ប្រែ​សម្រួល : កញ្ញា​ដា​លី​ស (​ហ្គា​ឌា​ន​) ៖ តើ Leopard 2 ជា​អ្វី​?

Leopard 2 គឺជា​រថក្រោះ​ប្រយុទ្ធ​ដ៏​សំខាន់​ដែល​ផលិត​ដោយ​អាល្លឺម៉ង់ ដែល​មាន​ចម្ងាយ​បើកបរ​ប្រហែល ៥០០ គីឡូម៉ែត្រ​។ វា​បាន​ដាក់​ឱ្យ​ប្រើ​ជា​លើកដំបូង​ក្នុង​ឆ្នាំ ១៩៧៩ ហើយ​មាន​ល្បឿន​អតិបរមា ៦៨ គីឡូម៉ែត្រ​ក្នុង​មួយ​ម៉ោង​។ បំពាក់​ដោយ​កាណុង ១២០ មិល្លីម៉ែត្រ​ជា​អាវុធ​សំខាន់​របស់​វា វា​ក៏​ត្រូវបាន​បំពាក់​ដោយ​កាំភ្លើងយន្ត​ធុន​ស្រាល​ចំនួន​ពីរ​ផងដែរ​។​

​ក្រៅ​ពី​ប្រើប្រាស់​ដោយ​យោធា​អាល្លឺម៉ង់ រថក្រោះ Leopard 2​ក៏​បាន​បម្រើ​សេវាកម្ម​យ៉ាង​ទូលំទូលាយ​នៅក្នុង​ទ្វីប​អឺរ៉ុប​ដែរ​ដោយ​មាន​ប្រទេស​ជាង​១០​ប្រើប្រាស់​រថក្រោះ​នេះ​ក៏​ដូចជា​ប្រទេស​នៅ​ទ្វីប​ដទៃ​​មួយចំនួន​ទៀត​ដែរ រួម​ទាំង​កាណាដា​។ រថក្រោះ​នេះ​ត្រូវបាន​ដាក់ពង្រាយ​នៅ​កូ​សូ​វ៉ូ បូ​ស្ន៊ី អា​ហ្វ​ហ្គានី​ស្ថាន និង​ស៊ី​រី (​ដោយ​តួ​ក​គី​) ជា​កន្លែង​ដែល​រថក្រោះ​នេះ​មួយ​ចំនួន​ត្រូវបាន​បាត់បង់​ដោយសារ​មី​ស៊ី​ល​ប្រឆាំង​រថក្រោះ​។​

​ហេតុអ្វី​បានជា​អ៊ុយ​ក្រែន​ចង់បាន​ពួកវា​?

​អ៊ុយ​ក្រែន​បាន​និយាយថា ខ្លួន​មាន​តម្រូវការ​ជាបន្ទាន់​សម្រាប់​គ្រឿង​សឹក​ធុន​ធ្ងន់​ក្នុង​សង្គ្រាម​ប្រឆាំង​ការឈ្លានពាន​របស់​រុស្ស៊ី​។ រដ្ឋាភិបាល​ក្រុង​គៀវ​មាន​រថក្រោះ​ដែល​អាច​រកបាន​នៅមានកម្រិត ដែល​ភាគច្រើន​មាន​ប្រភព​ពី​សម័យ​សូ​វៀត​ឬ​ក្រោយ​សម័យ​សូ​វៀត​។​

​ដោយ​អះអាង​ឡើងវិញ​នូវ​ជំនឿ​របស់​ខ្លួន​ថា រដ្ឋាភិបាល​ក្រុង​មូ​ស្គូ​មានបំណង​បើ​កការវាយលុក​ថ្មី​ដ៏​សំខាន់​នៅក្នុង​ប៉ុន្មាន​ខែ​ខាងមុខ រដ្ឋាភិបាល​ក្រុង​គៀវ​និង​សម្ពន្ធមិត្ត​ជាច្រើន​ជឿ​ថា​សង្គ្រាម​នឹង​បញ្ចប់​​កាន់តែ​លឿន ប្រសិនបើ​រុស្ស៊ី​ចាញ់​នៅលើ​សមរភូមិ​ក្នុងការ​វាយបក​របស់​អ៊ុ​យក្រែន ដើម្បី​ដណ្តើម​មកវិញ​នូវ​ទឹកដី​កាន់កាប់​ដោយ​រុស្ស៊ី​។​

​ខណៈ​អ៊ុយ​ក្រែន​បាន​ទទួល​ជ័យជម្នះ​យ៉ាង​សំខាន់​នៅក្នុង​សមរភូមិ​សម្រាប់​ទីក្រុង​គៀវ​នៅ​ដើម​សង្គ្រាម​ក៏​ដូចជា​នៅ​តំបន់​ខា​គី​វ​និង​ជុំវិញ​ទីក្រុង​ឃើ​សុន​នៅ​ភាគខាងត្បូង អ៊ុយ​ក្រែន​ឥឡូវ​ត្រូវ​បាន​រារាំង​​ដោយ​កង្វះ​រថក្រោះ​ដើម្បី​គាំទ្រ​ប្រតិបត្តិការ​របស់​ខ្លួន​និង​ប្រឈមមុខ​នឹង​កងកម្លាំង​រុស្ស៊ី ដែល​កាន់តែ​ខ្លាំង​ឡើង​ដោយសារតែ​មាន​រថក្រោះ T-90 ដែល​កាន់តែ​ទំនើប​និង​មាន​សមត្ថភាព​ខ្ពស់​។​

​ការ​អាច​រក​បាន​យ៉ាង​ទូលំទូលាយ​នៃ​រថក្រោះ Leopard 2 រួម​ទាំង​នៅក្នុង​ប្រទេស​ប៉ូឡូញ​ជិតខាង​ដែល​ចង់​ផ្គត់ផ្គង់​ពួកវា​ទៅ​អ៊ុ​យក្រែន បាន​ធ្វើឱ្យ​ពួក​វា​ស័ក្តិសម​បំផុត​សម្រាប់​រដ្ឋាភិបាល​ក្រុង​គៀវ​។​

​អ៊ុយ​ក្រែន​បាន​ស្នើសុំ​រថក្រោះ ៣០០ គ្រឿង ខណៈ​អ្នកវិភាគ​លោកខាងលិច​លើកឡើងថា រថក្រោះ​តែ ១០០ គ្រឿង​នឹង​អាច​ផ្លាស់ប្តូរ​តុល្យភាព​សង្គ្រាម​នេះ​បាន​ហើយ​។​

​ដូច្នេះ​តើ​មាន​បញ្ហា​អ្វី​កើតឡើង​?

​ដោយសារ​រថក្រោះ​នេះ​ត្រូវបាន​ផ្គត់ផ្គង់​ឱ្យ​ទៅ​បណ្តា​ប្រទេស​នានា​ដែល​ស្ថិតក្រោម​អាជ្ញាប័ណ្ណ​នាំចេញ អាល្លឺម៉ង់​អាច​វេតូ​ការនាំចេញ​ឡើង​វិញ​ទោះបីជា​ប៉ូឡូញ​បានលើកឡើង​កាលពី​ថ្ងៃ​ព្រហស្បតិ៍​ថា​ខ្លួន​​អាច​មិន​អើពើ​នឹង​អាល្លឺម៉ង់ ហើយ​នាំ​ចេញ​រថក្រោះ Leopard 2​របស់​ខ្លួន​ឱ្យ​ខាងតែបាន​។​

​ជំហរ​ផ្ទាល់​របស់​អាល្លឺម៉ង់​គឺ​មាន​ភាព​ប្រទាំង​ប្រទើស​។ អាល្លឺម៉ង់​ចង់បាន​វិធីសាស្ត្រ​ពហុភាគី​លើ​ការផ្គត់ផ្គង់​អាវុធ​ដល់​អ៊ុ​យក្រែន ជាជាង​ឱ្យគេ​មើលឃើញ​ថា​ខ្លួន​កំពុង​ធ្វើ​ចំណាត់ការ​ដោយ​ឯកតោ​ភាគី​។​

​ទោះបីជា​អាល្លឺម៉ង់​បាន​ផ្គត់ផ្គង់​បរិក្ខារ​ជាច្រើន​ដល់​អ៊ុ​យក្រែន រួម​ទាំង​រថពាសដែក​ធុន​ស្រាល​ក៏ដោយ​ក៏​ប្រទេស​នេះ​នៅ​កំពុង​ជំពាក់​វា​ក់វិន​ជាមួយនឹង​ប្រពៃណី​ប្រឆាំង​របប​យោធានិយម​ក្រោយ​សង្គ្រាម​​លោក​លើក​ទី​ពីរ​ផង​ដែរ​។ ការផ្គត់ផ្គង់​រថក្រោះ​ប្រយុទ្ធ​សំខាន់ៗ​ត្រូវបាន​គេ​មើលឃើញ​ថា​មាន​បញ្ហា ដោយសារ​តែ​សមត្ថភាព​វាយលុក​សាហាវ​របស់​ពួកវា​។​

​អាល្លឺម៉ង់​បាន​ព្យាយាម​ភ្ជាប់​ការផ្គត់ផ្គង់​រថក្រោះ Leopard ទៅ​នឹង​សម្ពន្ធភាព​ដ៏​ធំ​ទូលាយ​មួយ ដែល​នឹង​ផ្គត់ផ្គង់​រថក្រោះ​ផ្សេងទៀត​ដែរ រួម​ទាំង​រថក្រោះ​របស់​អាម៉េរិក Abram​ជា​រថក្រោះ​ដែល​អ្នក​​ជំនាញ​ចាត់ទុកថា​មិន​សម​សម្រាប់​សង្គ្រាម​នៅ​អ៊ុ​យក្រែន ដោយសារ​ការ​ស៊ី​ប្រេង​ឥន្ធនៈ​ច្រើន​របស់​វា​។​

​តើ​អ្វី​ជា​អំណះអំណាង​ប្រឆាំង​នឹង​ការផ្គត់ផ្គង់​រថក្រោះ​នេះ​?

​អ្នកប្រឆាំង​ជឿថា​ការផ្គត់ផ្គង់​រថក្រោះ​នឹង​ក្លាយ​ជា​ការកើនឡើង​នៃ​ការចូលរួម​របស់​ប្រទេស​ណា​តូ​ក្នុង​សង្គ្រាម ដោយ​បង្កើន​ហានិភ័យ​នៃ​ការរីក​រាលដាល​នៃ​សង្គ្រាម​។ អ៊ុយ​ក្រែន​បាន​និយាយថា​ខ្លួន​នឹង​​ប្រើប្រាស់​រថក្រោះ​នេះ​តែ​នៅក្នុង​ព្រំដែន​ដែល​ទទួលស្គាល់​ជា​អន្តរជាតិ​របស់​ខ្លួន​ប៉ុណ្ណោះ ខណៈ​អ្នកគាំទ្រ​បាន​និយាយថា វា​ជា​រដ្ឋាភិបាល​ក្រុង​មូ​ស្គូ​ទេ ដែល​បាន​បន្ត​បង្កើន​ជម្លោះ​ដោយ​កេណ្ឌ​កងទ័ព​បន្ថែម​​ទៀត ដាក់​គោលដៅ​វាយប្រហារ​លើ​ហេដ្ឋារចនាសម្ពន្ធ​ស៊ីវិ​ល និង​គំរាម​វាយប្រហារ​នុយក្លេអ៊ែរ​៕

​អ៊ុយ​ក្រែន​ត្រូវការ​រថក្រោះ ៣០០ គ្រឿង ជាពិសេស រថក្រោះ Leopard 2 ដើម្បី​បណ្តេញ​កងទ័ព​រុស្ស៊ី