ប្រែសម្រួល : កញ្ញាដាលីស (ដេល្លីម៉េល) ៖ ក្រសួងពាណិជ្ជកម្មអាម៉េរិកបាននិយាយកាលពីថ្ងៃសុក្រទី១០កុម្ភៈថា ខ្លួនបានដាក់ក្នុងបញ្ជីខ្មៅនូវអង្គភាពរបស់ចិនចំនួនប្រាំមួយចំពោះការគាំទ្ររបស់ពួកគេក្នុងកិច្ចខិតខំប្រឹងប្រែងធ្វើទំនើបកម្មយោធារបស់រដ្ឋាភិបាលក្រុងប៉េកាំង ជាពិសេសទាក់ទងនឹងកម្មវិធីអវកាស រួមទាំងយានអាកាសនិងបាឡុង។
ចំណាត់ការនេះធ្វើឡើងមួយថ្ងៃគត់បន្ទាប់ពីសមាជិកសភាអាម៉េរិកបានថ្កោលទោសជាឯកច្ឆ័ន្ទចំពោះការប្រើប្រាស់បាឡុងចិនសំរាប់កិច្ចការដែលគេសង្ស័យជាចារកម្មលើអាម៉េរិកខាងជើងកាលពីសប្តាហ៍មុន។
ការហោះរយៈពេលជាច្រើនថ្ងៃរបស់បាឡុងចិនពីរដ្ឋអាឡាស្ការហូតដល់រដ្ឋកាលីហ្វ័រញ៉ាភាគខាងត្បូងបានទាក់ទាញចំណាប់អារម្មណ៍របស់ប្រជាជនអាម៉េរិកនិងក្រុមមន្ត្រី មុនពេលយោធាអាម៉េរិកបាញ់ទម្លាក់វានៅឆ្នេរសមុទ្រភាគខាងកើតរបស់ប្រទេសកាលពីថ្ងៃសៅរ៍សប្តាហ៍មុន។
ក្រុមហ៊ុន ដែលដាក់ចូលក្នុងបញ្ជីខ្មៅ ត្រូវបានរឹតត្បិតពីការទទួលបានទំនិញនិងបច្ចេកវិជ្ជារបស់អាម៉េរិកដោយគ្មានការអនុញ្ញាតពីរដ្ឋាភិបាល។
លោក អាឡាន អេស្តេវេស (Alan Estevez) អនុរដ្ឋមន្ត្រីក្រសួងពាណិជ្ជកម្មទទួលបន្ទុកឧស្សាហកម្មនិងសន្តិសុខបាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រទី១០កុម្ភៈថា “ការប្រើប្រាស់បាឡុងកម្ពស់ខ្ពស់របស់ចិនគឺរំលោភលើអធិបតេយ្យភាពរបស់យើងនិងគំរាមកំហែងដល់សន្តិសុខជាតិរបស់សហរដ្ឋអាម៉េរិក”។
លោកបានបន្ថែមថា “សកម្មភាពថ្ងៃនេះបញ្ជាក់យ៉ាងច្បាស់ថាអង្គភាពដែលព្យាយាមធ្វើឱ្យប៉ះពាល់ដល់សន្តិសុខជាតិនិងអធិបតេយ្យភាពរបស់សហរដ្ឋអាម៉េរិកនឹងត្រូវកាត់ផ្តាច់ពីការចូលប្រើបច្ចេកវិជ្ជារបស់អាម៉េរិក”។
ក្រុមហ៊ុនទាំងប្រាំមួយរួមមាន ក្រុមហ៊ុន Beijing Nanjiang Aerospace Technology Co វិទ្យាស្ថាន China Electronics Technology Group Corporation 48th Research Institute ក្រុមហ៊ុន Dongguan Lingkong Remote Sensing Technology Co. ក្រុមហ៊ុន Eagles Men Aviation Science and Technology Group Co. ក្រុមហ៊ុន Guangzhou Tian-Hai-Xiang Aviation Technology Co. និង ក្រុមហ៊ុន Shanxi Eagles Men Aviation Science and Technology Group Co.។
នៅក្នុងឯកសារមួយ ក្រសួងពាណិជ្ជកម្មបាននិយាយថា យោធាចិនកំពុងប្រើប្រាស់បាឡុងកម្ពស់ខ្ពស់ “សម្រាប់សកម្មភាពស៊ើបការណ៍សម្ងាត់និងឈ្លបយកការណ៍” ដោយបន្ថែមថា នេះគឺផ្ទុយទៅនឹងផលប្រយោជន៍សន្តិសុខជាតិនិងគោលនយោបាយការបរទេសរបស់សហរដ្ឋអាម៉េរិក។
ទោះជាយ៉ាងណាចិនបានទទូចថា បាឡុងនោះជា “យានអាកាសស៊ីវិលដែលប្រើសម្រាប់ការស្រាវជ្រាវជាចម្បងក្នុងគោលបំណងឧតុនិយម”។
ប៉ុន្តែមន្ត្រីក្រសួងការបរទេសអាម៉េរិកម្នាក់បានបង្ហាញថា សហរដ្ឋអាម៉េរិកជឿថា បាឡុងនេះស្ថិតនៅក្រោមការគ្រប់គ្រងរបស់កងទ័ពរំដោះប្រជាជនចិន ហើយជាផ្នែកមួយនៃកងយានអាកាស ដែលចិនបានបញ្ជូនទៅជាង៤០ប្រទេសនៅលើទ្វីបចំនួនប្រាំដើម្បីប្រមូលព័ត៌មានចារកម្ម៕
ក្រសួងពាណិជ្ជកម្មអាម៉េរិកដាក់អង្គភាពចិន ៦ ចូលក្នុងបញ្ជីខ្មៅ ក្រោយយោធាអាម៉េរិកចាត់ការលើបាឡុងចិនមួយកាលពីថ្ងៃសៅរ៍មុន