​ប្រែ​សម្រួលៈ​បំណង​(​បាងកក​ប៉ុស្តិ៍​)៖​រដ្ឋាភិបាល​វិមាន​ក្រឹម​ឡាំង​បាន​និយាយ​កាលពី​ថ្ងៃ​ចន្ទ​ថា ប្រជាជន​អ៊ុយ​ក្រែ​ននឹង​រងទុក្ខវេទនាកាន់តែខ្លាំង​បើសិនជា​លោក​ខាងលិច​បញ្ជូន​រថ​ក្រោះ​ប្រយុទ្ធ​ដើម្បី​គាំទ្រ​រដ្ឋាភិបាល​ទី​​ក្រុម​គៀវ ចំ​ពេល​សម្ពន្ធមិត្ត​អាល្លឺម៉ង់​កំពុង​ដាក់​សម្ពាធ​អោយ​អាល្លឺម៉ង់​បញ្ជូន​រថក្រោះ​Leopard​ឬ​អនុញ្ញាត​អោយ​សមាជិក​ក្នុង​អង្គការ​ណា​តូ​បញ្ជូន​រថក្រោះ​ផលិត​នៅ​អាល្លឺម៉ង់​នេះ​ទៅ​អោយ​កងកម្លាំង​​អ៊ុ​យក្រែន​។​

​ក្នុង​កិច្ចពិភាក្សា​កាលពី​សប្តាហ៍​មុន​នៅ​អាល្លឺម៉ង់ អាម៉េរិក​និង​សម្ពន្ធមិត្ត​របស់ខ្លួន​បាន​បរាជ័យ​ក្នុងការ​បញ្ចុះបញ្ចូល​អោយ​អាល្លឺម៉ង់​ផ្តល់​រថក្រោះ​ប្រភេទ​នេះ​ដល់​អ៊ុ​យក្រែន ដែល​វា​ជា​ការទាមទារ​សំខាន់​​មួយ​ពី​រដ្ឋាភិបាល​ទីក្រុង​គៀវ នៅ​ពេល​ខ្លួន​ប៉ុនប៉ង​វាយ​ដណ្តើម​ទឹកដី​បាត់បង់​ទៅ​រុស្ស៊ី​មកវិញ​។​

​រដ្ឋាភិបាល​ទីក្រុង​ប៊ែរ​ឡាំង​បាន​និយាយថា ខ្លួន​មិន​ប្រញាប់ប្រញាល់​អនុញ្ញាត​អោយ​សម្ពន្ធមិត្ត​បញ្ជូន​រថក្រោះ​Leopards​របស់​គេ​ផ្ទាល់​ទៅអោយ​អ៊ុយ​ក្រែនទេ ទោះជា​មាន​ការមូល​មតិ​គ្នា​លើ​ការបញ្ជូន​​រថក្រោះ​ប្រយុទ្ធ​នេះ​រួច​ហើយ​ក្តី​។​

​នៅពេល​ត្រូវ​បាន​សួរ​អំពី​បញ្ហា​នេះ​នៅ​សន្និសីទកាសែត​មួយ​កាលពី​ថ្ងៃ​ចន្ទ អ្នកនាំពាក្យ​លោក​ឌី​មី​ទ្រី ប៉េ​ស្កូវ បាន​និយា​យាយថា ការបែកបាក់​នៅ​អឺរ៉ុប​អំពី​ថា​ត្រូវ​បញ្ជូន​រថក្រោះ​អោយ​អ៊ុយ​ក្រែនឬ​អត់ បានបង្ហាញ​«​ការ​រអើល​កាន់តែខ្លាំង​ឡើង​នៅក្នុង​សម្ពន្ធភាព​ណា​តូ​។​តែ​ពិតណាស់ ប្រទេសចូលរួម​ទាំងអស់​នោះ​ទោះដោយផ្ទាល់​និង​ប្រយោលនៅក្នុង​ការបង្ហូរ​សព្វាវុធ​ចូល​អ៊ុយ​ក្រែ​ន​និង​បង្កើន​កំរិត​បច្ចេក​​វិទ្យា​របស់គេ នឹង​ទទួលខុសត្រូវ​ចំពោះ​ការបន្ត​ជម្លោះ​នេះ​»​។​

​លោក​បាន​បន្តថា​«​បញ្ហា​ធំ​គឺ​នៅ​ត្រង់​ថា ប្រជាជន​អ៊ុយ​ក្រែ​ននឹង​សង​នូវ​តំលៃ​ពី​ការគាំទ្រ​ដ៏​ឆ្គួត​ទាំងអស់នេះ​»​។​

​កាលពីដើម​ថ្ងៃ​ចន្ទ នាយករដ្ឋមន្ត្រី​ប៉ូឡូញ​បាន​និយាយថា ប្រទេស​លោក​អាច​បញ្ជូន​រថក្រោះ​Leopard​ទៅអោយ​អ៊ុ​យក្រែន ជា​ផ្នែក​នៃ​ប្រទេស​មួយ​ក្រុម​ដោយ​មិន​សុំ​ការអនុញ្ញាត​អី​អាល្លឺម៉ង់​ក្រោយ​​ពី​រដ្ឋមន្ត្រី​ការបរទេស​អាល្លឺម៉ង់​បាន​និយាយថា រដ្ឋាភិបាល​របស់​លោក​ស្រី​នឹងមិន​ជំទាស់ «​បើ​ប៉ូឡូញ​ចង់​បញ្ជូន​រថក្រោះ​ផលិត​នៅ​អាល្លឺម៉ង់​ដែល​កំពុង​ប្រើប្រាស់​ដោយ​កងកម្លាំង​ប៉ូឡូញ​ធុន​Leopard 2​ទៅកាន់​អ៊ុ​យក្រែន​»​។​

​សូមបញ្ជាក់​ថា អ៊ុយ​ក្រែន​បាន​និយាយថា ខ្លួន​ត្រូវការ​រថក្រោះ​រាប់រយ​គ្រឿង​ពី​សម្ពន្ធមិត្ត​លោកខាងលិច​ដើម្បី​ធ្វើការ​វាយបក​ប្រឆាំង​កងកម្លាំង​រុស្ស៊ី​ហើយ​ដណ្តើម​យក​ទឹកដី​ដែល​រុស្ស៊ី​កំពុង​កាន់កាប់​មកវិញ​។​

​នាយសេនាធិការ​របស់​ប្រធានាធិបតី​អ៊ុយ​ក្រែន​បាន​និយាយ​កាលពី​ថ្ងៃ​ចន្ទ​ថា​«​យើង​ត្រូវការ​រថក្រោះមិនមែន​១០-២០​គ្រឿង​ទេ តែ​ជា​ច្រើន​រយ​គ្រឿង​។​គោលដៅ​របស់​យើង​គឺ​ស្តារ​ព្រំដែន​ឆ្នាំ​១៩៩១​ឡើង​​វិញ​និង​ដាក់ទោស​សត្រូវ ដែល​នឹង​សង​នូវ​តំលៃ​ចំពោះ​ឧក្រិដ្ឋកម្ម​របស់​គេ​»៕

​រថក្រោះ​Leopard​ផលិត​នៅ​អាល្លឺម៉ង់​