​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ស្ត្រី​ម្នាក់​បាន​ដាក់ពាក្យ​ប្តឹង​ចោទប្រកាន់​អតីត​ជើងឯក​ប្រដាល់​ទម្ងន់​ធ្ងន់ ម៉ៃ ថៃ​សាន់ ពី​បទ​រំលោភ​នាង​នៅ​ដើម​ទសវត្សរ៍​ឆ្នាំ ១៩៩០​បន្ទាប់ពី​នាង​បាន​ជួប​​គាត់​នៅ​ក្លិប​រាត្រី​មួយ​ក្នុង​ទីក្រុង​អាល់​បា​នី (Albany) រដ្ឋ​ញូវយ៉ក​។​

​ស្ត្រី ដែល​កំពុង​ប្តឹង​ទាមទារ​សំណង​៥​លាន​ដុល្លារ​នេះ បាន​និយាយថា ថៃ​សាន់​បាន​រំលោភ​នាង​នៅក្នុង​រថយន្ត ហើយ​ថា​នាង​បាន​ទទួលរង “​របួស​ផ្លូវកាយ ផ្លូវចិត្ត និង ផ្លូវ​ស្មារតី​” អស់​ជាច្រើន​ឆ្នាំ ចាប់តាំងពី​ពេលនោះ​មក​។​

​លិខិត​បណ្តឹង​របស់​ស្ត្រី​នោះ​មិន​បាន​ផ្តល់​កាលបរិច្ឆេទ​សម្រាប់​ការរំលោភ​នោះ​ទេ ប៉ុន្តែ​គ្រាន់តែ​និយាយថា​វា​បាន​កើត​ឡើង​នៅ​ដើម​ទសវត្សរ៍​ឆ្នាំ ១៩៩០ ក្នុងពេល​ជាមួយគ្នា​ដែល​បេ​ក្ខ​នារី​បវរកញ្ញា​ឈ្មោះ ដេ​ស៊ីរី វ៉ាស៊ីនតោន (Desiree Washington) និយាយ​ថា​ថៃ​សាន់​បាន​រំលោភ​នាង​នៅ​ទីក្រុង​អ៊ី​ឌីយ៉ាណា​ប៉ូលីស (Indianapolis)​។

​សូមបញ្ជាក់​ថា ថៃ​សាន់​ត្រូវបាន​កាត់ទោស​ពី​បទ​រំលោភ​នាង​វ៉ាស៊ីនតោន​នៅ​ថ្ងៃទី ១០ ខែ​កុម្ភៈ ឆ្នាំ ១៩៩២ ហើយ​បាន​ជាប់គុក​បី​ឆ្នាំ​។​

​សកម្មភាព​ផ្លូវច្បាប់​នៅ​រដ្ឋ​ញូវយ៉ក​ត្រូវបាន​ដាក់​ប្តឹង​នៅក្រោម​ច្បាប់​ស្តីពី​អ្នក​រស់រានមានជីវិត​ពេញវ័យ (Adult Survivors Act) របស់​រដ្ឋ​ដែល​ផ្តល់​ពេល​ឱ្យ​ជនរងគ្រោះ​ពី​បទ​រំលោភ​ផ្លូវភេទ​​រយៈពេល​មួយ​ឆ្នាំ​ដើម្បី​ដាក់​ពាក្យបណ្តឹង​លើ​ការរំលោភ​ដែល​បាន​កើត​ឡើង​ជា​ច្រើន​ឆ្នាំ​ឬ​រាប់​ទសវត្សរ៍​មុន​។​

​ស្ត្រី​នោះ​បាន​និយាយ​នៅក្នុង​ពាក្យបណ្តឹង​របស់​នាង​ថា នាង​បាន​ចូល​ក្នុង​រថយន្ត​របស់​ថៃ​សាន់ ហើយ​ភ្លាមនោះ អ្នក​ប្រដាល់​នេះ​បាន​ចាប់ផ្តើម​ស្ទាប​នាង ហើយ​ព្យាយាម​ថើប​នាង​។​

​ស្ត្រី​នោះ​បាន​និយាយថា “​ខ្ញុំ​ប្រាប់​គាត់​ជាច្រើន​លើក​ថា​កុំឱ្យ​ស្ទាប ហើយ​បាន​សុំ​ឱ្យ​គាត់​បញ្ឈប់ ប៉ុន្តែ​គាត់​នៅតែ​បន្ត​បំពាន​ខ្ញុំ​។ បន្ទាប់មក​គាត់​បាន​សម្រាត​ខោ​របស់ខ្ញុំ ហើយ​រំលោភ​ខ្ញុំ​យ៉ាង​ព្រៃផ្សៃ​”​។​

​ស្ត្រី​រូប​នេះ​កំពុង​សុំ​រក្សា​ភាព​អនាមិក ព្រោះ​ការផ្សាយ​ឈ្មោះ​របស់​នាង​ប្រាកដជា​នឹង​បង្ក​ហានិភ័យ​ដល់​រូបនាង ដែល​អាច​ប៉ះពាល់​ផ្លូវចិត្ត នាំឱ្យ​មាន​ការយាយី ការ​សើចចម្អក ឬ ការ​អាម៉ាស់​ផ្ទាល់ខ្លួន​៕

​ថៃ​សាន់​ធ្លាប់​ជាប់គុក​បី​ឆ្នាំ​ពី​បទ​រំលោភ​នាង​វ៉ាស៊ីនតោន​ក្នុង​ឆ្នាំ​១៩៩២ ឥឡូវ​រង​បណ្តឹង​ចាប់រំលោភ​ជាថ្មី​