​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ រុស្ស៊ី​មាន​ទាហាន​ស្លាប់​ឬ​របួស​ចំនួន ១៨០.០០០ នាក់​នៅក្នុង​ប្រទេស​អ៊ុយ​ក្រែន​រហូតមកទ​ល់​ពេលនេះ​ខណៈ​តួលេខ​សម្រាប់​អ៊ុយ​ក្រែន​គឺ​មាន​ចំនួន​អ្នក​ស្លាប់​និង​​របួស​ខាង​យោធា​ចំនួន ១០០.០០០ នាក់ និង​ជន​ស៊ីវិល​ចំនួន ៣០.០០០ នាក់ នេះ​បើ​យោង​តាម​ការប៉ាន់ស្មាន​ដែល​ចេញផ្សាយ​កាលពី​ថ្ងៃអាទិត្យ​ទី​២២​មករា​ដោយ​ប្រមុខ​យោធា​របស់ន័​រវែ​ស​។​

​ប្រមុខ​ការពារ​ជាតិន័​រវែ​សលោក អេ​រិក គ្រីស្តូហ្វើ​សិន (Eirik Kristoffersen) បាន​និយាយ​នៅក្នុង​បទសម្ភាសន៍​ជាមួយ​ទូរទស្សន៍ TV2​ដោយ​មិន​បញ្ជាក់ថា​តើ​ចំនួន​ទាំងនេះ​ត្រូវបាន​គណនា​​ដោយ​របៀប​ណា យ៉ាង​ដូច្នេះ​ថា “​ការបាត់បង់​របស់​រុស្ស៊ី​កំពុង​ចាប់ផ្តើម​ខិត​ជិត​ដល់​ចំនួន​ទាហាន​ស្លាប់​ឬ​របួស​ប្រហែល ១៨០.០០០ នាក់​”​។​

​ន័​រវែ​ស ដែល​ជា​ប្រទេស​ជាប់​ព្រំដែន​រុស្ស៊ី បាន​ក្លាយ​ជា​សមាជិករ​បស់​ណា​តូ ចាប់តាំងពី​ការបង្កើត​អង្គការ​នេះ​ឡើង​ក្នុង​ឆ្នាំ ១៩៤៩​។​

​ឧត្តមសេនីយ៍ន័​រវែស​រូបនេះ​បាន​និយាយថា “​ការបាត់បង់​របស់​អ៊ុយ​ក្រែន​ប្រហែលជា​មាន​អ្នកស្លាប់​ឬ​របួស ១០០.០០០ នាក់​។ ក្រៅពីនេះ អ៊ុយ​ក្រែន​មានជន​ស៊ីវិល​ប្រហែល ៣០.០០០​នាក់​ស្លាប់​នៅក្នុង​សង្គ្រាម​​ដ៏​អាក្រក់​នេះ​”​។​

​រដ្ឋាភិបាល​ក្រុង​មូ​ស្គូ​និង​គៀ​វ​មិន​បាន​ផ្តល់​គណនី​ដែល​អាច​ទុកចិត្ត​បាន​សម្រាប់​ការបាត់បង់​របស់​ពួក​គេ​អស់​ជា​ច្រើន​ខែ​មក​ហើយ​។​

​កាលពី​ខែ​វិច្ឆិកា នាយសេនាធិការ​រួម​នៃ​កងទ័ព​អាម៉េរិក លោក ម៉ាក មី​ល​លី (Mark Milley)​បាន​និយាយថា កងទ័ព​រុស្ស៊ី​បាន​ទទួល​រង​ការស្លាប់​ឬ​របួស​ជាង ១០០.០០០ នាក់​ខណៈ​ភាគី​អ៊ុ​យក្រែន​​ស្លាប់​ឬ​របួស​ក្នុង​ចំនួន​ប្រហាក់ប្រហែល​គ្នា​ផង​ដែរ​។​

​តួលេខ​ទាំងនេះ​មិន​អាច​ផ្ទៀងផ្ទាត់​ដោយ​ឯករាជ្យ​បានទេ​៕

​ទាហាន​អ៊ុយ​ក្រែន​បាញ់កាំភ្លើង​ធំ​ចល័ត Krab សំដៅ​ទីតាំង​របស់​រុស្ស៊ី