ប្រែសម្រួល : កញ្ញាដាលីស (ដេល្លីម៉េល) ៖ កីឡាករ ធីអាហ្គោ ស៊ីលវ៉ា (Thiago Silva) បានចុះកិច្ចសន្យាថ្មីរយៈពេលមួយឆ្នាំដើម្បីបន្តនៅជាមួយ Chelsea រហូតដល់រដូវក្តៅឆ្នាំ ២០២៤។
កីឡាករវ័យ ៣៨ ឆ្នាំរូបនេះបានក្លាយជាអ្នកដឹកនាំតំបន់ការពាររបស់ Chelsea ចាប់តាំងពីចូលរួមជាមួយ Paris St Germain ក្នុងខែសីហា ឆ្នាំ ២០២០នៅក្នុងអ្វីដែលគេមើលឃើញពីដំបូងថាជាការស្នាក់នៅរយៈពេលខ្លី ប៉ុន្តែបានបន្តស្នាក់នៅកាន់តែយូរដោយសារការលេងហ្នឹងថឹងរបស់ខ្លួន។
ធីអាហ្គោ ដែលបានជួយ Chelsea ឈ្នះពានរង្វាន់ Champions League ក្នុងរដូវកាលដំបូងរបស់ខ្លួននៅឯកីឡដ្ឋាន Stamford Bridge បាននិយាយថា “ខ្ញុំពិតជារីករាយណាស់ក្នុងការបន្តអាជីពរបស់ខ្ញុំជាមួយក្រុមតោខៀវ”។
“នៅពេលខ្ញុំចុះកិច្ចសន្យាដំបូងរបស់ខ្ញុំនៅទីនេះ វាគឺគ្រាន់តែសម្រាប់មួយឆ្នាំប៉ុណ្ណោះ។ ឥឡូវ វាជាឆ្នាំទីបួនហើយ។ ខ្ញុំមិនដែលនឹកស្រមៃរឿងបែបនោះទេ ប៉ុន្តែវាពិតជាពេលវេលាដ៏ពិសេសសម្រាប់ខ្ញុំក្នុងការចុះហត្ថលេខានិងបន្តនៅ Chelsea”។
ការទិញកីឡាករឥតសំចៃដៃនៅខែមករារបស់ Chelsea រួមមានការទិញក្នុងតម្លៃ ៣៥ លានផោនសម្រាប់កីឡាករ បេណយ បាឌីអាស៊ីល (Benoit Badiashile) ពី Monaco ដោយបន្ថែមចំនួនកីឡាករកាន់តែច្រើននៅតំបន់ការពារកណ្តាល ប៉ុន្តែទោះបីជាមានការប្រកួតប្រជែងកាន់តែខ្លាំងយ៉ាងណាក៏ដោយ ក៏ការធានាបានហត្ថលេខាមួយឆ្នាំពីធីអាហ្គោនៅតែជាអាទិភាពសម្រាប់ Chelsea ។
ប្រធានក្លិប លោក ថុត បូលី (Todd Boehly) និងម្ចាស់សហគ្រប់គ្រងលោក បេដាដ អេកបាលី (Behdad Eghbali) បាននិយាយនៅក្នុងសេចក្តីថ្លែងការណ៍មួយថា “យើងរីករាយដែលធីអាហ្គោបានសម្រេចចិត្តបន្តនៅជាមួយ Chelsea”។
“គាត់ជាកីឡាករមានទេពកោសល្យលំដាប់ពិភពលោក ដូចដែលគាត់បានបង្ហាញឱ្យឃើញក្នុងរយៈពេលជាច្រើនឆ្នាំសម្រាប់ក្លិបនិងប្រទេស ហើយបទពិសោធន៍ គុណភាព និងជំនាញភាពជាអ្នកដឹកនាំរបស់គាត់មានសារៈសំខាន់ចំពោះចក្ខុវិស័យរបស់យើងឆ្ពោះទៅមុខ”។
“យើងរំភើបចិត្តដែលគាត់បានបន្តកុងត្រាជាមួយយើង ហើយយើងទន្ទឹងរង់ចាំជោគជ័យបន្ថែមទៀតជាមួយគាត់នៅពេលខាងមុខ”៕
ធីអាហ្គោនឹងបន្តលេងឱ្យ Chelsea ដល់រដូវក្តៅឆ្នាំ២០២៤