ប្រែសម្រួល : កញ្ញាដាលីស (ដេល្លីម៉េល) ៖ កីឡាករបាល់ទាត់ហ្គាណា គ្រីស្ទាន អាត់ស៊ូ (Christian Atsu)នៅតែបាត់ខ្លួននៅភាគខាងត្បូងប្រទេសតួកគីបន្ទាប់ពីរញ្ជួយដីដែលបានបំផ្លិចបំផ្លាញតំបន់នេះកាលពីថ្ងៃចន្ទ នេះបើយោងតាមភ្នាក់ងារនិងអ្នកចាត់ការទូទៅរបស់គេ បើទោះបីជានាយកប្រតិបត្តិម្នាក់នៅក្លិបតួកគី Hatayspor បាននិយាយកាលពីថ្ងៃអង្គារថា រូបគេត្រូវបាន “ទាញចេញ” ពីគំនរបាក់បែកដោយរងរបួសក៏ដោយ។
ភ្នាក់ងាររបស់អាត់ស៊ូ គឺ លោក ណាណា សាឈៀ (Nana Sachere) បានចែករំលែកសារនៅលើ Twitter ដោយនិយាយថា”យើងកំពុងធ្វើអ្វីគ្រប់យ៉ាងដែលយើងអាចធ្វើបានដើម្បីកំណត់ទីតាំងរបស់គ្រីស្ទាន” ខណៈជំរុញឱ្យអ្នកគាំទ្រ “ចៀសវាងការផ្សព្វផ្សាយព័ត៌មានដែលមិនច្បាស់លាស់”។
អ្នកចាត់ការទូទៅក្រុម Hatayspor លោក វ៉ុលកាន ដេមីរែល (Volkan Demirel) ក៏បានប្រាប់សារព័ត៌មានកីឡារបស់តួកគីកាលពីថ្ងៃពុធដែរថាគាត់មិនបានទទួលព័ត៌មានអំពីកីឡាកររូបនេះទេ ដោយបន្ថែមថា “សូមកុំប្រាកដពេកថារូបគេរួចរស់ជីវិត” នេះបើយោងតាមការបកប្រែរបស់កាសែត Washington Post ។
សមាគមបាល់ទាត់ហ្គាណាបានបង្ហោះសារកាលពីព្រឹកថ្ងៃអង្គារថា អាត់ស៊ូ “ត្រូវបានជួយសង្គ្រោះដោយជោគជ័យពីគំនរបាក់បែកនៃអគារដែលដួលរលំ ហើយកំពុងទទួលការព្យាបាល” ខណៈអនុប្រធានក្លិប Hatayspor លោក មូស្តាហ្វា អូហ្សាត (Mustafa Ozat) ក៏បានអះអាងផងដែរថា អាត់ស៊ូត្រូវបានរកឃើញ។
នាយកកីឡារបស់ក្លិប Hatayspor លោក ថាណឺ សាវុត (Taner Savut) ក៏នៅកំពុងបាត់ខ្លួនដែរ បន្ទាប់ពីរញ្ជួយដី៕
អាត់ស៊ូនៅកំពុងបាត់ខ្លួននៅឡើយក្នុងគ្រោះរញ្ជួយដីនៅតួកគី