ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីអ៊ុយក្រែនកាលពីថ្ងៃព្រហស្បតិ៍ទី២៦មករាបាននិយាយថាពួកគេរំពឹងថាសម្ពន្ធមិត្តលោកខាងលិចនឹងផ្តល់ឱ្យកងកម្លាំងប្រដាប់អាវុធរបស់ពួកគេជាមួយនឹងមីស៊ីលរយៈចម្ងាយឆ្ងាយ បន្ទាប់ពីចក្រភពអង់គ្លេស សហរដ្ឋអាម៉េរិក អាល្លឺម៉ង់និងប្រទេសមួយចំនួនទៀតបានយល់ព្រមបញ្ជូនរថក្រោះដែលរដ្ឋាភិបាលក្រុងគៀវស្វែងរកជាយូរមកហើយ។
ទីប្រឹក្សាប្រធានាធិបតី លោក មីខាអ៊ីឡូ ប៉ូដូលយ៉ាក់ (Mikhailo Podolyak) បានប្រាប់កាសែត The Daily Telegraph ថា “ឥឡូវនេះយើងកំពុងឃើញការផ្លាស់ប្តូរយ៉ាងខ្លាំងនៃមនោសញ្ចេតនាក្នុងចំណោមឥស្សរជននយោបាយនៃបណ្តាប្រទេសអឺរ៉ុប…ខ្ញុំប្រាកដណាស់ថា យើងនឹងឈានដល់កិច្ចព្រមព្រៀងស្តីពីមីស៊ីលរយៈចម្ងាយឆ្ងាយ”។
នៅក្នុងការវាយសំពងដ៏បំផ្លិចបំផ្លាញមួយចំពោះវិមានក្រឹមឡាំង ប្រទេសចំនួនប្រាំបួនបានចូលរួមជាមួយចក្រភពអង់គ្លេសកាលពីថ្ងៃព្រហស្បតិ៍ក្នុងការយល់ព្រមបញ្ជូនរថក្រោះទៅបំផ្លាញកងកម្លាំងរបស់រុស្ស៊ីនៅភាគខាងកើតអ៊ុយក្រែន។ ក្រុមចម្រុះនេះបានចូលរួមជាមួយគ្នាត្រឹមតែ ៤៨ ម៉ោងបន្ទាប់ពីការស្រែកអំពាវនាវរបស់លោក បូរីស ចនសុន នៅក្នុងកាសែត Daily Mailដោយអង្វរដល់សម្ពន្ធមិត្តរបស់ចក្រភពអង់គ្លេសឱ្យបញ្ចប់ការបែកបាក់របស់ពួកគេ។
អាល្លឺម៉ង់នឹងបញ្ជូនរថក្រោះ Leopard 2ចំនួន១៤ គ្រឿងដំបូងគេទៅកាន់អ៊ុយក្រែន ហើយមានបំណងផ្តល់រថក្រោះចំនួន ៨០ គ្រឿងនៅពេលក្រោយទៀត។ នៅក្នុងអ្វីដែលលោកហ្សេលេនស្គីសាទរថាជា “ថ្ងៃប្រវត្តិសាស្ត្រ” សហរដ្ឋអាម៉េរិកបានបញ្ជាក់ថា ខ្លួននឹងផ្គត់ផ្គង់រថក្រោះ Abrams M1ចំនួន៣១ គ្រឿង។ ចក្រភពអង់គ្លេសបាននិយាយរួចហើយថាខ្លួននឹងបញ្ជូនរថក្រោះ Challenger 2 ចំនួន ១៤ គ្រឿង។
ការអះអាងយ៉ាងម៉ឺងម៉ាត់របស់លោកប៉ូដូលយ៉ាក់បានកើតឡើងប៉ុន្មានម៉ោងបន្ទាប់ពីចៅហ្វាយរបស់គាត់ គឺ លោក វ៉ូឡូឌីមៀ ហ្សេលេនស្គីបានជំរុញដោយបើកចំហដល់សម្ពន្ធមិត្តណាតូឱ្យបញ្ជូនមីស៊ីលនិងយន្តហោះចម្បាំងរយៈចម្ងាយឆ្ងាយមកកាន់ប្រទេសហែកហួរដោយសង្គ្រាមនេះដើម្បីជួយវាយបណ្តេញកងទ័ពរុស្ស៊ី។
នៅក្នុងសុន្ទរកថានាពេលរាត្រី លោកហ្សេលេនស្គីបាននិយាយថា “ខ្ញុំបាននិយាយជាមួយអគ្គលេខាធិការអង្គការណាតូ លោក ជែន ស្តូលថិនបឺក (Jens Stoltenberg)នៅថ្ងៃនេះ…យើងក៏ត្រូវតែបើកការបញ្ជូនមីស៊ីលរយៈចម្ងាយឆ្ងាយមកកាន់អ៊ុយក្រែនផងដែរ វាជារឿងសំខាន់ យើងត្រូវពង្រីកកិច្ចសហប្រតិបត្តិការរបស់យើងនៅក្នុងផ្នែកកាំភ្លើងធំ។ នេះគឺជាសុបិនមួយ។ហើយនេះគឺជាកិច្ចការមួយផងដែរ”។
លោកហ្សេលេនស្គីមុននេះបានថ្លែងអំណរគុណដល់មហាអំណាចលោកខាងលិចសម្រាប់ការយល់ព្រមផ្តល់ឱ្យប្រទេសរបស់គាត់នូវរថក្រោះ។ ប៉ូឡូញ ន័រវែស ហ្វាំងឡង់ ហូឡង់ អេស្ប៉ាញ និងព័រទុយហ្គាល់ ឥឡូវនេះក៏បានស្នើសុំបញ្ជូនរថក្រោះ Leopard 2 របស់ពួកគេផងដែរ បន្ទាប់ពីបានទទួលភ្លើងខៀវពីក្រុមហ៊ុនផលិតរបស់អាល្លឺម៉ង់របស់ពួកគេ។
ឯកអគ្គរដ្ឋទូតរុស្ស៊ីប្រចាំប្រទេសអាល្លឺម៉ង់ លោក សឺហ្គេ ណេឆាយេវ (Sergey Nechayev) បានហៅការសម្រេចចិត្តរបស់រដ្ឋាភិបាលក្រុងប៊ែរឡាំងថា “គ្រោះថ្នាក់ខ្លាំង” ដោយនិយាយថាវានឹងផ្លាស់ប្តូរជម្លោះទៅកាន់កម្រិតថ្មីនៃការប្រឈមមុខគ្នា ហើយផ្ទុយនឹងសេចក្តីថ្លែងការណ៍របស់អ្នកនយោបាយអាល្លឺម៉ង់អំពីការស្ទាក់ស្ទើររបស់ពួកគេក្នុងការចូលរួមក្នុងសង្គ្រាម។
បារាំងមិនទាន់បានប្តេជ្ញាចិត្តក្នុងការបញ្ជូនក្រុមរថក្រោះ Leclerc របស់ខ្លួននៅឡើយទេ ប៉ុន្តែឥឡូវនេះលោក អេមម៉ានុយអែល ម៉ាក្រុង កំពុងស្ថិតក្រោមសម្ពាធដើម្បីផ្តល់រថពាសដែកធុនធ្ងន់ឱ្យដូចសម្ពន្ធមិត្តដែរ៕
អ៊ុយក្រែនជឿជាក់ថានឹងទទួលបានមីស៊ីលចម្ងាយឆ្ងាយពីសម្ពន្ធមិត្តលោកខាងលិច