ប្រែសម្រួល : កញ្ញាដាលីស (ប៊ីប៊ីស៊ី) ៖ នៅពេលដែលនាង ជូលៀត ឡាមួរ (Juliette Lamour) បានឈ្នះឆ្នោតឡូតូលើការសាកល្បងលេងជាលើកដំបូង ក្មេងជំទង់រូបនេះភ្លាមៗបានទូរស័ព្ទទៅរកអ្នករៀបចំផែនការហិរញ្ញវត្ថុ ឬ ឪពុករបស់នាងមួយរំពេច។
ក្មេងជំទង់វ័យ ១៨ ឆ្នាំរូបនេះទើបតែទទួលបាន ៤៨ លានដុល្លារកាណាដា (៣៥,៨ លានដុល្លារអាម៉េរិក) ក្លាយជាជនជាតិកាណាដាក្មេងបំផុតដែលឈ្នះរង្វាន់ធំបែបនេះ។
ប៉ុន្តែខណៈក្មេងជំទង់ជាច្រើន ដែលស្រាប់តែមានទ្រព្យសម្បត្តិភ្លាមៗមិននឹកស្មានដល់បែបនេះ ផ្ទុះការរីករាយខ្លាំងនោះ នាងឡាមួរមានបំណងរក្សាភាពសាមញ្ញ។
និស្សិតសាកលវិទ្យាល័យរូបនេះគ្រោងនឹងសិក្សាឱ្យចប់ក្លាយជាវេជ្ជបណ្ឌិត។
នាងបាននិយាយនៅឯក្រុមហ៊ុនមួយ កាលពីថ្ងៃសុក្រ ខណៈនាងអបអរការឈ្នះកាលពីខែមុនថា “ខ្ញុំបានស្រែកយំ ដែលជាទឹកភ្នែករីករាយ”។
“ខ្ញុំនៅតែមិនជឿថាខ្ញុំបានឈ្នះរង្វាន់ឆ្នោត Gold Ball Jackpot នៅលើសន្លឹកឆ្នោតដំបូងរបស់ខ្ញុំ!”។
នាងឡាមួរមកពីទីក្រុងស៊ុលស្តេម៉ារី (Sault Ste. Marie) ខេត្តអនថារីអូ (Ontario) បាននិយាយថានាងភ្លេចអស់នូវសន្លឹកឆ្នោតរបស់នាងរហូតដល់នាងបានទទួលដំណឹងថាមានមនុស្សម្នាក់មកពីស្រុកកំណើតរបស់នាងបានឈ្នះឆ្នោតដែលចាប់កាលពីថ្ងៃទី ៧ មករា។
នៅពេលនាងទៅពិនិត្យសន្លឹកឆ្នោតរបស់នាងតាមរយៈកម្មវិធីទូរស័ព្ទ សំឡេងសើចចាប់ផ្តើមបន្លឺឡើង ហើយពាក្យថា “ម្ចាស់ជ័យលាភីធំ” បានបង្ហាញនៅលើអេក្រង់។
នាងឡាមួរបាននិយាយថា “មិត្តរួមការងាររបស់ខ្ញុំបានលុតជង្គង់ទាំងមិននឹកស្មានដល់។ គាត់បានស្រែកហ៊ោ។ ពិតណាស់ មនុស្សគ្រប់គ្នានាំគ្នាស្រែកថា ខ្ញុំឈ្នះ ៤៨ លានដុល្លារ”។
ថៅកែរបស់នាងបានប្រាប់នាងថានាងអាចចេញពីធ្វើការមុនម៉ោងបាន ប៉ុន្តែម្តាយរបស់នាងបានទទូចឱ្យនាងធ្វើការដល់ចប់ម៉ោង៕
នាង ជូលៀត ឡាមួរ ឈ្នះ ៣៥,៨ លានដុល្លារអាម៉េរិក