​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ យន្តហោះ​ហ្វឹកហ្វឺន​របស់​កងកម្លាំង​ទ័ពអាកាស​ហ្វីលីពីន (PAF)​ដែល​ដឹក​អ្នកបើក​យន្តហោះ​ពីរ​នាក់​បាន​ធ្លាក់​កាលពី​ព្រឹក​ថ្ងៃ​ពុធ​ទី​២៥​មករា​នៅ​លើ​ដីស្រែ​​មួយ​ក្នុងស្រុក​ភី​ឡា (Pilar)​ខេត្ត​បា​តា​អាន (Bataan) ស្ថិតនៅ​ចម្ងាយ ១៣៣ គីឡូម៉ែត្រ​ភាគ​ខាងលិច​រដ្ឋធានី​ម៉ានីល​។​

​អ្នកនាំពាក្យ​របស់ PAF លោកស្រី ម៉ា​រី​យ៉ា ខុន​ស៊ូ​ឡូ កា​ស្ទីល​ឡូ (Maria Consuelo Castillo)​បាន​និយាយថា យន្តហោះ​នេះ​គឺជា​ប្រភេទ​យន្តហោះ​ហ្វឹកហាត់​ធុន SIAI-Marchetti SF260 TP ដែល​កំពុង​ដំណើរការ​ដោយ​អង្គភាព Strike Wing លេខ ១៥ របស់​កងទ័ពអាកាស​។​

​យន្តហោះ​នេះ​បាន​ហោះ​ឡើង​មុន​ម៉ោង ១០ ព្រឹក​ពី​មូលដ្ឋាន​របស់ PAF នៅ​ចំណុច​សាង​ឡេ (Sangley) ក្នុង​ខេត្ត​ខា​វ៉ា​យ (Cavite) ហើយ​បាន​ធ្លាក់​នៅ​បា​តា​អាន (Bataan) នៅ​ម៉ោង​ប្រហែល ១០៖៣៥ ព្រឹក​។​

​លោកស្រី​វរសេនីយ៍ឯក​កា​ស្ទីល​ឡូ​បាន​និយាយថា​មាន​អាកាសយានិក​ពីរ​នាក់​នៅ​លើ​យន្តហោះ ប៉ុន្តែ​និយាយថា PAF​មិនទាន់​អាច​បញ្ជាក់បាន​ថា​មាន​អ្នកស្លាប់​ឬ​យ៉ាងណា​នោះ​ទេ​ដោយសារតែ​ខ្លួន​នៅ​​កំពុង​ប្រមូល​ព័ត៌មាន​ពី​លើ​ដី​។​

​លោកស្រី​បាន​និយាយថា “​យើង​បាន​បាត់ដាន​យន្តហោះ​ជាង ៣០ នាទី​ក្នុង​ការហោះហើរ​”​។​

​រូបថត ដែល​បាន​ចែករំលែក​ដោយ​ប៉ូលិស​ស្រុក​ភី​ឡា បានបង្ហាញ​ថា អ្នកបើក​យន្តហោះ​ម្នាក់​នៅ​ជាប់​នៅក្នុង​យន្តហោះ​ដែល​ធ្លាក់​។ ប្រតិបត្តិការ​ជួយ​សង្គ្រោះ​នៅ​តែ​បន្ត​នៅ​ថ្ងៃ​ពុធ​នេះ​។​

​ការធ្លាក់​យន្តហោះ PAF បាន​កើតឡើង​មួយថ្ងៃ​បន្ទាប់​ពី​យន្តហោះ Cessna ៦​កៅអី​បាន​បាត់ដាន​នៅក្នុង​ខេត្ត​អ៊ី​សា​បេឡា (Isabela) ភាគ​ខាងជើង​ទីក្រុង​ម៉ានីល​។​ប្រតិបត្តិ​ការស្វែងរក​​និង​ជួយ​សង្គ្រោះ​កំពុង​បន្ត​ដើម្បី​ស្វែងរក​ទីតាំង​យន្តហោះ​ឯកជន​នេះ អ្នកបើក​យន្តហោះ និង​អ្នកដំណើរ​៥​នាក់​៕

​យន្តហោះ​ហ្វឹកហ្វឺន​ធុន SIAI-Marchetti SF260 TP ធ្លាក់​នៅ​ព្រឹក​ថ្ងៃ​ពុធ​នេះ