​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាសែត​បារាំង​ប្រចាំ​ថ្ងៃ​លី​ប៊ឺរ៉េសិ​ន​( Liberation) បាន​ដកស្រង់​សម្តី​បុរស​វ័យក្មេង​ម្នាក់​ថា វេជ្ជបណ្ឌិត​បាន​កាត់​ព​ង​ស្វាស​របស់​បុរស​នេះ​ដែល​ត្រូវ​ប៉ូលិស​យក​​ដំបងឆក់​វាយ​ចំ​ក្រលៀន​ក្នុងអំឡុងពេល​បាតុកម្ម​ដ៏​ធំ​នៅ​ទីក្រុង​ប៉ារីស ហើយ​គាត់​គ្រោង​នឹង​ដាក់​ពាក្យ​ប្តឹង​។​

​ឧបទ្ទវហេតុ​នេះ​បាន​កើតឡើង​ក្នុងអំឡុងពេល​ផ្ទុះ​អំពើ​ហិង្សា​នៅ​ឯ​ការហែក្បួន​ដោយ​សន្តិវិធី​កាលពី​ថ្ងៃ​ព្រហស្បតិ៍​ដោយ​មនុស្ស​រាប់​ម៉ឺន​នាក់​ដែល​ប្រឆាំងនឹង​ផែនការ​កំណែទម្រង់​សោធន​និវត្តន៍​របស់​រដ្ឋាភិបាល​ដែល​ជួប​ការជំទាស់​យ៉ាង​ក្តៅគគុក​។ មនុស្ស​ប្រហែល ១ លាន​នាក់​បាន​ដើរ​ដង្ហែ​នៅ​ទីក្រុង​នានា​ជុំវិញ​ប្រទេស​បារាំង​នៅថ្ងៃនោះ​។​

​បុរស​អាយុ ២៦ ឆ្នាំ ដែល​ត្រូវបាន​កំណត់​អត្តសញ្ញាណ​នៅក្នុង​សារព័ត៌មាន​បារាំង​ថា​ជា​វិស្វករ បាន​និយាយថា​គាត់​ត្រូវបាន​វាយ​ដួល​ទៅ​នឹង​ដី​ដោយ​មន្ត្រីប៉ូលិស​ម្នាក់​ខណៈ​កំពុង​ថតរូប​ក្នុងអំឡុងពេល​ប្រ​​ឈមមុខ​ដាក់គ្នា​រវាង​បាតុករ​និង​ប៉ូលិស​។ មន្ត្រី​ម្នាក់​ទៀត​បាន​ឆក់​គាត់​នឹង​ដំបងឆក់ ហើយ​វាយ​លើ​ក្រលៀន​បុរស​នោះ​។​

​វីដេអូ​នៃ​ឧបទ្ទវហេតុ​នេះ​បាន​ផ្សព្វផ្សាយ​ពេញ​បណ្តាញ​សង្គម​និង​ទូរទស្សន៍​បារាំង​កាលពី​ចុង​សប្តាហ៍​។​

​មេប៉ូលីស​ក្រុងប៉ារីស លោក ឡូ​រ៉ង់ នូ​ណេ​ស (Laurent Nunez) បាន​បញ្ជា​ឱ្យ​មាន​ការស៊ើបអង្កេត​លើ​ឧបទ្ទវហេតុ​នេះ​ខណៈ​មាន​កំហឹង​កាន់តែខ្លាំង​ឡើង​លើ​អ្វី​ដែល​ហាក់ដូចជា​ករណី​ថ្មី​នៃ​អំពើ​​ហិង្សា​ដោយ​អ​ចេតនា​របស់​ប៉ូលីស​បារាំង ដែល​តែង​ល្បី​ប្រើ​ហិង្សា​។​

​កាសែត Liberation បានកំណត់​អត្តសញ្ញាណ​បុរស​រងរបួស​នោះ​ថា អ៊ី​វ៉ាន់ អេស (Ivan S.) ហើយ​បាន​និយាយថា រូបគេ​បាន​ប្រាប់​កាសែត​ថា​គាត់​នឹង​ប្តឹង​និង​ថា​«​ខ្ញុំ​មិនមែន​ជា​មនុស្ស​ដំបូង​​ទេ​ដែល​ទទួលរង​អំពើហិង្សា​ពី​សំណាក់​ប៉ូលីស​”៕

​ប៉ូលីស​ចាប់ទាញ​បាតុករ​ម្នាក់​ក្នុងអំឡុង​បាតុកម្ម​នៅ​ទីក្រុង​ប៉ារីស​កាលពី​ថ្ងៃ​ព្រហស្បតិ៍​ទី​១៩​មករា