ប្រែសម្រួល : កញ្ញាដាលីស (VNExpress) ៖ ក្រុមការងារទប់ស្កាត់មេរោគរបស់រដ្ឋាភិបាលសិង្ហបុរីបាននិយាយកាលពីថ្ងៃព្រហស្បតិ៍ទី៩កុម្ភៈថាសិង្ហបុរីនឹងទម្លាក់ចោលលក្ខខណ្ឌតម្រូវសម្រាប់អ្នកដំណើរដែលមិនបានចាក់វ៉ាក់សាំងពេញលេញ ដើម្បីបង្ហាញលទ្ធផលតេស្តិ៍កូវីដឬទិញធានារ៉ាប់រងលើការធ្វើដំណើរសម័យកូវីដ ចាប់ពីថ្ងៃទី ១៣ ខែកុម្ភៈតទៅ។
ក្រសួងសុខាភិបាលបាននិយាយនៅក្នុងសេចក្តីថ្លែងការណ៍មួយថា ម៉ាស់នឹងមិនត្រូវតម្រូវឱ្យពាក់នៅលើមធ្យោបាយដឹកជញ្ជូនសាធារណៈនោះទេខណៈអាជ្ញាធរបានបន្ថយកម្រិតឆ្លើយតបនឹងជំងឺកូវីដពី “ពណ៌លឿង”ទៅជា “បៃតង” ដែលនេះបង្ហាញថា កូវីដមិនមែនជាការគំរាមកំហែងនោះទេ។
ទោះយ៉ាងណា ម៉ាស់នឹងនៅតែតម្រូវជាចាំបាច់នៅក្នុងទីតាំងថែទាំសុខភាព កន្លែងដែលមានអន្តរកម្មជាមួយអ្នកជំងឺ និងនៅក្នុងតំបន់ដែលប្រឈមមុខនឹងអ្នកជំងឺនៅខាងក្នុងអគារ។
លោក ឡរិន វង់ (Lawrence Wong) ឧបនាយករដ្ឋមន្ត្រីនិងជាសហប្រធាននៃក្រុមការងារទប់ស្កាត់មេរោគបានប្រាប់សន្និសីទសារព័ត៌មានថា “នៅក្នុងប្រទេសសិង្ហបុរីស្ថានភាពកូវីដរបស់យើងនៅតែមានស្ថិរភាពក្នុងប៉ុន្មានខែថ្មីៗនេះ បើទោះបីជាមានការកើនឡើងនៃអ្នកដំណើរនៅចុងឆ្នាំ និងការផ្លាស់ប្តូររបស់ចិនពីនយោបាយកូវីដសូន្យក៏ដោយ”។
លោកបាននិយាយថា “ប្រជាជនរបស់យើងបានអភិវឌ្ឍនូវភាពស៊ាំកូនកាត់កម្រិតខ្ពស់”។
ទិន្នន័យរបស់ក្រសួងសុខាភិបាលបានបង្ហាញថា ប្រហែល ៨០ ភាគរយនៃប្រជាជន ៥,៦ លាននាក់របស់រដ្ឋទីក្រុងនេះ បានទទួលវ៉ាក់សាំងកូវីដអប្បបរមាហើយប្រហែលពាក់កណ្តាលគឺទទួលបានដូសជំរុញថ្មីបំផុត។
លោកវង់និយាយថា “យើងត្រូវតែដោះស្រាយជាមួយនឹងខ្សែកោងនិងការភ្ញាក់ផ្អើលមិននឹកស្មានដល់ជាច្រើននៅតាមផ្លូវកន្លងមក។ ប៉ុន្តែយើងអាចឈានទៅដល់ចំណុចនេះជាមួយគ្នា ពីព្រោះយើងទាំងអស់គ្នាបានរួមចំណែកទាំងអស់គ្នា”។
មជ្ឈមណ្ឌលហិរញ្ញវត្ថុអាស៊ីនេះរំពឹងថាវិស័យទេសចរណ៍នឹងងើបឡើងវិញដល់កម្រិតមុនជំងឺរាតត្បាតនៅត្រឹមឆ្នាំ ២០២៤៕
អ្នកទេសចរថតរូបនៅមុខសួន Merlion ក្នុងប្រទេសសិង្ហបុរី