ដោយៈប.ខុន/ភ្នំពេញៈភ្លៀងដោយសារឥទ្ធិពលសម្ពាធទាបរុញមកពីសមុទ្រចិនខាងត្បូងចាប់ផ្តើមធ្លាក់លើតំបន់ទំនាបកណ្តាលភាគអaគ្នេយ៍ ហើយធ្លាក់រាយប៉ាយមានវិសាលភាពកាន់ តែធំទូលាយរហូតទៅដល់តំបន់ខ្ពង់រាបមានកម្រិតពីខ្សោយទៅមធ្យមនៅថ្ងៃទី០២ ខែកុម្ភៈ និងអស់ទៅវិញនៅថ្ងៃទី៤ ខែកុម្ភៈ ខណៈពេលសីតុណ្ហភាពបានកើនឡើងជាលំដាប់មកវិញ។ តែខ្យល់នៅលើផ្ទៃសមុទ្រនៅតែមានបក់បោកខ្លាំងរាល់ថ្ងៃពេលព្រឹករហូតដល់ចុងសប្តាហ៍នេះទើបស្ងប់ទៅវិញ។
លោកចាន់ យុត្ថា អ្នកនាំពាក្យ និងជារដ្ឋលេខាធិការក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី០១ ខែកុម្ភៈ ឆ្នាំ២០២៣ថា ភ្លៀងដោយសារឥទ្ធិពលសម្ពាធទាបរុញមកពីសមុទ្រចិនខាងត្បូងចាប់ផ្តើមកើតមាននៅល្ងាចថ្ងៃទី០១ ខែកុម្ភៈ លើតំបន់ទំនាបកណ្តាលភាគអាគ្នេយ៍ និងមានវិសាលភាពរាយប៉ាយកាន់តែធំទៅដល់តំបន់ខ្ពង់រាបនៅថ្ងៃទី០២ខែកុម្ភៈដោយមានបរិមាណពីតិចទៅមធ្យមរួចហើយចុះខ្សោយទៅវិញនៅថ្ងៃទី៣ខែកុម្ភៈ។
អ្នកនាំពាក្យក្រសួងជំនាញខាងលើនិយាយឱ្យដឹងទៀតថាភ្លៀងធ្លាក់រាយប៉ាយមិនស្មើនេះកើតមាននៅគ្រប់តំបន់គ្រាន់តែនៅកន្លែងខ្លះតិចតួចហើយអស់ទៅវិញនៅថ្ងៃទី៤ ខែកុម្ភៈ ខណៈពេលធាតុអាកាសត្រជាក់បានថយឥទ្ធិពលទៅវិញជាលំដាប់។ ចំពោះខ្យល់នៅលើផ្ទៃសមុទ្រនៅបន្តមានឥទ្ធិពលខ្លាំងរហូតដល់ចុងសប្តាហ៍នេះ ជាពិសេស រាល់ថ្ងៃនៅពេលព្រឹក និងចុះខ្សោយទៅវិញនៅពេលរសៀល។
ក្រសួងធនធានទឹក និងឧតុនិយមកាលថ្ងៃទី៣១ ខែមករា ឆ្នាំ២០២៣ បានជូនដំណឹងស្តីពីស្ថានភាពអាកាសធាតុសម្រាប់ពីថ្ងៃទី១ ដល់ថ្ងៃទី៧ ខែកុម្ភៈថា នៅក្នុងអំឡុងពេលនេះ ព្រះរាជាណាចក្រកម្ពុជាបន្តទទួលឥទ្ធិពលទ្រនុងសម្ពាធខ្ពស់ពីប្រទេសចិនជាមួយនឹងខ្យល់មូសុងឦសានមានឥទ្ធិពលខ្សោយ នាំឱ្យអាចមានភ្លៀងធ្លាក់រាយប៉ាយ មិនស្មើនៅគ្រប់តំបន់ក្នុងកម្រិតពីខ្សោយទៅមធ្យម។
ក្នុងសេចក្តីជូនដំណឹងបានសរសេរទៀតថាស្ថានភាពបែបខាងលើធ្វើឲ្យតំបន់វាលទំនាបកណ្តាលមានសីតុណ្ហភាពអប្បបរមាពី២៣ទៅ២៥អង្សាសេ សីតុណ្ហភាពអប្បបរមាមានពី៣២ទៅ៣៥អង្សាសេ។ អាចមានភ្លៀងធ្លាក់ក្នុងកម្រិតពីខ្សោយទៅមធ្យមដោយអន្លើ។
នៅតំបន់ខ្ពង់រាបមានសីតុណ្ហភាពអប្បបរមាពី២២ទៅ២៤អង្សាសេ សីតុណ្ហភាពអតិបរមាមានពី៣២ទៅ៣៤អង្សាសេ។អាចមានភ្លៀងធ្លាក់ក្នុងកម្រិតពីខ្សោយទៅ មធ្យមដោយអន្លើ។
សម្រាប់តំបន់មាត់សមុទ្រមានសីតុណ្ហភាពអប្បបរមាពី២២ទៅ២៤អង្សាសេ សីតុណ្ហភាពអប្បបរមាមានពី៣២ទៅ៣៤អង្សាសេ ។ អាចមានភ្លៀងធ្លាក់ក្នុងកម្រិតខ្សោយ៕R