​ប្រែ​សម្រួលៈ​បំណង​(​ស្ត្រេត​ថែមស៍​)៖ ករណី​កើត​ជំងឺ​កូវី​ដ​១៩​ធ្ងន់ធ្ងរ​នៅ​ចិន​បាន​ធ្លាក់ចុះ​៧២​ភាគរយ​ធៀប​នឹង​ពេល​អ្នកជំងឺ​កូវី​ដ​១៩​ជោរជន់​នៅតាម​មន្ទីរពេទ្យ​ខ្លាំង​បំផុត​កាលពី​ដើមខែ​នេះ នៅ​ពេល​ចំ​​នួន​អ្នកជំងឺ​កូវី​ដស្លាប់​បាន​ធ្លាក់ចុះ​៧៩​ភាគរយ​ធៀប​នឹង​ចំនួន​ស្លាប់​ខ្ពស់បំផុត​កាលពី​ថ្ងៃ​០៤​មករា នេះ​បើ​តាម​ការបញ្ជាក់​ពី​មជ្ឈមណ្ឌល​គ្រប់គ្រង​និង​បង្ការ​ជំងឺ​ចិន​កាលពី​ថ្ងៃ​ពុធ​។​

​តួលេខ​ដែល​ចុះផ្សាយ​ក្នុង​គេហទំព័រ​របស់​មជ្ឈមណ្ឌល កើត​ឡើង​បន្ទាប់ពី​អ្នកវិទ្យាសាស្ត្រ​សំខាន់​ម្នាក់​នៃ​រដ្ឋាភិបាល​ចិន​បាន​អះអាង​កាលពី​ចុង​សប្តាហ៍​ថា​៨០​ភាគរយ​ក្នុងចំណោម​ប្រជាជន​ចិន​១,៤​ពាន់​​លាន​នាក់​បាន​ឆ្លងកូវី​ដ​១៩​រួចហើយ ។​

​សូមបញ្ជាក់​ថា​ចិន​បានបញ្ចប់​គោលការណ៍​គ្រប់គ្រង​កូវី​ដ​ដ៏​តឹងរឹង​របស់​ខ្លួន​ភ្លាមៗ​កាលពីដើម​ខែ​មុន​ក្រោយ​អនុវត្ត​វា​អស់​បី​ឆ្នាំ​ជាហេតុ​នាំ​អោយ​មាន​ការឆ្លង​រាលដាល​ជំងឺ​ពាសវាល​ពាសកាល​នៅ​ក្នុងប្រ​​ទេស​ដែលមាន​ប្រជាជន​ច្រើន​បំផុត​មួយ​នេះ​ភ្លាមៗ​ផងដែរ​។​

​នៅ​ពេល​ពួក​មន្ត្រី​បាន​អះអាង​ថា​ការឆ្លង​ជំងឺ​បាន​ឡើង​ដល់​កំពូល​រួចហើយ​អ្នកជំនាញការ​សកលលោក​ខ្លះ​បាន​ព្រមាន​អំពី​លទ្ធភាព​នៃ​ការផ្ទុះ​ជំងឺ​នេះ​ឡើងវិញ​នៅតាម​ទីជនបទ​ចិន​ក្រោយ​ការធ្វើដំណើរ​​របស់​មនុស្ស​រាប់លាន​នាក់​ពី​បណ្តា​ទីក្រុង​ទីប្រជុំជន​ទៅ​កាន់​ទីនោះ​ដើម្បី​ជួបជុំ​គ្រួសារ​ក្នុងអំឡុងពេល​ចូល​ឆ្នាំ​កាល​ពី​ប៉ុន្មាន​ថ្ងៃមុន​នេះ​។​

​ការបញ្ចប់​ការអនុវត្ត​វុធានកា​រប្រ​ឆាំង​កូវី​ដ​១៩​ភ្លាមៗ​នៅ​ចិន​នាំ​អោយ​មេរោគ​ជំងឺ​នេះ​វាយប្រហារ​ក្រុម​មនុស្ស​វ័យចាស់​ចិន​ជាខ្លាំង​

​មជ្ឈមណ្ឌល​គ្រប់គ្រង​និង​បង្ការ​ជំងឺ​ចិន​កាលពី​ថ្ងៃ​ពុធ​បាន​និយាយថា ចំនួន​អ្នកជំងឺ​កូវី​ដ​ធ្ងន់ធ្ងរ​នៅ​ចិន​បាន​ឡើងដល់​១២៨.០០០​នាក់​កាលពី​ថ្ងៃ​៤​មករា និង​បាន​ធ្លាក់ចុះ​មក​នៅត្រឹម​៣៦.០០០​នាក់​កាល​​ពី​ថ្ងៃ​២៣​មករា​។​ចំណែក​ចំនួន​អ្នកជំងឺ​កូវី​ដស្លាប់​នៅក្នុង​មន្ទីរពេទ្យ​ក្នុងពេល​ជាមួយគ្នា បាន​ឡើងដល់​៤.២៧៣​នាក់​ក្នុង​មួយ​ថ្ងៃ​កាលពី​ថ្ងៃ​៤​មករា តែ​បាន​ធ្លាក់​មក​នៅ​៨៩៦​នាក់​កាលពី​ថ្ងៃ​២៣​មករា​។​

​មជ្ឈមណ្ឌល​ក៏បាន​និយាយថា ចំនួន​ឆ្លង​ថ្មី​បាន​ឡើង​ហួស​៧​លាន​នាក់​ក្នុង​មួយថ្ងៃ​កាលពី​ថ្ងៃ​២២​ធ្នូ ៕

​ចំនួន​អ្នកជំងឺ​កូវី​ដ​១៩​ស្លាប់​នៅ​តាម​មន្ទីរពេទ្យ​បាន​ធ្លាក់ចុះ​មក​នៅ​៨៩៦​នាក់​កាលពី​ថ្ងៃ​២៣​មករា គឺ​ចុះ​ជិត​៨០​ភាគរយ​ក្រោយ​ការស្លាប់​ជាង​៤.០០០​នាក់​ក្នុង​មួយ​ថ្ងៃ​កាលពី​ថ្ងៃ​៤​មករា​