ប្រែសម្រួល : កញ្ញាដាលីស (ប៊ីប៊ីស៊ី) ៖ កីឡាករ ណូវ៉ាក់ ឌីចូកូវិក (Novak Djokovic) បាននិយាយថា ការឈ្នះពាន Australian Openលើកទី ១០ ដើម្បីតាមស្មើកំណត់ត្រាឈ្នះពានរង្វាន់ Grand Slam ចំនួន ២២ របស់កីឡាករ រ៉ាហ្វាអែល ណាដាល់ (Rafael Nadal)គឺជា “ជ័យជម្នះដ៏ធំបំផុត” នៃជីវិតរបស់លោក។
ឌីចូកូវិក អាយុ ៣៥ ឆ្នាំបានផ្តួលកីឡាករ ស្តេហ្វាណូស ធីស៊ីតស៊ីផាស (Stefanos Tsitsipas) ក្នុងទីក្រុងមែលប៊នក្រោយខកខានព្រឹត្តិការណ៍នេះកាលពីឆ្នាំមុនបន្ទាប់ពីត្រូវបាននិរទេសចេញពីប្រទេសអូស្ត្រាលី ដោយសារតែស្ថានភាពនៃការចាក់វ៉ាក់សាំងកូវីដ១៩ របស់ខ្លួន។
រូបគេក៏ត្រូវប្រឈមមុខនឹងរបួសសរសៃពួរនិងរងសម្ពាធដោយសារជម្លោះជាប់ពាក់ព័ន្ធនឹងឪពុករបស់គេផងដែរ។
កីឡាករសញ្ជាតិសែប៊ីរូបនេះបាននិយាយថា “មានតែក្រុមការងារនិងក្រុមគ្រួសារប៉ុណ្ណោះដែលដឹងពីអ្វីដែលយើងបានឆ្លងកាត់ក្នុងរយៈពេលបួនឬប្រាំសប្តាហ៍ចុងក្រោយនេះ”។
“ខ្ញុំអាចនិយាយបានថា នេះប្រហែលជាជ័យជម្នះដ៏ធំបំផុតក្នុងជីវិតរបស់ខ្ញុំ ដោយគិតពីកាលៈទេសៈទាំងនោះ”។
ឌីចូកូវិកត្រូវបានគ្របដណ្តប់ដោយអារម្មណ៍រំជើបរំជួល បន្ទាប់ពីបានយកឈ្នះលើកីឡាករលេខបីក្រិក ធីស៊ីតស៊ីផាស នៅលើទីលាន Rod Laver Arena។
បន្ទាប់ពីឡើងលើវេទិកាដើម្បីអបអរជាមួយក្រុមការងារនិងក្រុមគ្រួសាររបស់ខ្លួន រូបគេបានស្រក់ទឹកភ្នែក ហើយដេកយំក្នុងចំណោមពួកគេ ខណៈទំហំនៃសមិទ្ធិផលរបស់គេគឺធំធេងពេក។
ឌីចូកូវិកបន្តយំ នៅពេលរូបគេត្រឡប់មកកាន់កៅអីរបស់ខ្លួននៅទីលានប្រកួត។
ជ័យជម្នះនេះបានធ្វើឱ្យរូបគេវិលមកកាន់ចំណាត់ថ្នាក់លេខមួយក្នុងពិភពលោកវិញសម្រាប់សប្តាហ៍ទី ៣៧៤ យូរបំផុតមិនធ្លាប់មាន គិតចាប់ពីថ្ងៃចន្ទនេះទៅ៕
ឌីចូកូវិកឈ្នះពាន Australian Open លើកទី ១០ កាលពីថ្ងៃអាទិត្យ