​ប្រែ​សម្រួលៈ​បំណង​(​ស្ត្រេត​ថែមស៍​)៖ គណៈ​រដ្ឋមន្ត្រី​ថៃ​កាលពី​ថ្ងៃ​អង្គារ​បាន​អនុម័ត​ថវិកា​១៨២​លាន​ដុល្លារ​ដើម្បី​រៀបចំ​ការបោះឆ្នោត​សកល​នា​ឆ្នាំ​២០២៣ ។​

​នាយករដ្ឋមន្ត្រី​ថៃ​លោក​ប្រា​យុទ្ធ ចាន់ អូ​ចា អះអាងថាលោកចង់បន្តនៅជានាយករដ្ឋមន្រ្តី ដោយសារការងារនៅមិនទាន់ចប់

​នាយករដ្ឋមន្ត្រី​ថៃ​លោក​ប្រា​យុទ្ធ ចាន់ អូ​ចា នៅ​មិនទាន់​រំលាយ​សភា​និង​កោះ​ធ្វើ​ការបោះឆ្នោត​មួយ​ដែល​គ្រោង​ធ្វើ​នៅ​ខែ​ឧសភា ឆ្នាំ​២០២៣​នេះ​នៅឡើយ​ទេ ។​កាលពី​មុន​នេះ​ក្នុង​ខែ​មករា លោក​ប្រា​យុទ្ធ​​បាន​ចាកចេញ​ពី​គណបក្សកាន់អំណាច និង​បាន​ចូលរួម​ជាមួយ​គណបក្ស​ទើប​បង្កើត​ថ្មី​មួយ​នៅពេល​លោក​សម្លឹង​ទៅ​រក​ការបន្ថែម​ការ​កាន់អំណាច​ប្រាំបី​ឆ្នាំ​របស់​លោក ទោះ​ជា​ច្បាប់​កំណត់​រយៈពេល​កាន់​តំណែង​កំពូល​នេះ​ក្តី​។​

​លោក​ឥឡូវ​ជា​សមាជិក​និង​ជា​បេក្ខជន​នាយក​រដ្ឋមន្ត្រី​របស់​គ​ណ​បក្ស រួម​ថៃ សាង​ឆាត​(Ruamthai Sarngchart)​។​

​ប្រា​យុទ្ធ នៅ​តែ​រក​វិធី​បន្ត​នៅក្នុង​មុខ​តំណែង​នាយករដ្ឋមន្ត្រី​ទោះជា​ប្រជាប្រិយភាព​របស់​លោក​បន្ត​ធ្លាក់ចុះ និងច្បាប់រដ្ឋធម្មនុញ្ញ​អាច​អនុញ្ញាតអោយ​លោក​កាន់​តំណែង​នាយករដ្ឋមន្រ្តីបាន​យ៉ាងយូរ​ពីរ​ឆ្នាំ​ទៀត​។​​លោក​ពឹង​លើ​ការគាំទ្រ​របស់​ព្រឹទ្ធសភា​ដែល​មាន​សមាជិក​២៥០​រូប ដែល​សុទ្ធតែ​ជា​សម្ពន្ធមិត្ត​មក​ពី​ស្ថាប័ន​យោធា​។​

រំលឹកថា ​ក្រោយ​ការបោះឆ្នោត​ឆ្នាំ​២០១៩ ព្រឹទ្ធសភា​បាន​ធីប​ទុក​បក្ស​ភឿ​ថៃទោះជា​គណបក្ស​ប្រឆាំង​នេះ​ទទួលបាន​សម្លេង​គាំទ្រ​នាំមុខ​គេក្តី ដោយ​ទុក​អោយ​គណបក្ស​លំដាប់​ទី​ពីរ​របស់​ប្រា​យុទ្ធ​រក​ដៃគូ​បង្កើត​រដ្ឋា​ភិ​​បាល​ចំរុះ​មួយ​។​

​សូមបញ្ជាក់​ថា​លោក​ប្រា​យុទ្ធ​បាន​ស្វះស្វែង​រក​ទ្រនំ​នយោបាយ​ថ្មី​បន្ទាប់​ពី​គណបក្សកាន់អំណាច ផា​ឡាង ប្រា​ចា​រ៉ា​ត​(Palang Pracharath)​អោយ​សញ្ញា​ថា ខ្លួន​នឹង​ជ្រើសតាំង​មេដឹកនាំ​របស់​ខ្លួន​គឺ​​ឧបនាយករដ្ឋមន្ត្រី ប្រា​វីត វ៉ុង​ស៊ូ​វ៉ាន ជា​បេក្ខជន​នាយករដ្ឋមន្ត្រី​សំរាប់​ការបោះឆ្នោត​នៅ​ឆ្នាំនេះ​៕