ដោយៈ សុវណ្ណកុម្ភៈ / ភ្នំពេញៈ នៅរសៀល ថ្ងៃទី២៦ មករា ២០២៣ នេះ ក្នុងព្រឹត្តិការណ៍ ASBC Boxing Championship Thailand 2023 អ្នកប្រដាល់សកលកម្ពុជា ត្រូវប្រកួតផ្ដាច់ព្រ័ត្រ ជាមួយអ្នកប្រដាល់អ៊ូសបេគីស្ថាន Tokhirov Nusratbek ក្នុងប្រភេទទម្ងន់ ៩២ គីឡូក្រាម។ អ្នកប្រដាល់ទាំង ២រូបនេះ នរណាឈ្នះ នឹងបានទទួលមេដាយមាស ចំពោះអ្នកចាញ់ បានមេដាយ ប្រាក់។
នេះជាការប្រកួត សម្រាប់ប្រភេទអាយុក្រោម ២២ ឆ្នាំ ដែលមានប្រទេស ចំនួន ២១ ក្នុងទ្វីបអាស៊ី ចូលរួម។ សម្រាប់កម្ពុជា បានបញ្ជូនកីឡាករ ៣ រូប និងកីឡាការិនី មួយរូប ទៅចូលរួមប្រកួត។
កីឡាករទាំង ៣ រូប មាន ពេញ វណ្ណថង ទម្ងន់ ៦៧ គីឡូក្រាម ដែលអ្នកប្រដាល់ រូបនេះ ដណ្ដើមបានមេដាយសំរិទ្ធ រួចទៅហើយ។ កីឡាករ ហ៊ុន គឹមហ៊ាង ទម្ងន់ ៧១ គីឡូក្រាម កីឡាករ រ៉ាចាពៅ អាប់ឌុលឡា ទម្ងន់ ៩២ គីឡូក្រាម និងកីឡាការិនី វី ស្រីស្រស់ទម្ងន់ ៥៧ គីឡូក្រាម។
នេះជាលើកដំបូងហើយ ដែលកម្ពុជា បង្កើតបានកំណត់ត្រាថ្មី ដោយប្រជែងបាន មេដាយ ក្នុងកម្រិតអាស៊ី។ ប្រសិនបើ រ៉ាចាពៅ អាប់ឌុលឡា ឈ្នះនៅវគ្គផ្ដាច់ព្រ័ត្រ នេះ មានន័យថា កម្ពុជាបានបង្កើតប្រវត្តិសាស្ត្រថ្មី សម្រាប់ប្រដាល់សកលហើយ។ សូមជូនពរឲ្យ រ៉ាចាពៅ អាប់ឌុលឡា ឈ្នះនៅវគ្គផ្ដាច់ព្រ័ត្រនេះ៕ V / N
