​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អាម៉េរិក​ត្រូវបាន​ស​ន្ម​ត់​ជា​កន្លែង​សុវត្ថិភាព​សម្រាប់​លោក យ៉ូ​សេ រ៉ូ​ម៉េ​រ៉ូ (Jose Romero)​នៅពេលដែល​លោក​បាន​មកដល់​កាលពី​ពីរ​ឆ្នាំ​មុន​ដើម្បី​​ធ្វើការ​នៅ​កសិដ្ឋាន​មួយ​នៅ​រដ្ឋ​កាលីហ្វ័​រញ៉ា​ជាមួយជនអ​ន្តោ​ប្រវេសន៍​ផ្សេង​ទៀត​មក​ពី​ម៉ិក​ស៊ិក​និងចិន​។​

​លោក​រ៉ូ​ម៉េ​រ៉ូ​ត្រូវបាន​សម្លាប់​កាលពី​ថ្ងៃ​ចន្ទ​ដោយ​ខ្មាន់កាំភ្លើង​ម្នាក់ ដែល​បាញ់​សម្លាប់​គាត់​រួម​ទាំង​កម្មករ​កសិដ្ឋាន​៦​នាក់​ផ្សេង​ទៀត​នៅ​ទីក្រុង​ហាហ្វ​មូនបេ (Half Moon Bay)​ដែល​ស្ថិតនៅ​ភាគខាងត្បូង​នៃ​ទីក្រុង​សាន់​ហ្វ្រា​ន​ស៊ី​ស្កូ​។ សូម្បីតែ​នៅក្នុង​ប្រទេស​ដែល​ល្បី​ខាង​អំពើហិង្សា​ដោយ​កាំភ្លើង​ក៏ដោយ ក៏​ការបាញ់ប្រហារ​នេះ​នៅតែ​មាន​ភាព​ភ្ញាក់ផ្អើល​ខ្លាំង​ដោយ​បាន​កើតឡើង​ត្រឹមតែ​ពីរ​ថ្ងៃ​ប៉ុណ្ណោះ​​បន្ទាប់​ពី​ខ្មាន់កាំភ្លើង​ម្នាក់​ទៀត​បាន​បើក​ការបាញ់ប្រហារ​នៅឯ​សាល​រាំ​មួយ​ក្នុង​ទីក្រុង​ម៉ុន​ធឺ​រ៉េ​ផាក (Monterey Park) ជា​តំបន់​រស់នៅ​របស់​ជន​ជាតិ​អាស៊ី​នៅ​ខាងក្រៅ​ទីក្រុង​ឡូ​ស​អ៊ែន​ជើ​ឡេស​។​

​សរុបមក មនុស្ស ១៨ នាក់​បាន​ស្លាប់​នៅក្នុង​ការបាញ់ប្រហារ​ពីរ​លើក​ផ្ទួនៗ ដែល​បាន​អង្រួន​សហគមន៍​ជិតគ្នា​ទាំងពីរ ដែល​តែងតែ​ទាក់ទាញ​ជនអន្តោប្រវេសន៍​ដែល​ស្វែងរក​ឱកាស​ការងារ​។​

​បងប្អូន​ជីដូនមួយរ​បស់​លោក​រ៉ូ​ម៉េ​រ៉ូ គឺ​លោក យ៉ូ​សេ ជូ​អា​រ៉េ​ស (Jose Juarez) បាន​និយាយ​កាលពី​ថ្ងៃ​អង្គារ​ទី​២៤​មករា​ថា “​អ្នក​សម្លឹង​ធ្វើឱ្យ​ជីវិត​ប្រសើរឡើង ហើយ​បន្ទាប់មក​អ្នក​បែរជា​មក​ជួប​​រឿង​ដូច្នេះ​នៅ​ទីបំផុត​”​។​

​ការ​ដែល​ប៉ូលីស​និយាយ​ថា​ការវាយប្រហារ​នេះ​ត្រូវបាន​ធ្វើឡើង​ដោយ​ជន​វាយប្រហារ​ដែល​ស្គាល់​គ្នា​នៅក្នុង​សហគមន៍ ឈ្មោះថា ហ៊ូ កាន់​ចាន់ (Huu Can Tran) អាយុ ៧២ ឆ្នាំ​ដែល​ឧស្សាហ៍​ទៅ​ស្ទូឌីយ៉ូ​រាំ​​នៅ​ម៉ុន​ធឺ​រ៉េ​ផាក និង​ឈ្មោះ ជុន​លី ចា​វ (Chunli Zhao)​អាយុ ៦៦ ឆ្នាំ ដែល​ធ្វើការ​នៅ​កសិដ្ឋាន​នៅ​ហាហ្វ​មូនបេ បានត្រឹមតែ​បន្ថែម​អារម្មណ៍​ភ័យខ្លាច​ក្នុងចំណោម​ក្រុម​ជនអន្តោប្រវេសន៍​ដែល​បាន​​ក្លាយ​ជា​គោលដៅ​នៃ​វោហា​សាស្ត្រ​ប្រកាន់ពូជសាសន៍ និង​ការវាយប្រហារ​នៅក្នុង​សហរដ្ឋ​អាម៉េរិក​ប៉ុណ្ណោះ​។​

​ជនអន្តោប្រវេសន៍​អាស៊ី ៣២ ភាគរយ និង អាម៉េរិក​ឡាទីន ២៣ ភាគរយ​នៅក្នុង​រដ្ឋ​កាលីហ្វ័​រញ៉ា បាន​និយាយថា ពួកគេ “​ព្រួយបារម្ភ​យ៉ាងខ្លាំង​”​អំពី​ការ​ក្លាយជា​ជនរងគ្រោះ​នៃ​អំពើហិង្សា​កាំភ្លើង​នៅ​​ក្នុង​មណ្ឌល​ក្មេង​ចិញ្ចឹម​របស់​ពួកគេ ពោលគឺ​ខ្ពស់ជាង​បី​ដង​នៃ​កម្រិត​នៃ​ការភ័យខ្លាច​ដែល​បាន​រាយការណ៍​ដោយ​មនុស្ស​ដែល​កើត​នៅក្នុង​សហរដ្ឋ​អាម៉េរិក​។ នេះ​បើ​យោង​តាម​ទិន្នន័យ​ប្រមូល​បាន​ដោយ​សាកលវិទ្យាល័យ​កាលីហ្វ័​រញ៉ា ក្នុង​ក្រុង​ឡូ​ស​អ៊ែន​ជើ​ឡេស និង ចែករំលែក​ជាមួយ​ទីភ្នាក់ងារ​សារព័ត៌មាន​រ៉​យ​ទ័រ​។​

​ការសម្លាប់​រង្គាល​នេះ​បាន​បង្កើន​ការព្រួយបារម្ភ​សម្រាប់​មនុស្ស​មួយចំនួន​ផងដែរ​។​

​លោក អង់​តូ​នីញ៉ូ ប៉េ​រ៉េស (Antonio Perez) ដែល​ឥឡូវនេះ​រស់នៅក្នុង​ទីក្រុង​ហាហ្វ​មូនបេ បន្ទាប់​ពី​ផ្លាស់​ពី​ម៉ិក​ស៊ិកក្នុង​ឆ្នាំ ១៩៨៣ បាន​និយាយថា​គាត់​មាន​អារម្មណ៍​ជាប់គាំង​រវាង​អំពើ​ហិង្សា​​របស់​ក្រុម​ជួញដូរ​គ្រឿងញៀន​នៅក្នុង​ប្រទេស​កំណើត​របស់​គាត់​និង​អំពើ​ហិង្សា​កាំភ្លើង​នៅ​សហរដ្ឋ​អាម៉េរិក​។​

​លោកប៉េ​រ៉េ​ស​បាន​និយាយ​ដោយ​គ្រវីក្បាល​ថា “​យើង​មិន​ដែល​រំពឹង​មាន​ភាព​ធ្ងន់ធ្ងរ​បែប​នេះ​នៅ​ទី​នេះ​ទេ​។ ពិតជា​សោកនាដកម្ម​មែន​”៕

​មនុស្ស​ចូលរួម​កាន់ទុក្ខ​ជនរងគ្រោះ​នៅ​ទីក្រុង​ម៉ុន​ធឺ​រ៉េ​ផាក