​ប្រែ​សម្រួលៈ​បំណង​(​ដេល្លី​ម៉េល​)៖ ពួក​មន្ត្រី​បាន​និយាយថា មនុស្ស​ប្រាំពីរ​នាក់​ត្រូវបាន​សម្លាប់​នៅក្នុង​ការបាញ់ប្រហារ​ពីរ​ផ្សេង​គ្នា​កាលពី​រសៀល​ថ្ងៃ​ចន្ទ​នៅ​កសិដ្ឋាន​ដាំ​ផ្សិត​មួយ​និងនៅ​ក្រុមហ៊ុន​ដឹកជញ្ជូន​​មួយ​នៅក្នុង​សហគមន៍​ឆ្នេរសមុទ្រ​មួយ​នៅ​ខាងត្បូង​ទីក្រុង​សាន់ ហ្វ្រា​ន​ស៊ី​ស្កូ ក្នុង​រដ្ឋ​កាលីហ្វ័​រញ៉ា ហើយ​ជនសង្ស័យ​ម្នាក់​ត្រូវបាន​ចាប់ខ្លួន​។​

​មន្ត្រី​ខណ្ឌ​សាន់ ម៉ាតេ​អូ លោ​កដេវ ផា​ញ​(Dave Pine)​បាន​និយាយថា មនុស្ស​បួន​នាក់​ត្រូវបាន​សម្លាប់​នៅ​កសិដ្ឋាន​ដាំ​ផ្សិត​និង​បី​នាក់​នៅ​ក្រុមហ៊ុន​ដឹកជញ្ជូន​នៅ​ជាយក្រុង​ហា​ហ្វ មូនបេ​( Half Moon Bay)​ចម្ងាយ​ប្រមាណ​៤៨​គីឡូម៉ែត្រ​ខាងត្បូង​ក្រុង​សាន់ ហ្វ្រា​ន​ស៊ី​ស្កូ​។​

​លោក​ផា​ញ​បាន​និយាយថា ប៉ូលីស​បាន​ចាប់ខ្លួន​ជនសង្ស័យ​វ័យ​៦៧​ឆ្នាំ​ឈ្មោះ ឈុនលី ចា​វ​(Chunli Zhao)​ពាក់ព័ន្ធ​នឹង​ការបាញ់ប្រហារ​នេះ​។​«​ជនសង្ស័យ​ធ្វើការ​នៅ​ក្រុមហ៊ុន​ដឹកជញ្ជូន »​។​

វាជា​ការបាញ់ប្រហារ​សម្លាប់​មនុស្ស​ច្រើនៗ​លើក​ទី​ប្រាំមួយ​នៅ​ឆ្នាំ​២០២៣​នេះ ក្រោយ​ការបាញ់​សម្លាប់​មនុស្ស​១១​នាក់​កាលពី​យប់​ថ្ងៃ​សៅរ៍ នៅ​ក្លិប​រាំ​មួយ​កាលីហ្វ័​រញ៉ា​ខាងត្បូង​ចំពេល​ប្រជា​​ជន​ចិន​និង​កាត់​ចិន​អបអរ​ការ​ចូល​ឆ្នាំ​ថ្មី​។​

​ការិយាល័យ​តម្រួត​ខណ្ឌ​សាន់ ម៉ាតេ​អូ បាន​ទទួល​របាយការណ៍​អំពី​ការបាញ់ប្រហារទី​មួយ​នៅ​ម៉ោង​២​កន្លះ​រសៀល​និង​បាន​រក​ឃើញ​មនុស្ស​បួន​នាក់​ស្លាប់​ពី​ការ​ត្រូវ​គ្រាប់កាំភ្លើង និង​ជន​ទី​ប្រាំ​រងរបួស​នៅ​កន្លែ​​ង​កើតហេតុ​។​ក្រោយ​នោះ​បន្តិច តម្រួត​ក៏​បាន​រកឃើញ​មនុស្ស​បី​នាក់​ទៀត​ស្លាប់​ដោយ​គ្រាប់កាំភ្លើង​នៅ​ទីតាំង​ទី​ពីរ​ចម្ងាយ​ប្រមាណ​៨​គីឡូម៉ែត្រ​ពី​គ្នា​។​

​តម្រួត​បិទ​ខ្ទប់​តំបន់​កើតហេតុ​កាលពី​ថ្ងៃ​ចន្ទ​ទី​២៣​មករា​និង​ព្យាយាម​ប្រមូល​ភស្តុតាង​

​នៅ​ពីរ​ម៉ោង​ក្រោយ​ទទួលដំណឹង​អំពី​ការបាញ់ប្រហារ តម្រួត​បាន​រកឃើញ​ជ​ន​សង្ស័យ ចា​វ និង​អាវុធ​នៅក្នុង​រថយន្ត​របស់​គាត់​។​ជនសង្ស័យ​ត្រូវបាន​នាំ​ខ្លួន​ចូល​កន្លែង​ឃុំឃាំង​និង​ត្រូវ​គេ​ជឿ​ថា​បុរស​នេះ​ប្រ​​ព្រឹត្ត​បទល្មើស​តែឯង​។​

​ការិយាល័យ​តម្រួត​មិន​បាន​បញ្ជាក់​ថា​តើ​ហេតុការណ៍​បា​ញ់សម្លាប់​ពី​រនេះ​ជាប់​ពាក់ព័ន្ធ​គ្នា​ដែរ​ឬ​អត់ និង​ហេតុផល​នៅ​ពីក្រោយ​ការបាញ់ប្រហា​រក៏គេ​នៅ​មិនទាន់​ដឹង​ដែរ​។​

​ហា​ហ្វ មូនបេ ជា​ទីក្រុង​ឆ្នេរ​តូច​មួយ​ដែល​មាន​ប្រភព​កសិកម្ម​និង​ឥឡូវ​មាន​មនុស្ស​ប្រមាណ​១២.០០០​នាក់​រស់នៅ​។​ទីក្រុង​នេះ​និង​តំបន់​ខណ្ឌ​សាន់ ម៉ាតេ​អូនៅ​ជុំវិញ​ល្បី​ខាង​ដាំ​ផ្កា​ព្រមទាំង​បន្លែ និង​មាន​ដាំ​​កញ្ឆា​ខ្លះ​ផង​។​មនុស្ស​រស់​នៅ​តំបន់​នេះ​ភាគច្រើន​ជា​ជនជាតិ​ស្បែក​ស និង​ជនជាតិ​អាស៊ី​ត្រឹមតែ​ប្រាំ​ភាគរយ​ប៉ុណ្ណោះ​៕