ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖​មជ្ឈមណ្ឌល​ល្បែង​ម៉ា​កាវ​ដ៏​ធំ​បំផុត​នៅលើ​ពិភពលោក​បាន​ឃើញ​ភ្ញៀវទេសចរ​រាប់ម៉ឺន​នាក់​ជា​រៀងរាល់ថ្ងៃ​ចូលមក​កាស៊ីណូ​និង​ផ្លូវ​ក្រាល​ឥដ្ឋ​ដ៏​ស្រស់ស្អាត​​របស់​ខ្លួន​នៅ​ថ្ងៃ​ឈប់សម្រាក​បុណ្យ​ចូល​ឆ្នាំ​ចិន ដែល​ផ្ទុយស្រឡះ​ពី​ការ​ឈប់សម្រាក​ចាប់តាំងពី​ឆ្នាំ ២០២០​។​

​ម៉ា​កាវ​បាន​មើលឃើញ​ការ​កើត​ឡើង​វិញ​នៃ​ភ្ញៀវទេសចរ​មកពី​ចិនដីគោក​ចាប់តាំងពី​តំបន់​រដ្ឋបាល​ចិន​ពិសេស​នេះ​បាន​ដកចេញ​ទាំងអស់​នូវ​កិច្ច​តម្រូវឱ្យ​ធ្វើតេស្តិ៍​រក​កូវី​ដ​១៩​សម្រាប់​អ្នកដំណើរ​ទៅ​​ពី​ចិនដីគោក ហុងកុង និង កោះ​តៃវ៉ាន់​និង​រដ្ឋាភិបាល​ក្រុង​ប៉េកាំ​ង​បាន​បើក​ព្រំដែន​របស់​ខ្លួន​ជាមួយ​ពិភពលោក​ជា​លើកដំបូង​ក្នុង​រយៈ​​ពេល​បី​ឆ្នាំ​កាលពីដើម​ខែ​មករា​។

​រដ្ឋបាល​ក្រុង​ម៉ា​កាវ​បាន​និយាយថា ទីក្រុង​ម៉ា​កាវ​បាន​ស្វាគមន៍​ភ្ញៀវទេសចរ​ជាង ៧១.០០០ នាក់​កាលពី​ថ្ងៃ​ចន្ទ ជា​កំណត់ត្រា​តែ​មួយ​ថ្ងៃ​ខ្ពស់​បំផុត​ចាប់តាំងពី​ជំងឺ​រាតត្បាត​បាន​ផ្ទុះឡើង​។​

​បុរស​ឈ្មោះ​ឡាំ ដែល​ធ្វើដំណើរ​មក​ម៉ា​កាវ​ពី​ទីក្រុង​ជាំ​ង​មិន (Jiangmen) ក្នុង​ខេត្ត​ក្វាង​ទុង​នៅ​ភាគខាងត្បូង​ចិន បាន​និយាយថា “​ខ្ញុំ​មក​ទីនេះ​ដើម្បី​លេងល្បែង​។​វា​ជា​ការល្អ​ដែល​បាន​ឃើញ​មនុស្ស​​នៅ​ម៉ា​កាវ​។ វា​គ្មាន​ជីវិត​ទេ​អំឡុង​ការបិទ​ខ្ទប់​និង​មិនល្អ​សោះឡើយ​”​។

​ជាង ៩៤ ភាគរយ​នៃ​ភ្ញៀវទេសចរ​នៅ​ម៉ា​កាវ​ក្នុង​រយៈពេល​បី​ថ្ងៃ​ដំបូង​នៃ​ពិធី​បុណ្យ​ចូល​ឆ្នាំ​ចិន​ថ្ងៃទី ២១ ខែ​មករា​បាន​មក​ពី​តំបន់​រដ្ឋបាលពិសេស ​ចិន​និង​ហុងកុង​ជិតខាង​។ រដ្ឋបាល​ក្រុង​ម៉ា​កាវ​បាន​និយាយថា ចំនួន​ភ្ញៀវទេសចរ​ប្រចាំ​ថ្ងៃ​ជា​មធ្យម​សម្រេច​បាន​ជាង ៥១.០០០ នាក់​ដែល​កើនឡើង ២១៧ ភាគរយ​ធៀប​នឹង​ឆ្នាំ​មុន​។​

​ការហូរចូល​នៃ​ភ្ញៀវទេសចរ​ចូ​មកកា​ន់​អតីត​អាណានិគម​ព័រ​ទុយ​ហ្គាល់​មួយ​នេះ​បាន​ចាប់ផ្តើមចា​ប់តាំង​ពី​រដ្ឋាភិបាល​ក្រុង​ប៉េកាំ​ង​បាន​បើក​ព្រំដែន​របស់​ខ្លួន​ជាមួយ​ពិភពលោក​ជា​លើកដំបូង​ក្នុង​រយៈ​​ពេល​បី​ឆ្នាំ​កាលពីដើម​ខែ​មករា​។ ម៉ា​កាវ​មាន​អ្នកដំណើរ​ជា​មធ្យម ១៥.០០០ នាក់​ក្នុង​មួយ​ថ្ងៃ​នៅ​ឆ្នាំ ២០២២៕

ម៉ា​កាវ​ស្វាគមន៍​ភ្ញៀវ​ចិន ៧១.០០០ នាក់​នៅ​ថ្ងៃទី​២៣ ខែ​មករា ឆ្នាំ​២០២២ ដែល​ជា​ចំនួន​ភ្ញៀវ​ខ្ពស់​បំផុត​មក​លេង​ក្នុងពេល​តែមួយ​ថ្ងៃ