ប្រែសម្រួលៈបំណង(ស្ត្រេតថែមស៍)៖ កសិករបារាំងបានបើកត្រាក់ទ័ររាប់រយគ្រឿងចូលទីក្រុងប៉ារីសកាលពីថ្ងៃពុធដើម្បីប្រឆាំងនឹងការរឹតបន្តឹងលើការប្រើថ្នាំសម្លាប់សត្វល្អិតព្រមទាំងច្បាប់បរិស្ថានដទៃទៀត ដែលពួកគេនិយាយថាវាគំរាមផលិតកម្មកសិកម្មនៅក្នុងប្រទេសមហាអំណាចកសិកម្មប្រចាំសហភាពអឺរ៉ុបមួយនេះ។
ចំណាត់ការនេះកើតឡើងក្រោយពីតុលាការសហភាពអឺរ៉ុបមួយកាលពីខែមុនបានសំរេចបដិសេធគោលនយោបាយបារាំងមួយដែលអនុញ្ញាតអោយអ្នកដាំឆៃថាវsugar beetប្រើប្រាស់ថ្នាំសម្លាប់សត្វល្អិត ជាហេតុនាំអោយពួកអ្នកដាំដំណាំប្រភេទនេះបារម្ភអំពីការធ្លាក់ចុះទិន្នផលនិងបិទរោងចក្រស្ករ។
សហជីពកសិកម្មធំបំផុតរបស់បារាំងFNSEAបាននិយាយថា«បំរាមជាថ្មីនេះនិងការគ្មានចំណាត់ការពីរដ្ឋាភិបាលដើម្បីគាំទ្រវិស័យជាច្រើនរួមមានឈើរី ប៉ោម រុក្ខជាតិchicory ប៉េងប៉ោះ និងដំឡូងបារាំង វាយប្រហារផលិកម្មកសិកម្មបារាំង»។
ពួកគេព្រមានថា ការនាំចូលកសិផលដែលមិនប្រើថ្នាំសម្លាប់សត្វល្អិតនឹងគំរាមការងារបារាំង។
តែពួកសកម្មជនបរិស្ថានបាននិយាយថាសំណល់ថ្នាំសម្លាប់សត្វល្អិតបង្កការខូចខាតដីនិងជីវិតសត្វ។
ពួកសហជីពរំពឹងថា ត្រាក់ទ័រដល់ទៅ៥០០គ្រឿងនិងកសិករ២.០០០នាក់មកពីជុំវិញក្រុងប៉ារីសនឹងចូលរួមការប្រឆាំងតវ៉ានេះ។
ត្រាក់ទ័រ ជាមួយនឹងបដាសរសេរថា«ម៉ាក្រុងកំពុងសម្លាប់កសិកម្ម» «ម៉ាក្រុងឆ្លើយតប»និង«សង្គ្រោះកសិករយើង» នឹងធ្វើការបើកហែទៅកាន់វិមានអង់វ៉ែលីដ( Invalides)ក្បែរក្រសួងកសិកម្មបារាំង។តំណាងសហជីពកសិករក៏ត្រួវជួបពិភាក្សាជាមួយរដ្ឋមន្ត្រីកសិកម្មបារាំងផងដែរ។
កសិករបានមកដល់ក្រុងប៉ារីសតាមត្រាក់ទ័រកាលពីថ្ងៃ៨កុម្ភៈ
ក្នុងពេលជាមួយគ្នាបណ្តាសហជីពការងារក៏បានសន្យាបន្តដាក់សម្ពាធលើប្រធានាធិបតី អេមម៉ានុយអែល ម៉ាក្រុង ដើម្បីអោយលោកទម្លាក់ចោលផែនការមិនប្រជាប្រិយមួយស្តីពីការដំឡើងអាយុចូលនិវត្តន៍។មនុស្សប្រមាណ៧៥៧.០០០នាក់បានចូលរួមក្នុងការតវ៉ាប្រឆាំងនឹងផែនការដំឡើងអាយុចូលនិវត្តន៍នេះកាលពីថ្ងៃអង្គារ។វាបង្ហាញការធ្លាក់ចុះចំនួនអ្នកចួលរួម បន្ទាប់ពីមនុស្ស១,២៧លាននាក់បានចូលរួមកូដកម្មនិងបាតុកម្មកាលពីថ្ងៃ៣១មករា៕
ពួកសហជីពបន្តកៀគរសមាជិកមកធ្វើបាតុកម្មប្រឆាំងនឹងផែនការដំឡើងអាយុចូលនិវត្តន៍ពី៦២ដល់៦៤ឆ្នាំ