​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមមន្ត្រី​អាម៉េរិក​បាន​និយាយ​កាលពី​ថ្ងៃ​អង្គារ​ទី​២៤​មករា​ថា រដ្ឋបាល​លោកបៃ​ដិនបាន​ត្រៀម​ខ្លួន​រួច​រាល់​ហើយ​ក្នុង​ការអនុម័ត​ការបញ្ជូន​រថក្រោះ M1 Abrams ទៅកាន់​អ៊ុ​យក្រែន ខណៈ​ការស្ទាក់ស្ទើរ​របស់​អន្តរជាតិ​ក្នុង​ការបញ្ជូន​រថក្រោះ​ប្រយុទ្ធ​ទៅកាន់​សមរភូមិ​ប្រឆាំងនឹង​រុស្ស៊ី​ចាប់ផ្តើម​ថមថយ​។​

​ការសម្រេចចិត្ត​នេះ​អាច​ត្រូវបាន​ប្រកាស​ភ្លាមៗ​នៅ​ថ្ងៃ​ពុធ​នេះ ប៉ុន្តែ​គេ​អាច​ចំណាយពេល​ច្រើន​ខែ​ឬ​ច្រើន​ឆ្នាំ​ដើម្បី​ប្រគល់​រថក្រោះ​ទាំងនេះ​។​

​ក្រុមមន្ត្រី​អាម៉េរិក​បាន​និយាយថា ព័ត៌មាន​លម្អិត​កំពុង​រៀបចំ​ឡើង​។ មន្ត្រី​ម្នាក់​បាន​និយាយថា រថក្រោះ​នឹង​ត្រូវ​បាន​ទិញ​ក្រោម​កញ្ចប់​គំនិត​ផ្តួចផ្តើម​ជំនួយ​សន្តិសុខ​អ៊ុយ​ក្រែ​ននាពេលខាងមុ​ខ ដែល​ផ្តល់​មូលនិធិ​រយៈពេល​វែង​សម្រាប់​អាវុធ និង​ឧបករណ៍ ដែល​ត្រូវ​ទិញ​ពី​អ្នកលក់​ផ្នែក​ពាណិជ្ជកម្ម​។​

​សេចក្តីប្រកាស​របស់​អាម៉េរិ​ក​ត្រូវ​គេ​រំពឹងថា​នឹង​មាន​ការសម្របសម្រួ​ល​ជាមួយនឹង​ការប្រកាស​របស់​អាល្លឺម៉ង់​ថា ខ្លួន​នឹង​យល់ព្រម​លើ​សំណើ​របស់​ប៉ូឡូញ​ក្នុង​ការផ្ទេរ​រថក្រោះ Leopard 2​ដែល​ផលិត​​ដោយ​អាល្លឺម៉ង់​ទៅកាន់​អ៊ុ​យក្រែន នេះ​បើ​យោង​តាម​មន្ត្រី​ម្នាក់​នោះ​។​

​ដោយ​យល់ព្រម​បញ្ជូន​រថក្រោះ Abrams នៅ​ពេលវេលា​មិនទាន់​បាន​កំណត់​ក្រោម​គំនិត​ផ្តួចផ្តើម​ជំនួយ​នេះ រដ្ឋបាលបៃដិ​ន​អាចបំពេញ​ការទាមទា​ររបស់​អធិការបតី​អាល្លឺម៉ង់ អូ​ឡា​ហ្វ ស្កូល​សម្រាប់​​ការប្តេជ្ញា​ចិត្ត​របស់​អាម៉េរិ​ក ដោយ​មិន​ចាំបាច់​បញ្ជូន​រថក្រោះ​ភ្លាមៗ​។​

​ជំនួយ​ភាគច្រើន​ដែល​បាន​បញ្ជូន​មក​ទល់​ពេល​នេះ​នៅក្នុង​សង្គ្រាម​រយៈពេល ១១ ខែ​គឺ​តាមរយៈ​កម្មវិធី​ដាច់ដោយឡែក​មួយ ដែល​ពឹង​លើ​ស្តុក​របស់​មន្ទីរ​បញ្ច​កោណ​ដើម្បីឱ្យ​អាវុធ​បញ្ជូន​បាន​កាន់តែ​លឿន​​ទៅកាន់​អ៊ុ​យក្រែន​។​

​ប៉ុន្តែ​ទោះបីជា​ស្ថិត​ក្រោម​កម្មវិធី​នោះ​ក៏ដោយ ក៏​វា​ត្រូវ​ចំណាយ​ពេល​រាប់​ខែ​ដើម្បី​យក​រថក្រោះ​ទៅកាន់​អ៊ុ​យក្រែន និង​ឱ្យ​កងកម្លាំង​អ៊ុយ​ក្រែន​ហ្វឹកហាត់​លើ​ពួកវា​។​

​គេ​មិនដឹង​ទេ​ថា​តើ​រថក្រោះ​ចំនួន​ប៉ុន្មាន​នឹង​ត្រូវ​អនុម័ត​៕

​រថក្រោះ M1 Abrams របស់​អាម៉េរិក​