ដោយ៖ រ៉ាម៉ន / ភ្នំពេញ៖ លោក អ៊ំ ម៉ារ៉េត ប្រធានក្រុមប្រឹក្សាខណ្ឌ និងលោក ចេង មុនីរ៉ា អភិបាលខណ្ឌច្បារអំពៅ នៅព្រឹកថ្ងៃទី៩ ខែកុម្ភៈ ឆ្នាំ២០២៣ បានអញ្ជើញជាអធិបតី ក្នុងពិធីប្រកាសផ្លាស់ប្តូរ និងទទួលស្គាល់ប្រធានក្រុមប្រឹក្សា និងជាចៅសង្កាត់ព្រែកថ្មី ចូលកាន់តំណែងជាផ្លូវការ ពោលគឺ លោកស្រី វ៉ា សារិន ជាចៅសង្កាត់ព្រែកថ្មី ជំនួស លោក លីវ វណ្ណថេង ដែលបានដាក់ពាក្យលាឈប់ និងផ្ទេរភារកិច្ចទៅកាន់តំណែងថ្មី។
យោងតាមសេចក្តីសម្រេចរបស់ក្រសួងមហាផ្ទៃ ដែលចុះហត្ថលេខាដោយសម្តេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចតែងតាំង លោកស្រី វ៉ា សារិន ជាចៅសង្កាត់ព្រែកថ្មី ជំនួសលោក លីវ វណ្ណថេង ដែលបានដាក់ពាក្យលាឈប់ និងផ្ទេរភារកិច្ចទៅកាន់តំណែងថ្មី។
ក្នុងពិធីនោះ លោក អភិបាលខណ្ឌច្បារអំពៅ បានណែនាំដល់ចៅសង្កាត់ព្រែកថ្មី ដែលទើបប្រកាសចូលកាន់តំណែង ត្រូវខិតខំបំពេញការងារ បំរើប្រជាពលរដ្ឋ ដែលបាន គាំទ្រដល់លោកស្រី ឱ្យធ្វើជាចៅសង្កាត់ថ្មី នៃសង្កាត់ព្រែកថ្មី ជំនួសលោក លីវ វណ្ណថេង អតីតចៅសង្កាត់ព្រែកថ្មី ដែលបានដាក់ពាក្យលាឈប់ និងផ្ទេរភារកិច្ចថ្មី ជាអភិបាលរង ស្រុកកៀនស្វាយ ខេត្តកណ្ដាល ។
ក្នុងឱកាសនោះ លោកអភិបាលខណ្ឌច្បារអំពៅ បានដាក់ចេញនូវចំណុចសំខាន់ៗ ចំនួន៤ ដល់លោកស្រីចៅសង្កាត់ព្រែកថ្មី ដែលទើបចូលកាន់តំណែង ឲ្យខិតខំអនុវត្ត ក្នុងគោលដៅ បំរើប្រជាពលរដ្ឋ ដោយមិនប្រកាន់និន្នាការនយោបាយអ្វីឡើយ។
ទី១៖ ត្រូវខិតខំបំរើសេវាជូនប្រជាពលរដ្ឋ ទាំងសេវាសំណូមពរ និងសេវាតម្រូវការចាំបាច់ និងត្រូវរួមគ្នាអនុវត្តបទបញ្ជា របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ឲ្យបានម៉ឺងម៉ាត់បំផុត ក្នុងការលប់បំបាត់ល្បែងស៊ីសងគ្រប់ប្រភេទ ដូចជាល្បែងជល់មាន់ បៀ អាប៉ោង កន្ទុយលេខ ឡូតូ និងល្បែងតាមអនឡាញ ជាដើម។ ត្រូវខិតខំផ្សព្វផ្សាយ ឲ្យបានទូលំទូលាយ ក្នុងការផ្តល់សេវាមូលដ្ឋាន ជូនប្រជាពលរដ្ឋ ដូចជាសៀវភៅស្នាក់នៅ សៀវភៅគ្រួសារ ធ្វើអត្តសញ្ញាប័ណ្ណសញ្ជាតិខ្មែរ ជូនប្រជាពលរដ្ឋ ដែលគ្រប់អាយុ និងហួសកាលបរិច្ឆេទ រួមទាំងផ្តល់សេវា លើឯកសារអត្រានុកូលដ្ឋាន។
ទី២៖ រួមទប់ស្កាត់ការសាងសង់សំណង់ផ្សេងៗ ដែលរំលោភយកដីចំណីទន្លេ បឹងបួរ ព្រែក ប្រឡាយ និងរៀបចំសណ្តាប់ធ្នាប់សាធារណៈ ឲ្យបានប្រសើរឡើងថែមទៀត ការប្រកប មុខរបររកស៊ីទទួលទានប្រចាំថ្ងៃ មិនហ៊ានឃាត់ទេ តែសូមឲ្យបងប្អូនកុំដាក់តាំងលក់ របស់របរផ្សេងៗ លើដីចំណីផ្លូវសាធារណៈ។
ទី៣៖ ត្រូវផ្សព្វផ្សាយឲ្យបានទូលំទូលាយ ពីគុណតម្លៃដ៏មហាសាល ដល់មហាជនទូទៅគឺ អត្ថន័យ នៃសន្តិភាព ដែលយើងមានសព្វថ្ងៃនេះ ដោយសារប្រទេសជាតិយើង មានសន្តិ ភាព ទើបមានការអភិវឌ្ឍន៍ រីកចំរើនលើគ្រប់វិស័យ យើងត្រូវរួបរួមគ្នាថែរក្សាការពារ សន្តិភាព។
ទី៤៖ ត្រូវរួមគ្នារក្សាប្រព័ន្ធប្រឡាយ និងស្តាប្រឡាយដើម្បីស្តុកទឹក ទុកសម្រាប់ស្រោច ដំណាំបងប្អូនប្រជាពលរដ្ឋ។
លោកអភិបាលខណ្ឌ បានស្នើសុំឲ្យបងប្អូនប្រជាពលរដ្ឋ ចូលរួមសហការជាមួយអាជ្ញាធរ ក្នុងការផ្តល់ព័ត៌មាន ពីសកម្មភាពក្មេងទំនើង ទីកន្លែងលួចសេព និងប្រើប្រាស់គ្រឿងញៀន និងសកម្មភាពល្មើសផ្សេងទៀត យើងត្រូវរួមគ្នា អនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព អោយមានប្រសិទ្ធភាព។
លោក បានបញ្ជាក់ថាៈ ការងារសន្តិសុខនេះ ជាកត្តាសំខាន់ណាស់ ដែលមិនអាចខ្វះបាន ហើយមនុស្សគ្រប់គ្នា គ្រប់ស្រទាប់វណ្ណៈ មិនថាអ្នកមាន ឬអ្នកក្រនោះទេ គឺចង់បាន មូលដ្ឋាន មានសន្តិសុខល្អ រស់នៅក្នុងភាពសុដមរម្យនា៕/V/r
