​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ខ្មាន់កាំភ្លើង​អាយុ​៧២​ឆ្នាំ​ម្នាក់​បាន​សម្លាប់​ខ្លួន នៅ​ពេល​ប៉ូលិស​បម្រុង​ចូល​ចាប់​ខ្លួន​រូបគេ​កាលពី​ថ្ងៃអាទិត្យ​ទី​២២​មករា គឺ​ប្រហែល ១២​ម៉ោង​បន្ទាប់ពី​ជននេះ​បាន​​ធ្វើ​សកម្មភាព​សម្លាប់​រង្គាល​ក្នុង​ពិធី​បុណ្យចូលឆ្នាំ​ចិន​នៅ​ក្លិប​រាំ​មួយ​ដែល​បណ្តាល​ឱ្យ​មនុស្ស​១០​នាក់​ស្លាប់ និង​១០​នាក់​ផ្សេង​ទៀត​រងរបួស​។​

​ខ្មាន់កាំភ្លើង​បាន​ព្យាយាម​បើក​ការបាញ់ប្រហារ​មួយទៀត​នៅ​ក្លិប​ដាច់ដោយឡែក​មួយ នៅ​ត្រឹម​តែ​ប៉ុន្មាន​នាទី​បន្ទាប់​ពី​ការបាញ់​លើក​ទី​មួយ​កាលពី​យប់​ថ្ងៃ​សៅរ៍ ប៉ុន្តែ​អាជ្ញាធរ​បាន​និយាយថា​អ្នក​ឈរ​មើល​​ពីរ​នាក់​បាន​ដណ្តើមយក​អាវុធ​ពី​ដៃ​បុរស​នោះ មុន​ពេល​ការបាញ់ប្រហារ​មួយទៀត​បម្រុង​នឹង​កើតឡើង​។ បុរស​នោះ​បាន​រត់គេចខ្លួន​ពី​កន្លែងកើតហេតុ​។​

​លោក រ៉ូបឺត លូ​ណា (Robert Luna)​តម្រួត​តំបន់​ទីក្រុង​ឡូ​ស​អ៊ែន​ជើ​ឡេស បានកំណត់​អត្តសញ្ញាណ​ជនសង្ស័យ​ឈ្មោះ​ថា ហ៊ូ កាន់ ចាន់ (Huu Can Tran)​អាយុ​៧០​ប្លាយ​។​លោក​និយាយថា​ជន​នេះ​​បាន​ប្រើ​កាំភ្លើងខ្លី​បង់វែង​ដែល​មាន​សមត្ថភាព​ខ្ពស់​ដើម្បី​បាញ់​ទៅលើ​កន្លែង​រាំ​ដែល​ពេញនិយម​ជាមួយ​មនុស្ស​ចាស់​នៅ​ទីក្រុង​ម៉ុន​ធឺ​រ៉េ ផាក (Monterey Park) ស្ថិតនៅ​ចម្ងាយ​ប្រហែល ១១​គី​ឡូ​​ម៉ែត្រ​ពី​ភាគ​ខាងកើត​ទីក្រុង​ឡូ​ស​អ៊ែន​ជើ​ឡេស​។​

​ក្រុម​អ្នក​ស៊ើបអង្កេត​មិនទាន់​ដឹង​ពី​មូលហេតុ​បង្ក​នៅឡើយ​ទេ ប៉ុន្តែ​អំពើហិង្សា​ដោយ​កាំភ្លើង​បាន​កើតឡើង​ញឹកញាប់​នៅក្នុង​សហរដ្ឋ​អាម៉េរិក​។ លោក​លូ​ណា​មិន​បាន​កំណត់​អត្តសញ្ញាណ​ជនរងគ្រោះ​ណា​ម្នាក់​ទេ ប៉ុន្តែ​បាន​និយាយថា​បុរស​៥​នាក់​និង​ស្ត្រី​៥​នាក់​ទំនងជា​មាន​អាយុ ៥០ ឆ្នាំ ទៅ ៦០ ឆ្នាំ​ប្លាយ​។ ប៉ូលិស​បាន​និយាយថា កាំភ្លើង​ដែល​លោក​ចាន់​ប្រើ​ហាក់​ខុសច្បាប់​នៅក្នុង​រដ្ឋ​កាលីហ្វ័រ​ញ៉ាក​ន្លែ​ង​​ដែល​ច្បាប់​របស់​រដ្ឋ​បាន​ហាមប្រាម​បង់​កាំភ្លើង​ដែល​ផ្ទុក​លើស​ពី ១០ គ្រាប់​។​

​លោក​លូ​ណា​បាន​ប្រាប់​អ្នកយក​ព័ត៌មាន​ថា “​យើង​ចង់​ដឹង​ថា​តើ​រឿង​ដ៏​អាក្រក់​បែប​នេះ​អាច​កើតឡើង​បាន​ដោយ​របៀប​ណា​”៕

​ខ្មាន់កាំភ្លើង​ឈ្មោះ ហ៊ូ កាន់​ចាន់ បាន​សម្លាប់​ខ្លួន​កាលពី​ថ្ងៃអាទិត្យ​