​ប្រែ​សម្រួលៈ​បំណង​(​ដេល្លី​ម៉េល​)៖ មាន​ការបាញ់ប្រហារ​មួយ​ក្នុងអំឡុងពេល​ថត​វីដេអូ​ចម្រៀង​នៅ​ស្ថានីយ​ហ្គាស​មួយ​ក្នុង​ទីក្រុង​អូក​លឹន​(Oakland)​រដ្ឋ​កាលីហ្វ័​រញ៉ា ដោយ​បណ្តាលអោយ​ស្លាប់​មនុស្ស​​ម្នាក់​និង​របួស​បួន​នាក់​ផ្សេងទៀត ហើយ​វា​ទំនង​ជា​​ទាក់ទង​នឹង​ក្រុម​ជន​អន្ធ​ពាល នេះ​បើ​តាម​ការបញ្ជាក់​ពី​ប៉ូលីស​កាលពី​ថ្ងៃ​អង្គារ​។​

​ការបាញ់ប្រហារ​បានកើត​ឡើង​នៅ​ម៉ោង​ប្រមាណ​៦​ល្ងាច​ថ្ងៃ​ចន្ទ​នៅ​ស្ថានីយ​Valero​តាមផ្លូវ​MacArthur Boulevard​។​អ្នក​រងរបួស​ម្នាក់​បាន​ស្ថិត​នៅក្នុង​រថយន្ត​ដែល​ត្រូវ​គ្រាប់​ក្រុម​ជន​ពាល​។​

​ពីដំបូង​ប៉ូលីស​បាន​និយាយថា មាន​ជនរងគ្រោះ​ប្រាំបី​នាក់​ពី​ការបាញ់ប្រហារ​នេះ រួម​មាន​ម្នាក់​បាន​ស្លាប់ តែ​កាលពី​ថ្ងៃ​អង្គារ​បាន​និយាយថា អ្នករងរបួស​បី​នាក់​ដោយសារ​គ្រោះថ្នាក់​ចរាចរណ៍​មួយ​ក្នុង​​ពេល​ពួកគេ​ព្យាយាម​បើករថយន្តគេច​ចេញពី​កន្លែង​បាញ់​គ្នា​។​

​ប៉ូលីស​ក្រុង​អូក​លឹន ស៊ើបអង្កេត​ការបាញ់ប្រហារ​នៅ​ស្ថានីយ​ហ្គាស​កាលពី​ថ្ងៃ​២៣​មករា​

​ការបាញ់ប្រហារ​នេះ​បាន​កើត​ឡើង​តែ​ប៉ុន្មាន​ម៉ោង​ក្រោយ​បុរស​ម្នាក់​ជា​កម្មករ​កសិដ្ឋាន​មួយ​បាន​បាញ់​សម្លាប់​មនុស្ស​ប្រាំពីរ​នាក់​នៅ​កសិដ្ឋាន​ពីរ​នៅ​ជាយក្រុង​ហា​ហ្វ មូន បេ​(Half Moon Bay)​ចម្ងាយ​៥០​គីឡូម៉ែត្រ​ពី​ទីក្រុង​សាន់​ហ្វ្រា​ន​ស៊ី​ស្កូ​។

​ក្រោយ​ការវាយប្រហារ បុរស​វ័យ​៦៦​ឆ្នាំនេះ ត្រូវបាន​ចាប់ខ្លួន​ហើយ​ប្រឈម​ការចោទប្រកាន់​ពី​បទ​ឃាតកម្ម​និង​ប៉ុនប៉ង​សម្លាប់​៕