ការាតេ សម្លឹងរកមេដាយមាស ៤ គ្រឿង ពីស៊ីហ្គេម

ដោយៈ សុវណ្ណកុម្ភៈ / ភ្នំពេញ: គ្រូបង្វឹកការាតេជម្រើសជាតិ បានរំពឹងទុកថា ការាតេកំពុងតែបង្កើនការហ្វឹកហាត់ ដើម្បីស្វែងរកមេដាយមាស ៤ គ្រឿង ពីស៊ីហ្គេម លើកទី៣២នាពេលខាងមុខនេះ។

លោក ហេង ផេង ប្រធានគ្រូបង្វឹកជម្រើសជាតិ បានឲ្យដឹងថាៈ គណ:កម្មាធិការជាតិរៀបចំស៊ីហ្គេម ឆ្នាំ២០២៣ (Camsoc) បានដាក់សន្ទស្សន៍ឲ្យការាតេ រកមេដាយមាសឲ្យបាន ២ គ្រឿង តែថ្នាក់ដឹកនាំសហព័ន្ធ បានយកចិត្តទុកដាក់ខ្ពស់ ជាពិសេសកីឡាករ
កីឡាការិនី ដែលធ្លាប់ដណ្ដើមបានមេដាយ ពីព្រឹត្តិការណ៍ប្រកួត ជាអន្តរជាតិនានាដើម្បីឈានទៅរកមេដាយមាស ចំនួន ៤ គ្រឿង។

អ្នកដែលធ្លាប់បានមេដាយសំរិទ្ធ នាស៊ីហ្គេមលើកទី៣១ នៅវៀតណាម សហព័ន្ធជំរុញគេឲ្យប្រជែងយកមេដាយមាស ចំពោះអ្នកដែលបានមេដាយមាស ក្នុងព្រឹត្តិការណ៍ជើងឯកអាស៊ីអាគ្នេយ៍ ដែលកម្ពុជាធ្វើម្ចាស់ផ្ទះ កន្លងមក គឺជំរុញគេឲ្យរក្សាមេដាយមាសជាបន្ដ។

ចំពោះវិញ្ញាសាសម្ដែងជាក្រុមនារី ដែលដណ្ដើមបានចំណាត់ថ្នាក់លេខ៣ ក្នុងការប្រកួតការាតេជើងឯកពិភពលោក K-1 នៅប្រទេសឥណ្ឌូណេស៊ី កន្លងមក ក៏ជាគោលដៅស្វែងរកមេដាយមាសដែរ។

សមាសភាពក្រុមជម្រើសជាតិពេលនេះ មានចំនួន ២៨ នាក់ ក្នុងនោះ កីឡាករ ១២ នាក់និងកីឡាការិនី ចំនួន ១៦ នាក់។ ការហ្វឹកហាត់ ចែកចេញជាវិញ្ញាសាធំៗ ចំនួន ២គឺវិញ្ញាសាប្រយុទ្ធ និងសម្ដែង។

សម្រាប់ស៊ីហ្គេមលើកទី៣២ ខាងមុខនេះ វិញ្ញាសាសម្ដែង មាន ១៧ វិញ្ញាសា ក្នុងនោះនារីមាន ៨ វិញ្ញាសា បុរស ៩ វិញ្ញាសា។ សម្រាប់វិញ្ញាសាប្រយុទ្ធវិញ បុរសមាន ៥ វិញ្ញាសាគឺទម្ងន់ក្រោម ៥៥ គីឡូក្រាម ក្រោម ៦០ គីឡូក្រាម ក្រោម ៧៥ គីឡូក្រាម ក្រោម ៨៨
គីឡូក្រាម និងចាប់ពី ៨៨ គីឡូក្រាមឡើង។ ចំពោះនារី មានទម្ងន់ ៥០ គីឡូក្រាម ក្រោម៥៥ គីឡូក្រាម ក្រោម ៦១ គីឡូក្រាម ក្រោម ៦៨ គីឡូក្រាម និងវិញ្ញាសាប្រយុទ្ធ​ជាក្រុម។

លោក ហេង ផេង បានអះអាងថាៈ ២​ឆ្នាំចុងក្រោយនេះ យើងត្រៀមខ្លួនបានល្អ កីឡាករកីឡាការិនី ក៏បង្ហាញពីឆន្ទៈមោះមុត ព្រោះព្រឹត្តិការណ៏ស៊ីហ្គេមនេះ ជាឱកាសសម្រាប់ម្ចាស់ផ្ទះ បន្ទាប់ពីយើងរង់ចាំ ៦៤ ឆ្នាំមកនោះ៕ V / N