ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកនិងសម្ពន្ធមិត្តរបស់ខ្លួនបានដាក់ទណ្ឌកម្មបន្ថែមទៀតលើមីយ៉ាន់ម៉ាកាលពីថ្ងៃអង្គារទី៣១មករាដោយប្រារព្ធខួបពីរឆ្នាំនៃរដ្ឋប្រហារយោធាជាមួយនឹងការរឹតត្បិតលើក្រុមមន្ត្រីថាមពលនិងសមាជិករបបយោធាក្នុងចំណោមអ្នកដទៃទៀត។
រដ្ឋាភិបាលក្រុងវ៉ាស៊ីនតោនបានដាក់ទណ្ឌកម្មលើគណៈកម្មការបោះឆ្នោតសហភាព សហគ្រាសរ៉ែ និងមន្ត្រីថាមពលក្នុងចំណោមអ្នកដទៃទៀត នេះបើតាមសេចក្តីថ្លែងការណ៍របស់ក្រសួងរតនាគារ។ ព័ត៌មានលម្អិតនៃការសម្រេចចិត្តនេះត្រូវបានរាយការណ៍ដំបូងដោយទីភ្នាក់ងារសារព័ត៌មានរ៉យទ័រ។
អ្នកនាំពាក្យក្រសួងរតនាគារអាម៉េរិកបាននិយាយថា វាជាលើកដំបូងហើយដែលសហរដ្ឋអាម៉េរិកបានកំណត់គោលដៅទៅលើមន្ត្រីសហគ្រាសប្រេងនិងឧស្ម័នមីយ៉ាន់ម៉ា (MOGE)ក្រោមកម្មវិធីដាក់ទណ្ឌកម្មមីយ៉ាន់ម៉ានាពេលបច្ចុប្បន្ន។
កាណាដា អូស្ត្រាលី និងចក្រភពអង់គ្លេសក៏បានប្រកាសដាក់ទណ្ឌកម្មផងដែរ។
ក្រុមឧត្តមសេនីយ៍កំពូលរបស់មីយ៉ាន់ម៉ាបានដឹកនាំរដ្ឋប្រហារក្នុងខែកុម្ភៈ ឆ្នាំ ២០២១បន្ទាប់ពីការចែករំលែកអំណាចគ្នាដ៏តានតឹងប្រាំឆ្នាំក្រោមប្រព័ន្ធនយោបាយពាក់កណ្តាលស៊ីវិលដែលបង្កើតឡើងដោយយោធា ហើយដែលនាំទៅដល់ការផ្លាស់ប្តូរមិនធ្លាប់មានពីមុនមក។
មីយ៉ាន់ម៉ាបានស្ថិតក្នុងភាពចលាចលចាប់តាំងពីរដ្ឋប្រហារមក ខណៈសមាជិកក្នុងចលនាតស៊ូមួយបានចេញមកប្រយុទ្ធនឹងយោធានៅសមរភូមិជួរមុខជាច្រើន បន្ទាប់ពីការបង្ក្រាបយ៉ាងបង្ហូរឈាមលើក្រុមប្រឆាំ។
យោងតាមក្រសួងរតនាគារបានឱ្យដឹងថា ការដាក់ទណ្ឌកម្មរបស់សហរដ្ឋអាម៉េរិកកាលពីថ្ងៃអង្គារបានកំណត់គោលដៅទៅលើនាយកគ្រប់គ្រងនិងនាយករងគ្រប់គ្រងនៃសហគ្រាស MOGEជាសហគ្រាសរដ្ឋដែលបង្កើតប្រាក់ចំណូលធំបំផុតតែមួយគត់របស់របបយោធា។
ក្រុមអ្នកតស៊ូមតិសិទ្ធិមនុស្សបានអំពាវនាវឱ្យមានការដាក់ទណ្ឌកម្មលើសហគ្រាស MOGE ប៉ុន្តែរហូតមកទល់ពេលនេះរដ្ឋាភិបាលក្រុងវ៉ាស៊ីនតោនមិនទាន់ហ៊ានធ្វើនៅឡើយទេ។
រដ្ឋមន្ត្រីក្រសួងថាមពលមីយ៉ាន់ម៉ាក៏ជាប់ទណ្ឌកម្មដែរ ដែលក្រសួងរតនាគារនិយាយថា តំណាងឱ្យរដ្ឋាភិបាលមីយ៉ាន់ម៉ាក្នុងការចូលរួមផ្នែកថាមពលអន្តរជាតិនិងក្នុងស្រុកហើយនឹងគ្រប់គ្រងក្រុមហ៊ុនរបស់រដ្ឋដែលពាក់ព័ន្ធនឹងការផលិតនិងការនាំចេញប្រេងនិងឧស្ម័ន។
សហគ្រាសរ៉ែលេខ ១ និងសហគ្រាសរ៉ែលេខ ២ ដែលជាសហគ្រាសគ្រប់គ្រងដោយរដ្ឋ ក៏ដូចជាគណៈកម្មការរៀបចំការបោះឆ្នោតសហភាព ក៏ត្រូវបានរងទណ្ឌកម្មដោយរដ្ឋាភិបាលក្រុងវ៉ាស៊ីនតោនផងដែរ៕
សកម្មជនទាមទារអោយដាក់ទណ្ឌកម្មថែមលើសហគ្រាសប្រេងនិងហ្គាសមីយ៉ាន់ម៉ា