ប្រែសម្រួល : កញ្ញាដាលីស (ស្ត្រេតថែមស៍) ៖ ក្មេងប្រុសអាម៉េរិកអាយុ ៩ ឆ្នាំម្នាក់ ដែលចូលចិត្តវិទ្យាសាស្ត្រកុំព្យូទ័រនិងការសរសេរកម្មវិធីបានក្លាយជាមនុស្សវ័យក្មេងជាងគេនៅសហរដ្ឋអាម៉េរិកដែលបានបញ្ចប់ការសិក្សានៅវិទ្យាល័យ។
ដេវីដ បាឡូហ្គាន់ (David Balogun) បានបញ្ចប់ការសិក្សាពីសាលា Reach Cyber Charter បន្ទាប់ពីចូលរៀនពីចម្ងាយពីផ្ទះរបស់គេនៅសង្កាត់បិនសាឡិម (Bensalem)នៅជាយក្រុងហ្វីឡាដែលហ្វៀ (Philadelphia)។ រូបគេនឹងទទួលសញ្ញាប័ត្រមធ្យមសិក្សាទុតិយភូមិ(បាក់ឌុប)ជាផ្លូវការនៅខែមិថុនា។
ក្មេងនេះបានប្រាប់ប៉ុស្តិ៍ព័ត៌មាន Fox43ថា “ខ្ញុំបានដឹងថាខ្ញុំ (អាច) បញ្ចប់ការសិក្សានៅអាយុដប់ឬប្រាំបួនឆ្នាំ ដរាបណាខ្ញុំខិតខំប្រឹងប្រែង ហើយដោយមានការជួយជ្រោមជ្រែងពីម៉ាក់ប៉ារបស់ខ្ញុំ និងជាពិសេសសាលា Reach Cyber Charter ទើបខ្ញុំអាចបញ្ចប់ការសិក្សាបាន”។
ក្មេងប្រុស ដែលចូលចិត្តរៀនសូត្រនិងលេងកីឡាដូចជាការ៉ាតេនិងកីឡាបេស្បល ក៏ដូចជាការលេងព្យាណូ បានរៀបចំផែនការអនាគតរបស់គេរួចទៅហើយ។
រូបគេបាននិយាយថា “ខ្ញុំចង់ក្លាយជាតារារូបវិទូ ហើយខ្ញុំចង់សិក្សាអំពីប្រហោងខ្មៅ និង ផ្កាយដែលភ្លឺបំផុត”។
ឪពុកម្តាយរបស់គេមានសញ្ញាបត្រកម្រិតខ្ពស់ដូចគ្នា ប៉ុន្តែពួកគេបានទទួលស្គាល់ថា វាអាចជាបញ្ហាប្រឈមក្នុងការចិញ្ចឹមកូនប្រុស ដែលមានបញ្ញាឆ្លាតវៃមិនធម្មតារូបនេះ។
លោកស្រី រ៉ុនយ៉ា បាឡូហ្គាន់ (Ronya Balogun)ម្តាយរបស់ដេវីដ បាននិយាយថា “រូបគេជាក្មេងអាយុ ៩ ឆ្នាំដែលមានខួរក្បាលមានសមត្ថភាពយល់អំពីគោលគំនិតជាច្រើនដែលហួសពីអាយុរបស់គេ ហើយជួនកាលហួសពីការយល់ដឹងរបស់ខ្ញុំទៅទៀត”។
ឪពុករបស់គេគឺលោក ហិនរី បាឡូហ្គាន់ (Henry Balogun) បាននិយាយថា កូនប្រុសរបស់គាត់តែងតែចង់ដឹងចង់ឃើញ។
លោកបាឡូហ្គាន់បានប្រាប់ Fox43 ថា “រូបគេតែងចង់ដឹងចង់ដឹងចង់ឃើញយ៉ាងខ្លាំងអំពីរឿងរ៉ាវនានា ហើយរឿងនេះបានជួយតម្រង់ទិសដល់គេ”៕
ដេវីដ បាឡូហ្គាន់ ចង់ក្លាយជាតារារូបវិទូទៅថ្ងៃអនាគត