​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប៉ូលីស​រដ្ឋ​កាលីហ្វ័​រញ៉ាបាន​និយាយថា ជនរងគ្រោះ​ទី ១១ បាន​ស្លាប់​ដោយសារ​របួស​កាលពី​ថ្ងៃ​ចន្ទ​ទី​២៣​មករា​បន្ទាប់ពី​ការវាយប្រហារ​ដ៏​សាហាវ​របស់​​ខ្មាន់កាំភ្លើង​វ័យ​ចំណាស់​ម្នាក់​នៅ​ឯ​សាល​រាំ​ក្នុង​តំបន់​ទីក្រុង​ឡូ​ស​អ៊ែន​ជើ​ឡេស ខណៈ​អាជ្ញាធរ​នៅតែ​កំពុង​ស្វែងរក​មូលហេតុ​នៅ​ពីក្រោយ​ការបាញ់ប្រហារ​ដ៏​អាក្រក់​បំផុត​មួយ​របស់​រដ្ឋ​នេះ​។​

​ប៉ូលីស​បានកំណត់​អត្តសញ្ញាណ​ខ្មាន់កាំភ្លើង​នោះ​ឈ្មោះ ហ៊ូ កាន់ ចាន់ (Huu Can Tran)​អាយុ ៧២ ឆ្នាំ​។​

​លោក រ៉ូបឺត លូ​ណា (Robert Luna)​មេបញ្ជាការ​តំបន់​ទីក្រុង​ឡូ​ស​អ៊ែន​ជើ​ឡេស បាន​និយាយ​កាលពី​ថ្ងៃអាទិត្យ​ថា “​អ្វី​គ្រប់​យ៉ាង​គឺ​នៅ​លើ​តុ​” ទាក់ទង​នឹង​ហេតុផល​សម្រាប់​ការបាញ់ប្រហារ​នេះ​។​

​លោក​តម្រួត​លូ​ណា​បាន​ប្រាប់​អ្នកសារព័ត៌មាន​ថា “​យើង​មិនដឹង​ថា​តើ​នេះ​ជា​ឧក្រិដ្ឋកម្ម​សម្អប់​ដែល​កំណត់​ដោយ​ច្បាប់​ឬ​យ៉ាងណា​ទេ​។ ប៉ុន្តែ​តើ​អ្នកណា​ដើរ​ចូល​ក្នុង​សាល​រាំ​ហើយ​បាញ់​សម្លាប់​មនុស្ស​២០​នាក់​?”​។​

​ក្រុមមន្ត្រី​បាន​ធ្វើការ​រហូត​ដល់​ថ្ងៃ​ចន្ទ​ដើម្បី​ព្យាយាម​កំណត់​អត្តសញ្ញាណ​មនុស្ស ១១ នាក់​ដែល​លោក​ចាន់​បាន​សម្លាប់​នៅ​ឯ​បារ Star Ballroom Dance Studio ក្នុង​ទីក្រុង​ម៉ុន​ធឺ​រ៉េ ផាក (Monterey Park) ស្ថិតនៅ​ចម្ងាយ​ប្រហែល ១១ គីឡូម៉ែត្រ​ពី​ភាគ​ខាងកើត​ទីក្រុង​ឡូ​ស​អ៊ែន​ជើ​ឡេស​។​

​ភាព​កម្រោលចូល​របស់​លោក​ចាន់​អាច​កាន់តែ​អាក្រក់​ទៅៗ​។ ប្រហែល ២០ នាទី​បន្ទាប់ពី​ការបាញ់ប្រហារ​នៅ​ទីក្រុង​ម៉ុន​ធឺ​រ៉េ​ផាក លោក​ចាន់​បាន​ចូល​ទៅក្នុង​ក្លិប​រាំ Lai Lai Ballroom & Studio ក្នុង​ទីក្រុង​អាល់​ហាម​ប្រា (Alhambra) នៅ​ជិត​នោះ​។​

​នៅ​ទីនោះ លោក ប្រ៊ែន​ដុន សាយ (Brandon Tsay) ជា​អ្នកសរសេ​រសូវ​ហ្វែ អាយុ ២៦ ឆ្នាំ ដែល​ជួយ​គ្រួសារ​របស់គាត់​បើក​ក្លិប​រាំ​នេះ បាន​ដណ្តើមយក​កាំភ្លើងខ្លី​ពាក់កណ្តាល​ស្វ័យប្រវត្តិ​ពី​លោក​ចាន់​។​

​លោក​សាយ​បាន​ប្រាប់​កាសែត New York Times ថា “​ពេលនោះ វា​ជា​អារម្មណ៍​ដឹង​រឿង​មិន​ល្អ​ជាមុន​”​។​

​ប្រហែល ១២ ម៉ោង​ក្រោយមក មន្ត្រីប៉ូលិស​នៅ​ទីក្រុងថ័​ររ៉ា​ន់ (Torrance) ស្ថិតនៅ​ចម្ងាយ ៣២ គីឡូម៉ែត្រ​ពី​ភាគ​និរតី​ទីក្រុង​ម៉ុន​ធឺ​រ៉េ​ផា​កបាន​ចូល​ទៅ​កៀក​រថយន្ត​ដឹក​ទំនិញ​ពណ៌​ស​ដែល​លោក​ចាន់​​កំពុង​បើកបរ​។ ខណៈ​មន្ត្រី​ទៅ​ជិត​ដល់​រថយន្ត​នោះ គេ​បាន​ឮ​សំឡេង​កាំភ្លើង​មួយ​គ្រាប់​ពី​ខាងក្នុង​ខណៈ​លោក​ចាន់​បាន​សម្លាប់​ខ្លួន​។​

​តម្រួត​លូ​ណា​មិន​បាន​កំណត់​អត្តសញ្ញាណ​ជនរងគ្រោះ​ណា​ម្នាក់​ទេ ប៉ុន្តែ​និយាយថា បុរស​៥​នាក់​និង​ស្ត្រី​ទាំង​៥​នាក់​នោះ​ទំនងជា​មាន​អាយុ​ចាប់ពី ៥០ ឆ្នាំ ទៅ ៦០ ឆ្នាំ​ឡើង​ទៅ​៕

​ប៉ូលីស​នៅ​ជិត​កន្លែង​កើត​ហេតុ​នៃ​ការបាញ់ប្រហារ​ដ៏​ធំ​នៅក្នុង​ទីក្រុង​ម៉ុន​ធឺ​រ៉េ​ផាក រដ្ឋ​កាលីហ្វ័​រញ៉ា​កាលពី​ថ្ងៃទី​២២ ខែ​មករា ឆ្នាំ​២០២៣