ប្រែសម្រួល : កញ្ញាដាលីស (ស្ត្រេតថែមស៍) ៖ តារាសម្ដែងកូរ៉េខាងត្បូង សុង ជុងគី (Song Joong-ki)បានបញ្ជាក់ថា លោកបានរៀបការជាមួយមិត្តស្រីសញ្ជាតិអង់គ្លេស នាង ខាធី ល្វីស សោនឌឺ (Katy Louise Saunders) ហើយថានាងមានផ្ទៃពោះ។
លោកសុងវ័យ ៣៧ឆ្នាំ បានសរសេរក្នុងសំបុត្រផ្ញើទៅកាន់អ្នកគាំទ្រ ដែលបង្ហោះនៅលើវេបសាយផ្លូវការ Fan Cafe កាលពីរសៀលថ្ងៃចន្ទទី៣០មករាថា “ខ្ញុំសូមជំរាបសួរអ្នកទាំងអស់គ្នានៅថ្ងៃនេះ ព្រោះខ្ញុំចង់ចែករំលែកការសន្យាដែលខ្ញុំបានធ្វើ ដែលមានតម្លៃសម្រាប់ខ្ញុំជាងអ្វីៗទាំងអស់”។
“ខ្ញុំបានសន្យាថានឹងបន្តជីវិតរបស់ខ្ញុំជាមួយ ខាធី ល្វីស សោនឌឺ ដែលនៅក្បែរខ្លួនខ្ញុំ គាំទ្រខ្ញុំ និងជាមនុស្សម្នាក់ដែលខ្ញុំបានចំណាយពេលដ៏មានតម្លៃជាមួយ ព្រោះតែយើងស្រលាញ់គ្នា”។
តារា K-drama ដែលទើបតែសម្តែងក្នុងរឿងភាគទូរទស្សន៍ Reborn Rich (២០២២) និង Vincenzo (២០២១) បាននិយាយថា ពួកគេទើបតែត្រឡប់មកពីចុះសំបុត្រអាពាហ៍ពិពាហ៍របស់ពួកគេ ហើយបន្ថែមថានាងមានផ្ទៃពោះហើយ។
លោកបានសរសេរថា “ពិតណាស់ យើងសុបិនចង់បង្កើតគ្រួសារដ៏រីករាយជាមួយគ្នា។ យើងបានខិតខំប្រឹងប្រែងយ៉ាងច្រើនដើម្បីរក្សាការសន្យារបស់គ្នាទៅវិញទៅមក ហើយយើងពិតជាអរគុណដោយស្មោះនៅពេលដែលជីវិតថ្មីបានចូលក្នុងជីវិតរបស់ពួកយើង”។
លោកសុង ដែលបានបង្ហាញខ្លួនជាលើកដំបូងនៅក្នុងខ្សែភាពយន្ត A Frozen Flower ឆ្នាំ ២០០៨ បានថ្លែងអំណរគុណដល់អ្នកគាំទ្ររបស់គាត់សម្រាប់ការគាំទ្រ ខណៈគាត់ប្តេជ្ញាថានឹងក្លាយជាមនុស្សល្អជាងមុន ជាមួយនឹងការទទួលខុសត្រូវនិងមហិច្ឆតាកាន់តែខ្ពស់៕
ជុងគីនិងសោនឌឺប្រកាសរៀបការ