ប្រែសម្រួល : កញ្ញាដាលីស (ដេល្លីម៉េល) ៖ ជំទាវទីមួយរបស់អ៊ុយក្រែនលោកស្រី អូឡេណា ហ្សេលេនស្កា (Olena Zelenska) បានមើលប្តីរបស់លោកស្រី លោក វ៉ូឡូឌីមៀ ហ្សេលេនស្គី ដឹកនាំប្រទេសរបស់ពួកគេឆ្លងកាត់សង្គ្រាមរយៈពេល ១១ ខែ ហើយថ្ងៃនេះលោកស្រីបានជូនពរថ្ងៃខួបកំណើតដល់គូស្នេហ៍ពីវ័យកុមាររបស់លោកស្រីនៅក្នុងសារបង្ហោះដ៏រំភើប។
នៅក្នុងសារបង្ហោះអបអរខួបកំណើតគម្រប់អាយុ ៤៥ ឆ្នាំរបស់លោកហ្សេលេនស្គី លោកស្រីហ្សេលេនស្កា អាយុ ៤៤ ឆ្នាំបាននិយាយថា ទោះបីជាហ្សេលេនស្គីគឺជា”ក្មេងប្រុសដូចគ្នាដែលខ្ញុំបានជួបកាលពីយើងមានអាយុ ១៧ ឆ្នាំក៏ដោយ” ក៏ប៉ុន្តែគាត់ “ញញឹមតិចជាងមុនឥឡូវនេះ” បន្ទាប់ពីការឈ្លានពានដ៏ព្រៃផ្សៃរបស់រុស្ស៊ី ដែលបានសម្លាប់ជនស៊ីវិលនិងទាហានអ៊ុយក្រែនរាប់ម៉ឺននាក់។
ម្ដាយកូនពីររូបនេះបានបង្ហោះរូបថតខ្លួននៅក្នុងដៃរបស់លោកហ្សេលេនស្គី ខណៈលោកស្រីសម្លឹងមើលទៅមុខញញឹមពព្រាយ។ លោកស្រីហ្សេលេនស្កាបានសរសេរថា”អូនសូមជូនពរឱ្យបងមានហេតុផលត្រូវញញឹម” ដោយបន្ថែមថា លោកស្រីដឹងថាមានតែជ័យជម្នះរបស់អ៊ុយក្រែនទេទើបសម្រេចរឿងនេះបាន។
លោកស្រីហ្សេលេនស្កាបាននិយាយអំពីស្វាមីរបស់លោកស្រីដែលបានចាកចេញពីអាជីពជាតារាកំប្លែងទៅជាអ្នកដឹកនាំសម័យសង្គ្រាមល្បីជាអន្តរជាតិ យ៉ាងដូច្នេះថា”អូនតែងត្រូវគេសួរជាញឹកញាប់អំពីរបៀបដែលបងបានផ្លាស់ប្តូរយ៉ាងច្រើននៅឆ្នាំនេះ”។
លោកស្រីហ្សេលេនស្កាបានសរសេរថា “ហើយអូនតែងតែឆ្លើយថា ៖ អូនមិនបានផ្លាស់ប្តូរទេ។ បងក៏ដូចគ្នាដែរ។ បងជាបុរសតែមួយ ដែលអូនបានជួបកាលពីយើងមានអាយុ ១៧ ឆ្នាំ”។
លោកស្រីបានបន្ថែមថា “ប៉ុន្តែតាមពិតមានរឿងមួយបានផ្លាស់ប្តូរ ៖ បងញញឹមតិចជាងមុន ឥឡូវនេះ”។
“ឧទាហរណ៍ជាក់ស្តែងដូចនៅក្នុងរូបថតនេះ…ហើយបងដឹងថាថីបានជាអ៊ីចឹង។ យើងទាំងអស់គ្នាបានដឹង”។
“បងមានការប្តេជ្ញាចិត្តគ្រប់គ្រាន់។ រឿងចម្បងគឺថាបងមានសុខភាពល្អគ្រប់គ្រាន់។ ដូច្នេះសូមឱ្យបងមានសុខភាពល្អ! អូនចង់ញញឹមជាមួយបងជានិច្ច។ សូមផ្តល់ឱកាសនេះឱ្យអូនផង!”៕
លោកស្រីហ្សេលេនស្កាជូនពរយ៉ាងរំភើបដល់លោកហ្សេលេនស្គីនៅថ្ងៃខួបគម្រប់ ៤៥ ឆ្នាំកាលពីថ្ងៃពុធទី២៥មករា