​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី បាន​បណ្ដេញ​មន្ត្រីជាន់ខ្ពស់​មួយចំនួន​កាលពី​ថ្ងៃ​អង្គារ​ទី​២៤​មករា​នៅក្នុង​ការរុះរើ​ខាង​នយោបាយ​ដ៏​ធំ​បំផុត​របស់​អ៊ុ​យក្រែន​​នា​សម័យ​សង្គ្រាម ដោយ​និយាយថា លោក​ត្រូវ​ការសម្អាត​បញ្ហា​ផ្ទៃក្នុង​ដែល​កំពុង​បង្ក​ការប៉ះពាល់​ដល់​ប្រទេស​។​

​ការប្រយុទ្ធ​ដ៏​យូរអង្វែង​ប្រឆាំងនឹង​អំពើពុករលួយ​ក្នុង​ប្រទេស​អ៊ុយ​ក្រែន​កំពុង​មាន​សារៈសំខាន់​ខ្លាំង​ខណៈ​ការឈ្លានពាន​របស់​រុស្ស៊ី​បាន​ធ្វើឱ្យ​រដ្ឋាភិបាល​ក្រុង​គៀវ​ពឹងផ្អែក​យ៉ាង​ខ្លាំង​លើ​ការគាំទ្រ​របស់​​លោកខាងលិច​។​

​ការ​បោសសម្អាត​មន្ត្រី​ជាង​១០​នាក់​នេះ​បាន​កើតឡើង​ប៉ុន្មាន​ថ្ងៃ​បន្ទាប់ពី​ការចាប់ខ្លួន​អនុរដ្ឋមន្ត្រី​ម្នាក់​ដែល​សង្ស័យ​ប្រព្រឹត្ត​ពុករលួយ​និង​ការចោទប្រកាន់​ជាច្រើន ដែល​ត្រូវបាន​បដិសេធ​ដោយ​ក្រសួង​ការពារជាតិ​និង​បង្ក​ឱ្យ​មាន​ការផ្ទុះ​កំហឹង​។​

​លោក​ហ្សេ​លេន​ស្គី​បាន​និយាយថា “​បញ្ហា​ផ្ទៃក្នុង​ណាមួយ​ដែល​ប៉ះពាល់​កិច្ចការ​រដ្ឋ​កំពុង​ត្រូវបាន​បោសសម្អាត ហើយ​នឹង​ត្រូវ​បោសសម្អាត​ឱ្យអស់​។ នេះ​ជា​រឿង​យុត្តិធម៌ វា​ចាំបាច់​សម្រាប់​ការការពារ​របស់​យើង ហើយ​វា​ជួយ​ដល់​ទំនាក់ទំនង​របស់​យើង​ជាមួយ​ស្ថាប័ន​អឺរ៉ុប​”​។​

​លោក​បាន​បន្ត​នៅ​ក្នុង​សុន្ទរកថា​ជា​វីដេអូ​ថា “​យើង​ត្រូវការ​រដ្ឋ​ដ៏​រឹងមាំ​មួយ ហើយ​អ៊ុយ​ក្រែ​ននឹង​ក្លាយទៅជា​ដូច្នេះ​” ដោយ​សន្យាថា​នឹង​មាន​ការតែងតាំង​មន្ត្រី​បន្ថែមទៀត​និង​ជំហាន​បន្ថែមទៀត​ដែល​​មិន​បាន​បញ្ជាក់​ច្បាស់លាស់​។​

​ក្នុងពេល​ជាមួយគ្នា សមាជិក​សភា​អាម៉េរិក​មកពី​គណបក្ស​ប្រជាធិបតេយ្យ​និង​សាធារណរដ្ឋ​បាន​សរសើរ​រដ្ឋាភិបាល​ក្រុង​គៀវ ដែល​បាន​ចាត់​វិធានការ​យ៉ាង​រហ័ស​ប្រឆាំង​នឹង​អំពើ​ពុករលួយ​ហើយ​បាន​​និយាយថា ជំនួយ​យោធា​និង​មនុស្សធម៌​របស់​អាម៉េរិក​គួរតែ​បន្ត​។​

​មន្ត្រី ដែល​ត្រូវ​បណ្តេញ​ចេញ​នោះ រួម​មាន​អភិបាល​តំបន់​ចំនួន​ប្រាំ​រូប អនុរដ្ឋមន្ត្រី​បួនរូប និង​មន្ត្រី​ការិយាល័យ​ប្រធានាធិបតី​ជាន់ខ្ពស់​ម្នាក់ ដែល​គេ​មើលឃើញ​ថា​មនុស្ស​ស្និទ្ធ​នឹង​លោក​ហ្សេ​លេន​ស្គី​។​

​អ្នកវិភាគ​នយោបាយ​ដែល​មាន​មូលដ្ឋាន​នៅ​ទីក្រុង​គៀវ​លោក វ៉ូ​ឡូ​ឌី​មៀ ហ្វេ​សិន​កូ (Volodymyr Fesenko) បាន​និយាយថា ការផ្លាស់ប្តូរ​មួយចំនួន​ត្រូវបាន​គ្រោងទុក​មួយរយៈ​មកហើយ​ប៉ុន្តែ​បាន​​លេច​ធ្លាយ​លឿន​ពេក​ពេញ​ចំណងជើង​សារព័ត៌មាន​បែប​អវិជ្ជមាន​។​

​លោក​ហ្វេ​សិនកូ​បាន​ប្រាប់​ទីភ្នាក់ងារសារព័ត៌​មាន​រ៉យ​ទ័​រថា “​វា​ជា​ការបង្កើន​ការប្រយុទ្ធប្រឆាំង​នឹង​អំពើពុករលួយ​និង​ប្រតិកម្ម​ពី​ប្រធានាធិបតី​ក្នុងពេល​ដំណាលគ្នា …​ទៅ​នឹង​អត្ថបទ​រិះគន់​នៅ​ក្នុង​​ប្រព័ន្ធ​ផ្សព្វផ្សាយ​”៕

​លោក​ហ្សេ​លេន​ស្គី​បណ្តេញ​មន្ត្រី​ជាន់​ខ្ពស់​ជាង​១០​រូប​កាលពី​ថ្ងៃ​អង្គារ