ប្រែសម្រួល : កញ្ញាដាលីស,បំណង (ស្ត្រេតថែមស៍,បាងកកប៉ុស្តិ៍) ៖ ប៉ូលិសថៃបានសុំទោសចំពោះឧបទ្ទវហេតុមួយ ដែលប៉ូលិសបានជំរិតទារប្រាក់ពីតារាសម្ដែងតៃវ៉ាន់ម្នាក់ ដែលបានមកលេងទីក្រុងបាងកក។
តារាសម្ដែង នាង ឆាលីន អាន (Charlene An)បានបង្ហោះនៅលើបណ្ដាញសង្គមថា នាងបានចេញទៅក្រៅជាមួយមិត្តភក្តិកាលពីព្រលឹមថ្ងៃទី ៥ ខែមករានៅពេលដែលមានហេតុការណ៍នេះកើតឡើង។
នាងបាននិយាយថា ពួកគេកំពុងធ្វើដំណើរតាមតាក់ស៊ី Grabបន្ទាប់ពីដើរលេងពេញមួយយប់ក្នុងរាជធានីថៃ នៅពេលដែលពួកគេត្រូវបានឃាត់និងឆែកឆេរនៅប៉ុស្តិ៍ត្រួតពិនិត្យមួយ។
នាងអាន អាយុ ៣៣ ឆ្នាំបាននិយាយថា នាងត្រូវបានគំរាមចោទពីបទមានឧបករណ៍ជក់ឬបារីអេឡិចត្រូនិក។ នាងបានបង់ប្រាក់ចំនួន ២៧.០០០ បាតមុនពេលនាងនិងមិត្តភក្តិរបស់នាងអាចចាកចេញបាន។
ការចោទប្រកាន់របស់នាងអានប្រឆាំងនឹងប៉ូលិសថៃបានទាក់ទាញចំណាប់អារម្មណ៍អ្នកលេងអ៊ីនធឺណិតទាំងនៅតៃវ៉ាន់និងថៃ។ ដំបូងឡើយ ប៉ូលិសថៃបានជំទាស់នឹងការអះអាងរបស់នាងប៉ុន្តែគណៈកម្មាធិការស្វែងរកការពិតមួយត្រូវបានបង្កើតឡើងនៅថ្ងៃទី ២៦ ខែមករា ដើម្បីស៊ើបអង្កេតករណីនេះ។
កាលពីថ្ងៃចន្ទ ក្រុមស្រាវជ្រាវរកការពិតបានចោទប្រកាន់មន្ត្រីប៉ូលិសទាំង ៧ នាក់នោះ។
ក្រុមស្រាវជ្រាវបានចោទប្រកាន់ពួកគេពីបទ “ប្រព្រឹត្តខុសឬប្រព្រឹត្តទង្វើមិនគួរឱ្យទុកចិត្តដើម្បីបង្កការខូចខាតដល់បុគ្គលណាមួយ ឬប្រព្រឹត្តការមិនគោរពកាតព្វកិច្ចដោយចេតនាមិនស្មោះត្រង់”។
នាងអានដែលអះអាងថាត្រូវប៉ូលិសថៃជំរិតទារលុយ២៧.០០០បាតអំឡុងពេលនាងមកលេងបាងកកកាលពីថ្ងៃទី៥មករាកន្លងទៅ
ជុំវិញឧបទ្ទវហេតុនេះដែរ នាយករដ្ឋមន្ត្រីថៃលោកប្រាយុទ្ធ ចាន់អូចា បាននិយាយថាមន្ត្រីប៉ូលីសថៃណាដែលជាប់ពាក់ព័ន្ធនឹងការជំរិតទារប្រាក់ពីតារាតៃវ៉ាន់រូបនេះត្រូវតែប្រឈមការពិន័យនិងបណ្តឹងទៅតុលាការ។
នាយករដ្ឋមន្ត្រីថៃលោកប្រាយុទ្ធ ចាន់អូចា ប្រតិកម្មនឹងព័ត៌មានថា ប៉ូលីសថៃជំរិតទារប្រាក់ពីទេសចរ
ដោយថាវាប៉ះពាល់ដល់វិស័យទេសចរណ៍ថៃ ឧត្តមសេនីយ៍ប្រាយុទ្ធ បាននិយាយថា មន្ត្រីប៉ូលីសណាមានជាប់ពាក់ព័ន្ធនឹងការជំរិតទារលុយពីទេសចរត្រូវតែកែតំរូវនិងទទួលវិន័យ ហើយបើច្បាស់ថាពួកគេបានប្រព្រឹត្តល្មើស«ពួកគេត្រូវប្រឈមការពិន័យផងនិងចំណាត់ការផ្លូវច្បាប់ផង»។
លោកបានបន្តថា« នៅមានប៉ូលិសមិនត្រឹមត្រូវជាច្រើន តែយើងត្រូវកំចាត់ប៉ូលីសខិលខូចជាមុនសិន»។
មេប៉ូលីសថៃ ឧត្តមសេនីយ៍ដាំរ៉ុងសាក់ គិតទីប្រាផាស បានចេញមកសុំទោសអ្នកដែលរងផលប៉ះពាល់ពីអំពើរបស់កូនចៅលោកនិងថាប៉ូលីសភាគច្រើនបំផុតបានលះបង់បំពេញភារកិច្ចរបស់ខ្លួន។
ការស៊ើបអង្កេតរឿងនេះអាចទៅដល់តៃវ៉ាន់និងសិង្ហបុរី កន្លែងដែលជនរងគ្រោះស្នាក់នៅ ហើយប្រភពព័ត៌មានបាននិយាយថា ប៉ូលីស១៤នាក់ត្រូវបានហៅមកសាកសួរតែពួកគេបានបដិសេធថាមិនបានប្រព្រឹត្តដូចការចោទប្រកាន់ទេ៕