ប្រែសម្រួលៈបំណង(ដេល្លីម៉េល)៖ប្រធានាធិបតីរុស្ស៊ីកាលពីថ្ងៃព្រហស្បតិ៍បានប្តេជ្ញាឆ្លើយតបដាច់ខាតចំពោះប្រទេសណាដែលគំរាមរុស្ស៊ីនិងបានរិះគន់អាល្លឺម៉ង់ចំពោះការសន្យាផ្តល់រថក្រោះដល់រដ្ឋាភិបាលទីក្រុងគៀវ។
ការគំរាមរបស់លោកកើតឡើងក្រោយពីប្រធានាធិបតីអ៊ុយក្រែនលោកហ្សេឡេនស្គីបានព្រមានថា រដ្ឋាភិបាលទីក្រុងមូស្គូកំពុងប្រមូលផ្តុំកម្លាំងសំរាប់បើកការវាយប្រហារថ្មីមួយ។លោកបាននិយាយថា«រុស្ស៊ីកំពុងត្រៀមសងសឹក មិនត្រឹមតែអ៊ុយក្រែនតែលើអឺរ៉ុបសេរីនិងពិភពសេរី»ទៀតផង។
លោកហ្សេឡេនស្គីបានថ្លែងដូច្នេះនៅទីក្រុងគៀវជាមួយប្រធានសហភាពអឺរ៉ុបលោកស្រីអឺស៊ូឡា វ៉ុន ដឺ ឡេយេន( Ursula von der Leyen)ដែលបាននិយាយថាប្លុករបស់លោកស្រីកំពុងសម្លឹងរកទណ្ឌកម្មថ្មីលើរុស្ស៊ីនៅមិនអោយហួសថ្ងៃ២៤កុម្ភៈ ដែលជាខួបមួយឆ្នាំដែលលោកពូទីនបញ្ជាទ័ពចូលអ៊ុយក្រែន។
នៅទីក្រុង វ៉ុលហ្គោហ្ក្រាដ(Volgograd)នៅរុស្ស៊ីភាគខាងត្បូង លោកពូទីនបាននិយាយថា«វាមិនគួរអោយជឿ តែជាការពិត។ជាថ្មីទៀតយើងត្រូវបានគំរាមដោយរថក្រោះLeopard។ យើងនឹងមានអ្វីមួយត្រូវឆ្លើយតប។សង្គ្រាមសម័យទំនើបណាមួយជាមួយរុស្ស៊ីនឹងខុសប្លែកពីមុនទាំងស្រុង»។
ពូទីន៖ រាប់ទសវត្សរ៍ក្រោយសង្គ្រាមលោកលើកទីពីរ រុស្ស៊ីជាថ្មីទៀតត្រូវបានគំរាមដោយរថក្រោះ Leopardsរបស់អាល្លឺម៉ង់
លោកបាននិយាយដូច្នេះនៅក្នុងពិធីមួយដើម្បីរំឭកដល់ជ័យជម្នះរបស់កងទ័ពក្រហមលើទាហានណាស៊ីកាលពី៨០ឆ្នាំមុននៅ ក្រុងស្តាលីហ្ក្រាដ(Stalingrad)។
សូមរំលឹកថា អ៊ុយក្រែននៅខែមុនទទួលបានការសន្យាប្រគល់រថក្រោះទំនើបរាប់រយគ្រឿងពីលោកខាងលិច រួមទាំងរថក្រោះអាល្លឺម៉ង់ផងដើម្បីអោយកងកម្លាំងអ៊ុយក្រែនប្រយុទ្ធទប់ទល់និងវាយបកលើកងកម្លាំងរុស្ស៊ី។
រុស្ស៊ីបាននិយាយថា ខ្លួនកំពុងថ្លឹងថ្លែងទណ្ឌកម្មដាក់ដោយសម្ពន្ធមិត្តលោកខាងលិច ហើយនឹងបន្តយុទ្ធនាការយោធារបស់ខ្លួននៅអ៊ុយក្រែន។តែលោកស្រីអឺស៊ូឡា វ៉ុន ដឺ ឡេយេនបាននិយាយថា ទណ្ឌកម្មបានបំផ្លាញសេដ្ឋកិច្ចរុស្ស៊ីរួចស្រេចទៅហើយ ដោយ«រុញវាថយក្រោយមួយជំនាន់ឯណោះ»។
លោកស្រីបានប៉ាន់ស្មានថា ការកំណត់ថ្លៃប្រេងរុស្ស៊ីកន្លងមកក៏បណ្តាលអោយរដ្ឋាភិបាលទីក្រុងមូស្គូខាតបង់ប្រាក់ប្រមាណ១៦០លានអឺរ៉ូក្នុងមួយថ្ងៃៗ។«យើងនឹងណែនាំដៃគូក្នុងក្រុមG7របស់យើងអោយកំណត់ថ្លៃប្រេងរុស្ស៊ីអោយកាន់តែទាបឡើងនៅយ៉ាងយូរត្រឹមថ្ងៃ២៤កុម្ភៈ ដែលជាខួបនៃការឈ្លានពានរបស់រុស្ស៊ីលើអ៊ុយក្រែន»។
ប្រធានាធិបតីអ៊ុយក្រែនលោកហ្សេឡេនស្គី និងប្រធានសហភាពអឺរ៉ុបលោកស្រីអឺស៊ូឡា វ៉ុន ដឺ ឡេយេន នៅទីក្រុងគៀវកាលពីថ្ងៃ២កុម្ភៈ
នៅទីក្រុងមូស្គូ រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បាននិយាយថា សហភាពអឺរ៉ុបជាពិសេសលោកស្រីអឺស៊ូឡា វ៉ុន ដឺ ឡេយេនបានអំពាវនាវអោយផ្ចាញ់រុស្ស៊ីដើម្បីអោយសេដ្ឋកិច្ចប្រទេសនេះហិនហោច។«តើនេះមិនជាជាតិសាសន៍និយម ណាស៊ីនិយមទេឬ?»។
សម្តីរបស់លោកឡាវរ៉ូវ បានឆ្លុះបន្ថែមអំពីសម្តីរបស់លោកពូទីន ដែលតែប្រៀបធៀប«ប្រតិបត្តិការយោធាពិសេសរបស់រុស្ស៊ី»នៅអ៊ុយក្រែនទៅនឹង«សង្គ្រាមរបស់សូវៀតប្រឆាំងអាល្លឺម៉ង់ណាស៊ី។កាលពីឆ្នាំមុនលោកពូទីនបាននិយាយថា រុស្ស៊ីត្រូវការ«កំចាត់ចោលពួកណាស៊ី»នៅអ៊ុយក្រែន៕