ប្រែសម្រួល : កញ្ញាដាលីស (VNExpress) ៖ បវរកញ្ញាពិភពលោកវៀតណាមឆ្នាំ ២០២២ នាង ម៉ៃ ហ្វឿង (Mai Phuong) បានសុំទោសចំពោះការបង្ហោះ TikTok របស់នាងដែលត្រូវគេរិះគន់ថា “ជ្រុលហួស” និង “ខ្វះភាពថ្លៃថ្នូរនៅលើបណ្តាញសង្គម”។
នាង ម៉ៃ ហ្វឿង បានសារភាពកាលពីថ្ងៃទី ២៦ ខែមករាថា វីដេអូផ្ទាល់ខ្លួនរបស់នាងថ្មីៗនេះនៅលើអនឡាញមាន “កន្លែងសម្រាប់កែលម្អ” ហើយថានាងមានការសោកស្ដាយដែលទង្វើរបស់នាងមួយចំនួនបានធ្វើឱ្យអ្នកគាំទ្រនិងអ្នករាប់អានមានការព្រួយបារម្ភចំពោះមុខមាត់សាធារណៈរបស់នាង។
រាជិនីសម្រស់វ័យ ២៣ ឆ្នាំរូបនេះបាននិយាយថា “ខ្ញុំមិនល្អឥតខ្ចោះទេ ពេលខ្លះខ្ញុំដូចកូនក្មេងអ៊ីចឹង”។ បេក្ខនារីលំដាប់អន្តរជាតិរូបនេះបានឆ្លើយតបនឹងការរិះគន់តាមអ៊ីនធឺណិតដោយជនអនាមិកចំពោះវីដេអូដែលនាងរាំតាមបទភ្លេងយ៉ាងរស់រវើកជាមួយតារាTikTokម្នាក់ ខណៈស្លៀកពាក់ឈុតសិចស៊ី និងបៀមស្ករគ្រាប់។
នាងហ្វឿងបានពន្យល់ដល់អ្នកដែលមិនបានដឹងអំពីឧស្សាហកម្មសម្រស់ថា ផ្នែកមួយនៃលក្ខខណ្ឌការងាររបស់នាងគឺធ្វើយ៉ាងណាឱ្យគេមានអារម្មណ៍រំភើបនិងផ្សព្វផ្សាយព្រឹត្តិការណ៍នានា។
ឆ្លើយតបទៅនឹងការចោទប្រកាន់ថា “ជ្រុលហួសហេតុ”នាង ម៉ៃ ហ្វឿង បាននិយាយថា នាងស្រឡាញ់ភាពរស់រវើក។ នាងថានាងជ្រើសរើសសម្លៀកបំពាក់សាធារណៈនីមួយៗដែលនាងស្លៀកពាក់ស្របតាមអ្វីដែលសមរម្យសម្រាប់ធម្មជាតិនិងទីកន្លែងរបស់មនុស្សម្នាក់ៗ និងព្រឹត្តិការណ៍ផ្សេងៗគ្នា។
ក្នុងឱកាសបុណ្យចូលឆ្នាំថ្មី នាងក៏បានធ្វើឱ្យមហាជនតាមប្រព័ន្ធអ៊ីនធឺណិតខឹងសម្បាផងដែរ នៅពេលនាងបង្ហោះលើបណ្តាញអ៊ីនធឺណិតក្នុងឈុតរ៉ូបវែងបែបប្រពៃណីវៀតណាម អមដោយបទចម្រៀងដែលមានពាក្យថា “ចូលឆ្នាំចិន”។ នាងត្រូវបានគេរិះគន់ថាខ្វះភាពថ្លៃថ្នូរ ហើយបានលុបចោលវីដេអូបង្ហោះនោះយ៉ាងរហ័ស៕
នាង ម៉ៃ ហ្វឿង រងការរិះគន់ទូទាំងវៀតណាមចំពោះការរាំសិចស៊ីមិនសមរម្យ