​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉ូលិស​បាន​និយាយថា មនុស្ស​បីនាក់​ត្រូវបាន​សម្លាប់​នៅក្នុង​ការបាញ់ប្រហារ​នៅ​ហាង​ទំនិញ​មួយ​កន្លែង​នៅ​កណ្តាល​រដ្ឋ​វ៉ាស៊ីនតោន​កាលពី​ព្រឹក​ថ្ងៃ​អង្គារ​ទី​២៤​មករា ហើយ​ជនសង្ស័យ​រត់​គេចខ្លួន​តែ​ក្រោយមក​ត្រូវបាន​រាយការណ៍​ថា​បាន​បាញ់​សម្លាប់​ខ្លួនឯង​។​

​របាយការណ៍​ចុងក្រោយ​នៅ​ថ្ងៃ​ពុធ​នេះ បាន​និយាយថា ខ្មាន់កាំភ្លើង​ដែល​បាន​បាញ់​សម្លាប់​មនុស្ស​បីនាក់ បាន​ទូរស័ព្ទ​ប្រាប់​ម្តាយ​និង​ក្រោយមក​បាន​បាញ់​សម្លាប់​ខ្លួនឯង​កាលពី​ថ្ងៃ​អង្គារ​។​

​ប៉ូលិស​ត្រូវបាន​គេ​តេ​ហៅ​ទៅ​កាន់​ហាង Circle K ក្នុង​ទីក្រុង​យ៉ាគី​ម៉ា (Yakima) រដ្ឋ​វ៉ាស៊ីនតោន​នៅ​ម៉ោង​ប្រហែល ៣៖៣០ នាទី​ព្រឹក​ម៉ោង​ក្នុងស្រុក នៅពេលដែល​មនុស្ស​បីនាក់​ដែល​មិន​ទាន់​​កំណត់​អត្តសញ្ញាណ ត្រូវបាន​ប្រទះឃើញ​ស្លាប់ នេះ​បើ​យោង​តាម​មេ​ប៉ូលិស​ក្រុង លោក ម៉ា​ត មួ​រ៉េ (Matt Murray) ប្រាប់​ទៅ​អ្នកសារព័ត៌មាន​។ ជនរងគ្រោះ​ពីរ​នាក់​ត្រូវ​បាន​បាញ់​នៅ​ខាងក្នុង​ហាង ចំណែក​ជនរងគ្រោះ​ទី​បី​ត្រូវ​បាន​បាញ់​នៅ​ខាងក្រៅ ដែល​អាជ្ញាធរ​និយាយថា ទំនង​ជា​អំពើ​ហិង្សា​ចៃដន្យ​។​

​លោក​បន្តថា មូលហេតុ​មិន​ទាន់​ដឹង​ទេ ហើយ​ជនសង្ស័យ​ភេទ​ប្រុស​នោះ​ត្រូវបាន​ចាត់ទុក​ថា​មាន​គ្រោះថ្នាក់​ដល់​សហគមន៍​។​

​លោក​មួ​រ៉េ​បាន​និយាយថា “​វា​ហាក់ដូចជា​ស្ថានភាព​ចៃដន្យ​។ មិន​មាន​ជម្លោះ​ជាក់ស្តែង​រវាង​ភាគី​ទាំង​ពីរ​ទេ​។ បុរស​នោះ​គ្រាន់​តែ​ដើរ​ចូល​ហើយ​ចាប់ផ្តើម​បាញ់​តែម្តង​”​។​

​នៅ​សប្តាហ៍​នេះ សហរដ្ឋ​អាម៉េរិក​ទើប​តែ​ជួប​ការបាញ់ប្រហារ​ទ្រង់ទ្រាយ​ធំ​ពីរ​លើក​ផ្ទួនៗ​នៅ​រដ្ឋ​កាលីហ្វ័​រញ៉ា ដែល​បណ្តាលឱ្យ​ជនរងគ្រោះ​ស្លាប់​១៨​នាក់​។​

​ក្រោយ​ពី​បើក​ការបាញ់ប្រហារ​ក្នុង​ហាង​រួច ជនសង្ស័យ​បាន​រត់​ឆ្លងផ្លូវ ហើយ​បាញ់​ទៅលើ​រថយន្ត​មួយ​គ្រឿង ដោយ​បង្ខំ​ឱ្យ​អ្នកបើកបរ​រុល​ទៅ​កន្លែង​អង្គុយ​របស់​អ្នកដំណើរ ។ ប៉ូលិស​បាន​និយាយថា ជនសង្ស័យ​បាន​លួច​រថយន្ត​ពណ៌​ទឹកប្រាក់​ម៉ាក Chrysler ហើយ​រត់​គេចខ្លួន​បាត់​។​

​ស្ថានភាព​របស់​អ្នកបើកបរ រួម​ទាំង​ការ​របួស​ដែរ​ឬ​អត់​នោះ គេ​មិនដឹង​ទេ​។​

​កម្លាំង​សមត្ថកិច្ច​បាន​ប្រមូល​រូបភាព​សន្តិសុខ​និង​ភស្តុតាង​សាក្សី​ពី​កន្លែងកើតហេតុ​ជា​ផ្នែក​នៃ​ការស៊ើបអង្កេត​។​នាយកដ្ឋាន​ប៉ូលិស​បាន​ចេញផ្សាយ​រូបថត​នៅលើ​បណ្តាញ​សង្គម​របស់​បុរស​ម្នាក់​ដែល​​ស្លៀកពាក់​ឈុតខ្មៅ​ទាំងស្រុង រួម​ទាំង​មួក អាវ និង​ខោ​ខូវប៊យ និង​ស្បែកជើង Nike ពណ៌​ស​។​

​យ៉ាគី​ម៉ាគឺ​ជា​ទីក្រុង​មួយ​ដែល​មាន​អ្នកស្រុក​ប្រហែល ៩៧.០០០ នាក់​រស់នៅ​ជ្រលង​ភ្នំ​យ៉ា​មីកា (Yamika) នៃ​រដ្ឋ​វ៉ាស៊ីនតោន ជា​តំបន់កសិកម្ម​ដ៏​ល្បីល្បាញ​សម្រាប់​ដំណាំ​ផ្លែ​ប៉ោម​និង​ស្រា​ទំពាំងបាយជូ​រ​៕

​ជនសង្ស័យ​ស្លៀកពាក់​ឈុត​ខ្មៅ​ទាំងស្រុង រួម​ទាំង​មួក អាវ និង​ខោ​ខូវប៊យ និង​ស្បែកជើង Nike​ពណ៌​ស