ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋមន្ត្រីការបរទេស​រុស្ស៊ី​លោក សឺ​ហ្គេ ឡាវ​រ៉ូវ បាន​អះអាង​ថា រដ្ឋាភិបាល​ទីក្រុង​មូ​ស្គូ​មានបំណង​ចរចា​ជាមួយ​អ៊ុ​យក្រែន​ដើម្បី​បញ្ចប់​សង្គ្រាម​នៅ​ប៉ុន្មាន​ខែ​ដំបូង​នៃ​ជម្លោះ តែ​អាម៉េរិក​និង​បណ្តា​ប្រទេស​លោកខាងលិចបាន​ប្រាប់​រដ្ឋាភិបាល​ទីក្រុង​គៀវ​អោយ​ប្រឆាំងនឹង​គំនិត​នេះ​។​

​ការអះអាង​របស់​ប្រមុខ​ការទូត​រុស្ស៊ី​ក្នុង​អំឡុងពេល​ទស្សនកិច្ច​មួយ​នៅ​អាហ្វ្រិក​ខាងត្បូង​ដូចគ្នា​នឹង​ការអះអាង​របស់​ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន កាលពី​ឆ្នាំមុន​ដែលថាប្រទេស​លោក​ត្រៀម​ពិភាក្សា តែ​សម្ពន្ធមិត្ត​លោកខាងលិច​របស់​អ៊ុយ​ក្រែន​រារាំង​មិន​អោយ​កិច្ច​ពិភាក្សា​កើតមាន​ឡើង​។​

​តែ​អាម៉េរិក​និង​សម្ពន្ធមិត្ត​ដទៃទៀត​របស់​អ៊ុយ​ក្រែន​បាន​និយាយថា រដ្ឋាភិបាល​ទីក្រុង​មូ​ស្គូ​មិន​ហ្មត់ចត់​អំពី​ការ​ចរចា​ដើម្បី​បញ្ចប់​សង្គ្រាម​ទេ​។​

​លោក​ឡាវ​រ៉ូវ បាន​និយាយថា​«​គេ​ដឹង​ជាទូទៅ​ថា យើង​គាំទ្រ​សំណើ​ភាគី​អ៊ុយ​ក្រែន​ដើម្បី​ចរចា​នៅ​ដើមដំបូ​ង​នៃ​ប្រតិបត្តិការ​យោធា​ពិសេស និង​ត្រឹម​ចុង​ខែ​មីនា គណៈប្រតិភូ​ទាំងពីរ​ប្រទេស​បាន​ព្រមព្រៀង​លើគោល​ការណ៍​ដោះស្រាយ​ជម្លោះ​នេះ​»​។​

«​គេ​ក៏​ដឹង​ជា​ទូទៅ​ថា អាម៉េរិក អង់គ្លេស​និង​សហសេវិក​អឺរ៉ុប​បាន​ប្រាប់​អ៊ុយ​ក្រែនថា វា​លឿន​ពេល​ក្នុង​ការសំរេច​កិច្ចព្រមព្រៀង​។​ការរៀបចំ​ដែល​ជិត​ព្រមព្រៀង​គ្នា​មួយ​ត្រូវ​បាន​របប​ដឹកនាំ​ទីក្រុង​គៀវ​កែប្រែ​»​។​

​រុស្ស៊ី​បាន​ច្រាន​ចោល​ការទាមទារ​រប​ស់អ៊ុយ​ក្រែ​ន​និង​លោក​ខាងលិច​ដែល​អោយ​រដ្ឋាភិបាល​ទីក្រុង​មូ​ស្គូ​ដក​ទាហាន​ទាំងអស់​ចេញពី​អ៊ុយ​ក្រែន​សំរា​ប់ជា​លក្ខខណ្ឌ​សំរាប់​ការចាប់ផ្តើម​ការ​ចរចា​។​ចំណែក​ប្រធានាធិបតី​អាម៉េរិក​លោកចូ បៃ​ដិន បានបង្ហាញ​សញ្ញា​ថា​លោក​នឹង​ពិភាក្សា​ជាមួយ​លោក​ពូ​ទីន​បើ​សិន​ជា​មេដឹកនាំ​រុស្ស៊ី​បង្ហាញថា​ខ្លួន​លោក​ចង់​បញ្ចប់​ការឈ្លានពាន​នេះ​មែនទែន​។​

​លោក​រដ្ឋមន្ត្រី​ឡាវ​រ៉ូវ បាន​ទៅ​កាន់​ទីក្រុង​ប្រេតូ​រី​យ៉ា​(Pretoria)​ដើម្បី​ជួប​ពិភាក្សា​ជាមួយ​សម​ភាគី​អាហ្វ្រិក​ខាងត្បូង ណា​ឡេឌី ប៉ានឌ័​រ​( Naledi Pandor )​នៅពេល​រុស្ស៊ី​ជំរុញ​ការពង្រឹង​ទំនាក់ទំនង​ជាមួយ​ប្រទេស​អភិវឌ្ឍន៍​ខ្លាំង​បំផុត​ប្រចាំ​អាហ្វ្រិក​មួយ​នេះ និង​ជា​សម្ពន្ធមិត្ត​ជា​ប្រវត្តិសាស្ត្រ​មួយ​របស់ខ្លួន​។​

​ទោះជា​អាហ្វ្រិក​ខាងត្បូង​អះអាង​អំពី​អព្យាក្រិតភាព​របស់ខ្លួ​ន​ចំពោះ​សង្គ្រាម​អ៊ុ​យក្រែន ក៏​ដំណើរ​ទស្សនកិច្ច​របស់​ឡាវ​រ៉ូវ​កើត​ឡើង​តែ​ប៉ុន្មាន​ថ្ងៃក្រោយ​ពី​កងកម្លាំង​អាហ្វ្រិក​ខាងត្បូង​បានប្រកាសថាខ្លួន​នឹង​ធ្វើ​សមយុទ្ធ​យោធា​រួម​ជាមួយ​កងទ័ពជើងទឹក​រុស្ស៊ី​និង​ចិន​នៅ​ឯនាយ​ឆ្នេរ​ខាងកើត​របស់ខ្លួន​នៅ​ខែ​ក្រោយ​៕

​រដ្ឋមន្ត្រីការបរទេស​រុស្ស៊ី​លោក សឺ​ហ្គេ ឡាវ​រ៉ូវ និង​សម​ភាគី​អាហ្វ្រិក​ខាងត្បូង​ណា​ឡេឌី ប៉ានឌ័​រ ក្នុងជំនួប​នៅ​ទីក្រុង​ប្រេតូ​រី​យ៉ា កាលពី​ថ្ងៃ​ចន្ទ​ទី​២៣​មករា​