​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក បូរី​ស ច​ន​សុន បាន​ធ្វើ​ដំណើរ​ទស្សនកិច្ច​ដ៏​គួរឱ្យភ្ញាក់ផ្អើល​ទៅ​ប្រទេស​អ៊ុ​យក្រែន ដោយ​និយាយថា វា​ជា “​ឯកសិទ្ធិ​” ដែល​បាន​ទៅ​ទីនោះ​ដើម្បី​បង្ហាញ​សាមគ្គីភាព​ជាមួយ​ប្រទេស​ដែល​ហែកហួរ​ដោយ​សង្គ្រាម​។​

​អតីត​នាយករដ្ឋមន្ត្រី ដែល​កំពុង​ប្រឈមមុខ​នឹង​សំណួរ​ថ្មីៗ​ទាក់ទង​នឹង​ហិរញ្ញវត្ថុ​ផ្ទាល់ខ្លួន​របស់​គាត់ បាន​និយាយថា ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី​បាន​អញ្ជើញ​គាត់​ឱ្យ​ធ្វើ​ដំណើរ​ទៅ​កាន់​ទីក្រុង​គៀវ​​ម្តងទៀត​។​

​វិមាន​រដ្ឋាភិបាល​អង់គ្លេស​បានចង្អុលបង្ហាញ​ថា លោក រី​ស៊ី ស៊ូ​ណាក់ គឺជា “​អ្នកគាំទ្រ​” ដំណើរ​ទស្សនកិច្ច​របស់​អ្នកកាន់តំណែង​មុន​របស់​គាត់​បន្ទាប់ពី​មាន​ការ​អះអាង​នានា​ថា​វា​អាច​បំផ្លាញ​សិទ្ធិអំណាច​​របស់​នាយក​រដ្ឋមន្ត្រី​។​

​វីដេអូ​បានបង្ហាញ​លោក​ច​ន​សុន​បាន​ជួប​ប្រធានាធិបតី​អ៊ុ​យក្រែន ដោយ​ចាប់​ដៃ​យ៉ាង​កក់ក្តៅ ហើយ​ប្រាប់​លោក​ថា “​វា​ជា​កិត្តិយស​ណាស់​ដែល​បាន​មក​ទី​នេះ​ម្ដងទៀត​”​។​

​លោក​ហ្សេ​លេន​ស្គី​បាន​ឆ្លើយតប​ថា “​ជា​កិត្តិយស​ណាស់​សម្រាប់​ពួកយើង​”​។​

​នៅក្នុង​សេចក្តីថ្លែងការណ៍​មួយ លោក​ច​ន​សុន​បាន​និយាយថា “​វា​ជា​ឯកសិទ្ធិ​មួយ​ដែល​បាន​ធ្វើ​ទស្សនកិច្ច​អ៊ុយ​ក្រែន​តាម​ការអញ្ជើញ​របស់​ប្រធានាធិបតី​ហ្សេ​លេន​ស្គី​”​។

“​ការរង​ទុក្ខ​របស់​ប្រជាជន​អ៊ុយ​ក្រែន​បាន​បន្ត​យូរពេក​ហើយ​”​។​

“​មធ្យោបាយ​តែ​មួយគត់​ដើម្បី​បញ្ចប់​សង្គ្រាម​នេះ​គឺ​ត្រូវ​ឱ្យ​អ៊ុយ​ក្រែន​ឈ្នះ និង​ឈ្នះ​ឱ្យ​បាន​លឿន​តាម​ដែល​អាច​ធ្វើទៅបាន​។​នេះ​គឺជា​ពេលវេលា​ត្រូវ​បង្កើន​និង​ផ្តល់​ឱ្យ​អ៊ុយ​ក្រែន​ទ្វេ​ដង​នូវ​ឧបករណ៍​ទាំងអស់​​ដែល​ពួកគេ​ត្រូវការ​ដើម្បី​បញ្ចប់​ការងារ​នេះ​”​។​

“​ពូ​ទីន​បរាជ័យ​កាន់តែ​ឆាប់ វា​កាន់តែ​ល្អ​ប្រសើរ​សម្រាប់​អ៊ុយ​ក្រែ​ន​និង​ពិភពលោក​ទាំងមូល​”​។​

​អ្នកនាំពាក្យ​របស់​លោក​ច​ន​សុន​បាន​បន្ថែមថា លោក​គាំទ្រ​យ៉ាង​ពេញទំហឹង​ចំពោះ​គោលនយោបាយ​របស់​រដ្ឋាភិបាល​ចក្រភព​អង់គ្លេស​ស្តី​ពី​អ៊ុយ​ក្រែន​រួមទាំង​ការ​សម្រេចចិត្ត​នា​ពេល​ថ្មីៗ​នេះ​ក្នុងការ​​បញ្ជូន​រថក្រោះ Challenger 2​ផងដែរ​។​

​ពួកគេ​បាន​និយាយថា ដំណើរ​ទស្សនកិច្ច​រប​ស់លោក​បានបង្ហាញ​ពី​សាមគ្គីភាព​ជាមួយ​ប្រជាជន​អ៊ុ​យក្រែន​៕

លោក​ច​ន​សុន​ជួប​លោក​ហ្សេ​លេន​ស្គី​នៅ​ទីក្រុង​គៀវ​កាលពី​ថ្ងៃអាទិត្យ