​ប្រែ​សម្រួលៈ​បំណង​(​ដេល្លី​ម៉េល​)៖​ប៉ូលីស​ថៃ​រឹបអូស​បាន​ថ្នាំញៀន​មេតំ​ហ្វេ​តា​មីន​ក្រាម​(​ម៉ា​ទឹកកក​)​ចំនួន​១,១​តោន​នៅក្នុង​រយៈពេល​មិន​ដល់​មួយ​សប្តាហ៍ នេះ​បើ​តាម​ការ​បញ្ជាក់ប្រាប់​ពី​មន្ត្រី​ថៃ​កាលពី​ថ្ងៃ​​អង្គារ នៅពេល​ព្រះរាជាណាចក្រ​នេះ​បន្ត​បង្ក្រាប​ការ​លួច​នាំ​ចូល​និង​ការជួញដូរ​ថ្នាំញៀន​ដែល​បាន​កើន​ឡើង​ក្រោយ​ពី​បើក​ព្រំដែន​ប្រទេស​ឡើងវិញ​។​

​ការ​រឹបអូស​បាន​ថ្នាំញៀន​ដ៏​ច្រើន​នេះ​កើត​ឡើង​បន្ទាប់ពី​មានការ​ប៉ះទង្គិច​គ្នា​រវាង​ប៉ូលីស​ថៃ​និង​ពួក​លួច​ដឹក​ជញ្ជូន​​ចូល​ថ្នាំញៀន​នៅ​តំបន់​ព្រៃ​ភ្នំ​ភាគ​ខាងជើង​ប្រទេស ដែល​ជា​ប្រភព​ថ្នាំញៀន​ខុស​​ច្បាប់​ជា​យូរ​មកហើយ​។​

​ក្រោយ​ទទួលបាន​ព័ត៌មាន​អោយការណ៍​ដោយ​សម្ងាត់ ប៉ូលីស​បាន​ចាប់ខ្លួន​ជនជាតិ​ថៃ​ដប់​នាក់​ក្នុងការ​ឆ្មក់​ចាប់​ជា​បន្តបន្ទាប់​នៅ​ភាគ​ខាងជើង​និង​ខាងត្បូង​ប្រទេស​។​

​មេ​រង​ប៉ូលីស​ជាតិ​ថៃ​លោក​ឧត្តមសេនីយ៍ ជីន​ណា​ផាត សា​រ៉ា​ស៊ីន​(Chinnapat Sarasin)​បាន​និយាយថា​« ថ្នាំញៀន​ទាំង​នេះ​ខ្លះ ត្រូវបាន​រក្សា​ទុក​មួយ​រយៈពេល​មុន​ត្រូវ​បាន​នាំ​មក​កាន់​បណ្តា​ខេត្ត​​ចុង​ខាងត្បូង និង​ពួក​វា​ទំនងជា​ត្រូវ​នាំ​ទៅកាន់​ប្រទេស​ផ្សេងទៀត​នៅ​ពេល​បន្ទាប់​»​។​

​លោក​បាន​បន្តថា​«​ថៃ​ត្រូវ​ឡោម​ព័ទ្ធ​ដោយ​ទីតាំង​ផលិត​ថ្នាំញៀន​សំខាន់ៗ​» តែ​ការផ្ទុះ​ជំងឺ​ឆ្លងកូវី​ដ​១៩​នា​ពេល​កន្លង​មក​បា​រារាំង​មិនអោយ​ពួក​លួច​ដឹកជញ្ជូន​ថ្នាំញៀន​នាំ​ទំនិញ​របស់​ពួកគេ​ចេញ​បាន​។​«​ឥឡូវ ប្រទេស​ថៃ​បាន​បើក​ព្រំដែន​ឡើងវិញ ថ្នាំញៀន​ដែល​កកស្ទះ​ក៏​សំរុក​បញ្ជូន​ចេញ​គ្មាន​ឈប់​»​។​

​ប៉ូលីស​ថៃ​បា​និយាយ​នៅក្នុង​សេចក្តីថ្លែងការណ៍​មួយ​ថា ក្រុម​ឈ្មួញ​ថ្នាំញៀន​មួយ​ស្ថិត​នៅ​ពីក្រោយ​សកម្មភាព​និង​ជំនួញ​ខុសច្បាប់​នេះ​។​

​នៅក្នុង​ប្រតិបត្តិការ​បង្ក្រាប​ទីមួយ សមត្ថកិច្ច​បាន​រកឃើញ​ថ្នាំញៀន​៧៣១​គីឡូក្រាម ជា​ប្រភេទ​ថ្នាំញៀន​ម៉ា​ទឹកកក ក្នុងការ​ឆ្មក់​ចូល​បង្ក្រាប​ពី​កន្លែង​មួយ​នៅ​ខេត្ត ផា​ថា​លុង​( Phatthalung)​និង​មួយ​​ទៀត​នៅ​ខេត្ត​ស៊ូរ៉ាតថានី ( Surat Thani)​ដែល​សុទ្ធតែ​នៅ​ភាគខាងត្បូង​។​

​ក្រោយ​ទទួលបាន​ព័ត៌មាន​សម្ងាត់ មន្ត្រី​បាន​ចាប់ខ្លួន​បុរស​បី​នាក់​កាលពី​ថ្ងៃ​ព្រហស្បតិ៍​សប្តាហ៍​មុន​ក្រោយ​ការ​រក​ឃើញ​ថ្នាំញៀន​៦៨៨​គីឡូក្រាម​នៅក្នុង​រថយន្ត​បី​គ្រឿង​។​ប៉ូលីស​បន្ទាប់មក បាន​ចាប់ខ្លួន​ម​នុ​​ស្ស​បួន​នាក់​ទៀត​ជាមួយនឹង​ថ្នាំញៀន​៤៣​គីឡូក្រាម​។​

​កាលពី​ថ្ងៃអាទិត្យ បុរស​ម្នាក់​ក៏​ត្រូវបាន​ចាប់ខ្លួន​នៅ​ក្នុង​ខេត្ត​ឈៀង​រ៉ៃ​(Chiang Rai)​ក្នុងពេល​ជននេះ​ត្រៀម​នាំ​ថ្នាំញៀន​៣០០​គីឡូក្រាម​ទៅកាន់​ខេត្ត​សាធូន​(Satun)​នៅ​ភាគខាងត្បូង​ថៃ​។​ថ្នាំញៀន​១១៤​គីឡូក្រាម​ទៀត​ក៏​ត្រូវ​បាន​រឹបអូស​នៅ​ខេត្ត​ណា​ខន សា​វ៉ាន​(Nakhon Sawan)​និង​ផា​ធូ​ម ថា​នី​(Patum Thani)​ភាគក​ណ្តា​ល​៕

​ប៉ូលីស​ថៃ​បង្ហាញ​ថ្នាំញៀន​សរុប​១.១០០​គីឡូក្រាម​ដែល​រឹបអូស​បាន​ជា​ច្រើន​ខេត្ត​ក្នុង​រយៈពេល​មិន​ដល់​មួយ​សប្តាហ៍​