ប្រែសម្រួល : កញ្ញាដាលីស (ដេល្លីម៉េល) ៖ ប្រមុខការពារជាតិរបស់សហរដ្ឋអាម៉េរិកនិងកូរ៉េខាងត្បូងនឹងជួបពិភាក្សាគ្នានៅថ្ងៃអង្គារនេះនៅទីក្រុងសេអ៊ូលខណៈរដ្ឋាភិបាលក្រុងវ៉ាស៊ីនតោនកំពុងព្យាយាមធានាឡើងវិញដល់សម្ពន្ធមិត្តអាស៊ីដ៏សំខាន់ជុំវិញការប្តេជ្ញាចិត្តនុយក្លេអ៊ែររបស់ខ្លួនចំពេលមានការគំរាមកំហែងកាន់តែខ្លាំងឡើងពីកូរ៉េខាងជើង។
រដ្ឋមន្ត្រីការពារជាតិអាម៉េរិក លោក ឡយ អូស្ទីន បានមកដល់ទីក្រុងសេអ៊ូលកាលពីថ្ងៃចន្ទ ហើយគ្រោងនឹងជួបជាមួយរដ្ឋមន្ត្រីការពារជាតិកូរ៉េខាងត្បូង លោក លី ចុងស៊ុប (Lee Jong-sup) នៅថ្ងៃអង្គារនេះ បន្ទាប់ពីកិច្ចពិភាក្សាសន្តិសុខប្រចាំឆ្នាំរបស់ពួកគេកាលពីខែវិច្ឆិកាក្នុងទីក្រុងវ៉ាស៊ីនតោន។
កិច្ចប្រជុំចុងក្រោយនេះធ្វើឡើង ខណៈកូរ៉េខាងត្បូងជំរុញឱ្យបង្កើនទំនុកចិត្តលើសមត្ថភាពទប់ទល់ខ្ពស់ឡើងរបស់អាម៉េរិក ពោលគឺសមត្ថភាពយោធារបស់ខ្លួន ជាពិសេសកងកម្លាំងនុយក្លេអ៊ែររបស់អាម៉េរិកតែម្តង ដើម្បីទប់ស្កាត់ការវាយប្រហារលើសម្ពន្ធមិត្តរបស់ខ្លួន។
កូរ៉េខាងជើង ដែលមានអាវុធនុយក្លេអ៊ែរ បានបាញ់មីស៊ីលច្រើនគ្រាប់មិនធ្លាប់មានពីមុនកាលពីឆ្នាំមុន រួមទាំងមីស៊ីលឆ្លងទ្វីប (ICBM)ដែលអាចបាញ់ដល់ដីគោកអាម៉េរិក។មន្ត្រីមកពីភាគីទាំងពីរក៏បានព្រមានដែរថា រដ្ឋាភិបាលក្រុងព្យុងយ៉ាងអាចនឹងត្រៀមសាកល្បងអាវុធនុយក្លេអ៊ែរជាលើកដំបូងរបស់ខ្លួនចាប់តាំងពីឆ្នាំ ២០១៧។
ការគម្រាមកំហែងដែលកំពុងវិវត្តរបស់កូរ៉េខាងជើងក៏បានធ្វើឱ្យមានការអំពាវនាវជាថ្មីពីអ្នកនយោបាយនិងអ្នកជំនាញមួយចំនួននៅក្នុងប្រទេសកូរ៉េខាងត្បូងផងដែរសម្រាប់ការនាំយកមកវិញនូវអាវុធនុយក្លេអ៊ែរយុទ្ធសាស្ត្ររបស់អាម៉េរិក ឬសូម្បីអភិវឌ្ឍកម្មវិធីនុយក្លេអ៊ែរដោយខ្លួនឯងទៀតផង ទោះបីជាមន្ត្រីរដ្ឋាភិបាលក្រុងសេអ៊ូលបានច្រានចោលនូវលទ្ធភាពបែបនេះក៏ដោយ។
លោកអូស្ទីនបាននិយាយថា ដំណើររបស់គាត់គឺសំដៅពង្រឹងកិច្ចសហប្រតិបត្តិការឱ្យកាន់តែស៊ីជម្រៅ ដើម្បីដោះស្រាយបញ្ហាប្រឈមផ្នែកសន្តិសុខរួមគ្នា និងបញ្ជាក់ជាថ្មីថាការប្តេជ្ញាចិត្តអំពីសមត្ថភាពទប់ទល់របស់អាម៉េរិកចំពោះកូរ៉េខាងជើងគឺ “មាំដូចដែកថែប” នៅក្នុង “គ្រានៃភាពតានតឹងនិងការបង្កហេតុកាន់តែខ្ពស់ឡើង”។
លោកអូស្ទីនបាននិយាយនៅក្នុងការចេញផ្សាយព័ត៌មានពិសេសមួយនៅថ្ងៃអង្គារនេះដោយទីភ្នាក់ងារសារព័ត៌មានយ៉ុនហាប់យ៉ាងដូច្នេះថា”នោះហើយជាមូលហេតុដែលសហរដ្ឋអាម៉េរិកនិងកូរ៉េខាងត្បូងកំពុងចាត់វិធានការច្បាស់លាស់និងមានអត្ថន័យដើម្បីធ្វើទំនើបកម្ម និងពង្រឹងសម្ពន្ធភាពរបស់យើង”។
លោកបានបន្ថែមថា “ដូច្នេះគូប្រជែងនិងគូសត្រូវរបស់យើងដឹងថា ប្រសិនបើពួកគេប្រជែងជាមួយយើង ពួកគេកំពុងប្រជែងជាមួយសម្ពន្ធភាពអាម៉េរិក-កូរ៉េខាងត្បូងទាំងមូល”៕
លោកអូស្ទីនមកដល់កូរ៉េខាងត្បូងនៅថ្ងៃអង្គារនេះ