ដោយ: បូកគោ / កែប: មន្ត្រីក្នុងដែនជំនាញ បានអះអាងថា ក្រោយលុបបំបាត់បាន ទាំងស្រុង នូវឆ្មបបុរាណ នោះការស្លាប់របស់មាតា ក៏ដូចជាទារក ទាំងពេល និងក្រោយ សម្រាល មិនមានកើតឡើងទៀតឡើយ។
រាយការណ៍ឱ្យដឹង ក្នុងសន្និបាតបូកសរុបលទ្ធផលការងារ ឆ្នាំ២០២២ កាលពីរសៀល ថ្ងៃទី១០ ខែកុម្ភៈ ឆ្នាំ២០២៣ លោកវេជ្ជបណ្ឌិត ម៉ែន សុធីរ ប្រធានមន្ទីរសុខាភិបាល ខេត្តកែប បានបញ្ជាក់ថាៈ ជាសូចនាករ សម្រាប់កម្មវិធីសុខភាពបន្តពូជ មាតា ទារក និងកុមារ កាលពីឆ្នាំ២០២២ កន្លងទៅ នៅតែបន្តស្ថិតក្នុងវឌ្ឍនភាព គួរឲ្យមោទនៈ ព្រោះពុំមានករណីស្លាប់ ចំពោះមាតា និងទារកទៀតឡើយ។ ទាំងនេះ អាស្រ័យដោយ ការលុបបំបាត់ បានទាំងស្រុងនូវ ឆ្មបបុរាណទូទាំងខេត្ត ដែលធ្វើឲ្យសមាមាត្រ នៃការសម្រាលកូន នៅមូលដ្ឋានសុខាភិបាល ស្ថិតក្នុងអត្រា ៥៥ ភាគរយ ចាប់ពីឆ្នាំ២០១៨ ដល់ឆ្នាំ២០២២។
ថ្លែងក្នុងពិធីខាងលើ លោក សោម ពិសិដ្ឋ អភិបាលខេត្តកែប បានមានប្រសាសន៍ថាៈ អត្រាមរណភាពមាតា និងទារក ដែលត្រូវបានលុបបំបាត់ រហូតដល់កម្រិតសូន្យបែបនេះ បញ្ជាក់ឲ្យឃើញថា ស្ថានភាពសុខភាពរបស់ស្ត្រី កុមារ និងប្រជាពលរដ្ឋ នៅទូទាំងប្រទេស ក៏ដូចជាក្នុងខេត្តកែប មានលក្ខណៈល្អប្រសើរជាលំដាប់។
លោកអភិបាលខេត្ត បានបន្តថាៈ រាជរដ្ឋាភិបាល បានបង្កើនថវិកា សម្រាប់វិស័យសុខា ភិបាល រៀងរាល់ឆ្នាំ ពិសេសបានអនុវត្តគម្រោងលើកទឹកចិត្តជាច្រើន ក្រៅពីប្រាក់បៀវត្ស។ ក្នុងនោះ រួមមាន មូលនិធិសមធម៌ ការផ្ដល់ប្រាក់លាភការបន្ថែម លើកទឹកចិត្តដល់ឆ្មប ដែលបានបង្កើតកូនរស់ ព្រមទាំងប្រាក់ឧបត្ថម្ភស្នាដៃការងារ តាមរយៈការវាយតម្លៃ គុណភាពសេវាសុខា ភិបាលសាធារណៈជាដើម។
លោក សោម ពិសិដ្ឋ បានផ្តាំផ្ញើថា ទន្ទឹមនឹងមោទនភាពនេះ មន្ទីរជំនាញត្រូវបន្តយកចិត្តទុក ដាក់លើសុខភាពមាតា ទារក និងកុមារតូចៗ ក្នុងចំណោមគ្រួសារក្រីក្រ នៅតាមទីជនបទ ទាំងអស់។ តំបន់ដាច់ស្រយាល នៅតែជាបញ្ហាប្រឈម ពិសេសប្រជាពលរដ្ឋ ដែលកំពុងរស់នៅ លើបណ្តាកោះ ក្នុងខេត្តកែប ដូចជា កោះពោធិ៍ និងកោះទន្សាយ ដែលទាមទារឲ្យមានការគិតគូរ ចំពោះសេវាដឹកជញ្ជូន ពេលជួបបញ្ហា ដូចជាសម្រាលកូន ឬសង្រោះបន្ទាន់ជាដើម៕/V/R
