pro Tem Jose Sanchez) ដែល​នៅ​ទីនោះ​ជាមួយ​កូនស្រី​អាយុ ៦ ឆ្នាំ​របស់​គាត់​ដែរនោះ បាន​និយាយថា​”​យើង​មិន​មាន​ការ​ប្រារព្ធ​ពិធី​បែប​​នេះ​អស់​រយៈពេល​បី​ឆ្នាំ​មក​ហើយ​ដោយសារ​ជំងឺឆ្លង ដូច្នេះ​នេះ​គឺជា​ពេលវេលា​ដ៏​សំខាន់​។ មនុស្ស​សម្រុក​ចេញមក​យ៉ាងច្រើន​”​។ លោក​បាន​ប៉ាន់ប្រមាណ​ថា​មាន​មនុស្ស​ចំនួន ១០០.០០០​នាក់​ចូលរួម​​កាលពី​ថ្ងៃ​សៅរ៍ ហើយ​ពិធី​បុណ្យ​នេះ​ជា​ធម្មតា​ជាការ​ប្រារព្ធ​ពិធី​បុណ្យចូលឆ្នាំ​ថ្មី​ដ៏​ធំ​បំផុត​នៅក្នុង​រដ្ឋ​។​

​ការសម្លាប់​រង្គាល​នេះ​បាន​បញ្ជូន​រលក​តក់ស្លុត​ទូ​ទាំង​សហគមន៍​ជនជាតិ​អាម៉េរិកាំង​ដើមកំណើត​អាស៊ី​នៅ​ជុំវិញ​ប្រទេស​ដោយ​ជំរុញ​ឱ្យ​ប៉ូលិស​ពី​ទីក្រុង​សាន់​ហ្វ្រា​ន់​ស៊ី​ស្កូ​រហូត​ដល់​ទីក្រុង​ញូវយ៉ក​បង្កើន​​ការ​ល្បាត​នៅ​ឯ​ពិធី​បុណ្យចូលឆ្នាំថ្មី​នៅក្នុង​ទីក្រុង​របស់​ពួកគេ​៕

សមាជិក​សភា​បក្ស​សាធារណរដ្ឋ លោកស្រី ជូ​ឌី ជូ (​ឆ្វេង​) ថ្លែង​ទៅ​កាន់​សារព័ត៌មាន​ជា​មួយ​មេ​ប៉ូលិស​ក្រុង​ឡូ​ស​អ៊ែន​ជើ​ឡេស ក្រោយ​ការសម្លាប់​រង្គាល​នៅ​ទីក្រុង​ម៉ុន​ធឺ​រ៉េ ផាក​