ប្រែសម្រួល : កញ្ញាដាលីស (ប៊ីប៊ីស៊ី) ៖ មន្ត្រីសុខាភិបាលជាន់ខ្ពស់ក្នុងទីក្រុងប៉េកាំងបានជំរុញឱ្យមេដឹកនាំក្នុងតំបន់របស់ចិនស្វែងរកមធ្យោបាយដើម្បីបង្កើនអត្រាកំណើតរបស់ប្រទេស។
លោក យ៉ាង វិនជួង (Yang Wenzhuang) បាននិយាយកាលពីថ្ងៃសុក្រទី១០កុម្ភៈថា ក្រុមមន្ត្រីត្រូវតែចាត់វិធានការយ៉ាងសកម្ម ដើម្បីដោះស្រាយផលប៉ះពាល់ដ៏អាក្រក់នៃគោលនយោបាយប្រឆាំងកំណើនប្រជាជនដ៏យូរអង្វែងរបស់ចិន។
លោកក៏បានជំរុញមន្ត្រីឱ្យ “បង្កើតការច្នៃប្រឌិតដ៏ក្លាហាន” ក្នុងការដោះស្រាយការចំណាយខ្ពស់លើការថែទាំកុមារនិងការអប់រំផងដែរ។
ចិនបានរាយការណ៍កាលពីខែមករាថា ចំនួនប្រជាជនរបស់ខ្លួនបានធ្លាក់ចុះជាលើកដំបូងក្នុងរយៈពេល ៦០ ឆ្នាំ។
ក្នុងឆ្នាំ ២០២២ មានកំណើតត្រឹមតែ ៦,៧៧ នាក់ក្នុង ១.០០០ នាក់នៅក្នុងប្រទេសចិន ដែលជាអត្រាកំណើតទាបបំផុតក្នុងកំណត់ត្រា និងធ្លាក់ចុះពីអត្រាកំណើត ៧,៥២ នាក់ធៀបឆ្នាំទៅមិញ។
គោលនយោបាយកូនមួយដ៏តឹងរ៉ឹងរបស់ប្រទេស ដែលត្រូវបានអនុវត្តពីឆ្នាំ១៩៨០ ដល់ឆ្នាំ ២០១៥ ដើម្បីឆ្លើយតបទៅនឹងកំណើនប្រជាជនលឿនពេករបស់ខ្លួន ត្រូវបានស្តីបន្ទោសចំពោះការធ្លាក់ចុះនេះ។ គ្រួសារ ដែលបំពានច្បាប់នេះ ត្រូវបានពិន័យ ហើយក្នុងករណីខ្លះថែមទាំងបាត់បង់ការងារទៀតផង។
ដែនកំណត់នេះត្រូវបានបន្ធូរបន្ថយនៅទូទាំងប្រទេសសម្រាប់គូស្វាមីភរិយាដែលបានរៀបការឱ្យមានកូនដល់២នាក់ក្នុងឆ្នាំ ២០១៦ ហើយបានបង្កើនបន្ថែមទៀតដល់៣នាក់ក្នុងឆ្នាំ ២០២១។ ប៉ុន្តែខេត្តមួយ គឺ ស៊ីឈ័ន បានអនុម័តច្បាប់រឹតតែធូររលុងជាងនេះទៀត។
លោកយ៉ាង ដែលដឹកនាំនាយកដ្ឋានតាមដានចំនួនប្រជាជននិងការអភិវឌ្ឍគ្រួសាររបស់ប្រទេស បាននិយាយថា “ក្រុមមន្ត្រីត្រូវតែចាប់យកយ៉ាងម៉ឺងម៉ាត់នូវរយៈពេលដ៏សំខាន់នៃការអភិវឌ្ឍចំនួនប្រជាជន”។
ថ្លែងទៅកាន់ទស្សនាវដ្ដីសុខភាពដែលគាំទ្រដោយរដ្ឋមួយ លោកយ៉ាងបាននិយាយថា ការព្រួយបារម្ភអំពីការចំណាយលើការថែទាំកុមារកំពុងមានផលប៉ះពាល់យ៉ាងធ្ងន់ធ្ងរដល់កំណើនប្រជាជន។ លោកក៏បានកំណត់បញ្ហាប្រឈមជុំវិញប្រាក់ និងគោលដៅអាជីពជាមូលហេតុនៃការធ្លាក់ចុះអត្រាកំណើតផងដែរ។
លោកយ៉ាងបាននិយាយថា “អាជ្ញាធរក្នុងតំបន់គួរតែត្រូវបានលើកទឹកចិត្តឱ្យធ្វើការស្វែងរកយ៉ាងសកម្ម និងបង្កើតការច្នៃប្រឌិតដ៏ក្លាហានក្នុងការកាត់បន្ថយការចំណាយលើការសម្រាលកូន ការថែទាំកុមារ និងការអប់រំ” ដើម្បីលើកកម្ពស់ការអភិវឌ្ឍប្រកបដោយតុល្យភាពរយៈពេលវែងរបស់ប្រជាជន។
ខេត្តមួយចំនួនបានចាប់ផ្តើមអនុវត្តវិធានការថ្មីរួចហើយ ដើម្បីព្យាយាមជំរុញអត្រាកំណើត រួមទាំងការផ្តល់ប្រាក់ដល់ម្ចាស់ជំនួយមេជីវិតឈ្មោល។
នៅខេត្តស៊ីឈ័ន អាជ្ញាធរសុខាភិបាលបាននិយាយថា ពួកគេនឹងអនុញ្ញាតឱ្យគូស្វាមីភរិយាមិនទាន់រៀបការអាចចិញ្ចឹមគ្រួសារ និងទទួលបានអត្ថប្រយោជន៍ដែលបម្រុងទុកសម្រាប់គូស្វាមីភរិយាដែលរៀបការ។ កន្លងមកមានការហាមឃាត់ស្ត្រីមេម៉ាយមិនឱ្យចុះបញ្ជីកំណើតទេ។
អាជ្ញាធរក្នុងតំបន់ក៏បានប្រកាសដែរថាគូស្វាមីភរិយានឹងត្រូវបានអនុញ្ញាតឱ្យមានកូនច្រើនតាមដែលពួកគេចង់បាន ដែលជាការទាះបញ្ច្រាស់ដ៏សំខាន់នៃគោលនយោបាយកូនមួយ៕
ចិនកំពុងប្រឈមមុខនឹងការធ្លាក់ចុះចំនួនប្រជាជននិងអត្រាកំណើត