​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉ូឡូញ​បាន​និយាយ​កាលពី​ថ្ងៃ​ចន្ទ​ទី​២៣​មករា​ថា ខ្លួន​មាន​ឆន្ទៈ​ក្នុង​ការបញ្ជូន​រថក្រោះ Leopard​ដែល​ផលិត​ដោយ​អាល្លឺម៉ង់​ទៅកាន់​អ៊ុយ​ក្រែន​ដោយ​គ្មាន​ការ​​យល់ព្រម ប៉ុន្តែ​ជា​ដំបូង​ត្រូវ​សុំ​ការអនុញ្ញាត​ពី​រដ្ឋាភិបាល​ទីក្រុង​ប៊ែរ​ឡាំង​ជាមុនសិន ខណៈ​រដ្ឋាភិបាល​ក្រុង​គៀវ​ជំរុញ​សម្ពន្ធមិត្ត​របស់​ខ្លួន​ឱ្យ​ប្រគល់​អាវុធ​ធុន​ធ្ងន់​។​

​បណ្តា​ប្រទេស​អឺរ៉ុប​បាន​យល់ព្រម​ចំណាយ ៥០០ លាន​អឺរ៉ូ (៥៤០ លាន​ដុល្លារ​) បន្ថែមទៀត​ដើម្បី​ផ្តល់​អាវុធ​ដល់​រដ្ឋាភិបាល​ក្រុង​គៀវ​នៅក្នុង​ការជំរុញ​ចុងក្រោយបង្អស់​ដែល​មាន​តម្លៃ​សរុប​រាប់​ពាន់​លាន​​ដុល្លារ​ដើម្បី​ជួយ​អ៊ុយ​ក្រែន​រុញច្រាន​កងកម្លាំង​រុស្ស៊ី​។​

​ទោះយ៉ាងណា ខណៈ​ប្រទេស​ជាច្រើន​បាន​សន្យា​ផ្តល់​គ្រឿង​សឹក​យោធា​ធន់​ធ្ងន់ រដ្ឋាភិបាល​ក្រុង​គៀវ​កំពុង​ទាមទារ​អាវុធ​ទំនើប​និង​ធុន​ធ្ងន់​ជាង​នេះ ជាពិសេស​រថក្រោះ Leopard ដ៏​មាន​ឥទ្ធិពល​ដែល​​គេ​មើលឃើញ​ថា​ជា​គន្លឹះ​ក្នុង​ការវាយលុក​តាម​ខ្សែត្រៀម​របស់​សត្រូវ​។​

​រដ្ឋាភិបាល​ក្រុង​ប៊ែរ​ឡាំង ដែល​ត្រូវ​ផ្តល់​ការអនុញ្ញាត​ដើម្បី​ឱ្យ​បញ្ជូន​រថក្រោះ​នេះ​ទៅ​កាន់​ប្រទេស​អ៊ុ​យក្រែន បាន​ទទួលរង​ការរិះគន់​ចំពោះ​ការ​ខកខាន​មិន​បាន​ធ្វើ​ការសម្រេចចិត្ត​ដ៏​មាន​សារៈសំខាន់​នេះ​។​

​បន្ទាប់​ពី​រង​សម្ពាធ​និង​ការជាប់គាំង​អស់​ជាច្រើន​ថ្ងៃ រដ្ឋមន្ត្រីការបរទេស​អាល្លឺម៉ង់ លោកស្រី អាន​ណា​ឡេ​ណា ប៊ែរ​បុក (Annalena Baerbock) កាលពី​ថ្ងៃអាទិត្យ​បាន​និយាយ​ថា​អាល្លឺម៉ង់​នឹង​​មិន​ឈរ​ពាំង​ផ្លូវ​នោះ​ទេ ប្រសិនបើ​រដ្ឋាភិបាល​ក្រុង​វ៉ា​សូវី​ស្នើសុំ​ឱ្យ​បញ្ជូន​រថក្រោះ Leopard ។​

​នាយករដ្ឋមន្ត្រី​ប៉ូឡូញ លោក ម៉ា​ទូ​ស ម៉ូ​រ៉ាវី​ក​គី (Mateusz Morawiecki) បាន​ប្រាប់​អ្នកសារព័ត៌មាន​កាលពី​ថ្ងៃ​ចន្ទ​ថា “​យើង​នឹង​សុំ​ការយល់ព្រម​នេះ​”​។​

​លោក​ម៉ូ​រ៉ាវី​ក​គី​បាន​និយាយថា “​ទោះបីជា​យើង​មិន​ទទួលបាន​ការយល់ព្រម​បែបនេះ​នៅ​ទីបញ្ចប់​ក៏ដោយ​ក៏​យើង​នឹង​នៅតែ​ផ្តល់​រថក្រោះ​របស់​យើង​ឱ្យទៅ​អ៊ុយ​ក្រែន​ឱ្យខាងតែបាន​នៅ​ក្នុងក្រុម​​សម្ពន្ធ​ប្រទេស​តូច​មួយ បើទោះបីជា​អាល្លឺម៉ង់​មិន​ស្ថិត​ក្នុង​ក្រុម​ចម្រុះ​នោះ​ក៏ដោយ​”​។​

​ក្រោយមក អ្នកនាំពាក្យ​រដ្ឋាភិបាល​ប៉ូឡូញ លោក ព័​រ មូលល័​រ (Piotr Muller) បាន​ប្រាប់​ទូរទស្សន៍​រដ្ឋ​ថា សំណើ​ផ្លូវការ​មួយ​គឺជា “​កាយវិការ​ដ៏​សំខាន់​ហើយ​យើង​ពិត​ណាស់​នឹង​អនុវត្ត​វា​​នៅ​ប៉ុន្មាន​ថ្ងៃ​ខាងមុខនេះ​”៕

​អ៊ុយ​ក្រែន​មើលឃើញ​រថក្រោះ Leopard របស់​អាល្លឺម៉ង់​ជា​គន្លឹះ​សំខាន់​ដើម្បី​បណ្តេញ​កងទ័ព​រុស្ស៊ី​