ប្រែសម្រួល : កញ្ញាដាលីស (ដេល្លីម៉េល) ៖ ចិនកាលពីថ្ងៃព្រហស្បតិ៍ទី៩កុម្ភៈបាននិយាយថាការចោទប្រកាន់របស់សហរដ្ឋអាម៉េរិកថាបាឡុងចិនដែលគេបាញ់ទម្លាក់ជាផ្នែកមួយនៃកម្មវិធីឃ្លាំមើលដ៏ទូលំទូលាយ គឺស្មើនឹង “សង្គ្រាមព័ត៌មានប្រឆាំងនឹងចិន”។
មន្ទីរបញ្ចកោណកាលពីថ្ងៃពុធបាននិយាយថា បាឡុងចិន ដែលបានបាញ់ទម្លាក់នៅឆ្នេរសមុទ្ររដ្ឋសៅខារ៉ូឡាយណា (South Carolina) កាលពីថ្ងៃសៅរ៍គឺជាផ្នែកមួយនៃកម្មវិធីដែលពាក់ព័ន្ធនឹងបាឡុងអាកាសបែបនេះជាច្រើន ដែលចិនបានដំណើរការអស់រយៈពេលជាច្រើនឆ្នាំមកហើយ។
នៅក្នុងសន្និសីទសារព័ត៌មានប្រចាំថ្ងៃកាលពីថ្ងៃព្រហស្បតិ៍ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning)បានលើកឡើងម្តងទៀតនូវការទទូចរបស់ចិនថាបាឡុងគ្មានមនុស្សបើកដ៏ធំនេះគឺជាបាឡុងឧតុនិយមស៊ីវិល ដែលបានហោះខុសទិសដោយចៃដន្យ ហើយថា សហរដ្ឋអាម៉េរិក “មានប្រតិកម្មជ្រុល” ដោយបាញ់ទម្លាក់វាចោល។
លោកស្រីម៉ៅបាននិយាយនៅក្នុងសន្និសីទព័ត៌មានប្រចាំថ្ងៃថា “វាជាការមិនទទួលខុសត្រូវ។ ការចោទប្រកាន់ចុងក្រោយអាចជាផ្នែកមួយនៃសង្គ្រាមព័ត៌មានរបស់ភាគីអាម៉េរិកប្រឆាំងនឹងចិន”។
មន្ត្រីអាម៉េរិកបានច្រានចោលការអះអាងរបស់ចិន ហើយភ្នាក់ងារមកពី FBIនិងសេវាស៊ើបអង្កេតឧក្រិដ្ឋកម្មកងទ័ពជើងទឹកកំពុងប្រមូលកម្ទេចកម្ទីដែលបានរកឃើញពីមហាសមុទ្រហើយនាំវាសម្រាប់កិច្ចដំណើរការជាបន្ត។
ឧត្តមសេនីយ៍ទោ ផាត់ រ៉ាយឌឺ (Pat Ryder) អ្នកនាំពាក្យក្រសួងការពារជាតិបាននិយាយថានៅពេលដែលបាឡុងស្រដៀងគ្នានេះបានឆ្លងកាត់ទឹកដីអាម៉េរិកក្នុងឱកាសចំនួនបួនក្នុងអំឡុងរដ្ឋបាលត្រាំនិងបៃដិន សហរដ្ឋអាម៉េរិកមិនបានកំណត់អត្តសញ្ញាណភ្លាមៗថាពួកវាជាបាឡុងចារកម្មរបស់ចិននោះទេ។
ប៉ុន្តែលោកបាននិយាយថា “ការវិភាគចារកម្មជាបន្តបន្ទាប់” បានអនុញ្ញាតឱ្យសហរដ្ឋអាម៉េរិកបញ្ជាក់ថា ពួកវាជាផ្នែកនៃកិច្ចខិតខំប្រឹងប្រែងចារកម្មរបស់ចិន និងរៀនសូត្រ “ច្រើនទៀត”អំពីកម្មវិធីនេះ។
លោករ៉ាយឌឺបាននិយាយថា “ខ្ញុំអាចធានាអ្នកថានេះមិនមែនសម្រាប់គោលបំណងស៊ីវិលទេ … យើងច្បាស់ ១០០ ភាគរយអំពីរឿងនោះ”៕
អ្នកនាំពាក្យក្រសួងការបរទេសចិន លោកស្រី ម៉ៅ នីង